དང་པ་པ་ཏྲུས། 1 - Tshangla New Testament (BSI)1 ཨོ་ཐ་ཡི་གུ་ཤོ་ ཡི་ཤུ་ཁིརིས་ག་སྐུ་ཚབ་ པ་ཏྲུས་གེ་གི༌ལ། ