གཉིས་པ་ཡུ་ཧན་ན། 1 - Tshangla New Testament (BSI)

¹ ཨོ་ཐ་ཡི་གུ་ཁེ་པ་ འགོ་དཔོན་ཡུ་ཧན་ན་གི་ སི་ཁཱན་ཨ་ན་དང་ རོ་ཀ་ཝག་ཙ་བ་ཏཱན་ འབྲི་ཅ་གི༌ལ། ཇི་གི་རོག་ཏེ་བ་ དེན་པ་ཨ་ཉི་རང་ཕང༌ཅ། ཉི་ཇང་ཐུར་གི་ཤ་ མང་གི་ཝ་ དེན་པ་གུམ་ཡེ་ཁཱན་ ཐམས་ཅན་གི་རང་ཕང༌ཅ།

² དེན་པ་ཁེ་པ་ ཨ་ཧ་ནང་ཀ་བཞུགས་པ༌ཅ། ཉི་དུས་ཏ་བུ་རང་ ཨ་ཧ་སེམས་ཀ་ བཞུགས་ཉི་གནང༌མེ།

³ ཉི་ཨ་ཧ་ ཡབ་དཀོན་མཆོག་དང་ རོ་ཀ་སྲས་ཡི་ཤུ་ཁིརིས་ག་ ཐུགས་རྗེ་དང་བྱམས་པར་ ཉི་སྐྱིད་པུ་ཁེ་པ་ ཨའི་དེན་པ་དང་ སྙིང་རྗེ་ཨ་ཉི་ཆོ་ཁཱན་ ཐམས་ཅན་གི་ཉོང་ཅེན༎

དེན་པ་ནང་ཀ་ཆོའི།

⁴ ཨ་པ་གི་ ཨ་ཧ་བཀའ་གནང་མ་ད་བུ་རང་ ན་ག་ཝག་ཙ་ ཚེ་བང་གི་ དེན་པ་ཨ་ཉི་ཆོ་ཝ་ཐོང་ཉི་ ཇང་གནམ་མེད་ས་མེད་ ཤོ་ནང་ཕེ༌ཝ།

⁵ ཇི་གི་ཕང་ཁཱན་ཨ་ན་ ཇི་གི་ན་ག་ཡེག་ཅ་ ཨ་ཤི་ཐུར་དང་ཐུར་ག་ ཕང་པེ་ཁེ༌ལེ། ཨུ་ཐུ་ཤོ་ བཀའ་སིང་མ་མང་གི་ཝ་ གོ་ཙུག་པེ་གང་ཀེ་རང་ ཨ་ཤི་ཉོང་ཁཱན་ བཀའ་མཱན་མ་རང་གི༌ལ།

⁶ སྙིང་རྗེ་ཨ་ལེ་ག་དེན་ཐ་ཤོ་ དཀོན་མཆོག་གི་ བཀའ་གནང་ཁཱན་ག་ ཆ་གནས་ཐ་ལེ་ཁེ༌ལེ། ནཱན་གི་ གོ་མ་གེ་རང་ ན་ཐ་ཁཱན་བཀའ་ཤོག་ ཧང་གི་ལ་ཡ་དག་ནེ་ལ་ ནཱན་གི་ སྙིང་རྗེ་ཨ་ལེ་ཁེ༌ལེ།

⁷ མགུ་སྐོར་ཕི་ཁཱན་མང་པུ་ཐུར་ འཛམ་གླིང་ནང་ཀ་ནུ་ཕ༌ཅ། ཡི་ཤུ་ཁིརིས་ཁེ་པ་ སོ་ངོ་རི་ཉི་ བྱོན་མ་དག་ཉི་ རོག་ཏེ་བ་ཀི་ དད་པ་ཨ་ལུ་མཱན༌ཅ། ཨུ་ཉུ་ད་བུ་སོ་ངོ་ཤོ་ མགུ་སྐོར་ཕི་ཁཱན་དང་ ཁིརིས་ག་དགྲ་ཨ་ཁཱན་གི༌ལ།

⁸ ཨོ་ཉི་ཨ་དེན་གེ་ ཨ་ཤི་ ལའི་ཨ་ཁཱན་ཁེ་པ་ བ་ཏོང་མ་དི་ལེ་དེན་གེ་ ན་ཧ་བ་རིག་པ་སྒྲིམ་ཉི་ ཆོ་ལེ་ཁེ༌ལེ། དག་པ་ཀབ་ཉི་ ན་ཤི་ཉོང་པེ་ཁེ་ཁཱན་ སེ་རབ་ཁེ་པ་ ཐམས་ཅན་རང་ ཉོང་པེ་རེ་ཆེན།

⁹ ཁིརིས་གི་ ཡེ་ཉི་གནང་ཁཱན་ག་ མ་ཆོ་ལཱན་ ཨོ་ཉ་གེ་ གོག་ཉི་དི་ནེ་ལ་ ཨོ་ཉ་སོ་ངོ་ཤོ་ དཀོན་མཆོག་ ཉོང་ཁཱན་སོ་ངོ་མང་གི། དག་པ་ཀབ་ཉི་ ཁིརིས་གི་ ཡེ་ཉི་གནང་མ་དང་ཏུ་ཉི་ཆོ་ནེ་ལ་ ཨོ་ཉ་སོ་ངོ་ཀབ་ཉི་ ཡབ་དང་སྲས་ཉིག་ཙིང་རང་ བཞུགས་པ༌ཅ།

¹⁰ ཨོ་ཉི་ཨ་དེན་གེ་ སོ་ངོ་ཐུར་ཕང་ ན་ག་ཕའི་ག་ཨུན་ཐཱན་ ཨུ་ཉུ་དང་ཏུ་ཉི་ མ་ཡེ་ནེ་ལ་ ཨོ་ཉ་སོ་ངོ་ཁེ་པ་ ཕའི་ནང་ཀ་མ་ཐོག༌ཅོ། ཉི་ཨུ་ཉུ་ད་བུ་ སོ་ངོ་ག་ཁབ་ཟང་བུ་ ཨ་ལེ་མ་ཁེ༌ལ།

¹¹ ཉི་ཨི་བི་གི་ ཨུ་ཉུ་ད་བུ་ སོ་ངོ་ག་ཁབ་ཟང་ཨ་ཉི་ ཨོ་ཉ་སོ་ངོ་ཐོག་ཅ་གི་ལ་སྨོ་ ཨོ་ཉ་སོ་ངོ་ཁེ་པ་ རོག་ཀབ་ཉི་དོམ་ཉི་ ངན་པ་ཨ་ཁཱན་རིན༌ཅ༎

ཆཱས་མཇུག་དུས།

¹² ཇི་གི་ན་ཧ་ཡེག་པེ་ཁེ་ཝ་ག་ ཨོམ་ཆང་རང་ མང་པུ་ཐུར༌ཅ། དག་པ་ཀབ་ཉི་ ཨོ་ཐ་ཤུ་གུ་དང་ སྣག་རྩི་གི་ཨ་ཉི་ འབྲི་བེ་ག་སེམས་མ༌ལ། ཇང་ན་ཧ་བ་ཆོ་ས་ཨུན་ཐཱན་ ན་ཧ་པ་ཏོང་རུམ་ཉི་ ཆཱས་ཨ་ལེ་ག་ རེ་ཆ་ཨ་ཝ༌ཅ། ཉི་ཤ་ ཨ་ཧ་བ་ གནམ་མེད་ས་མེད་ ཤོ་ནང་ཕེ་ཝ་རི༌ལེ།

¹³ ནཱན་གི་ཕང་ཁཱན་ ན་ག་ཨ་ན་ག་ ཝག་ཙ་བ་ཀི་ ན་ཧ་ཏཱན་ སྐུ་གཟུགས་བཟང་པོ་དག་ཉི་ཡེག༌ལ༎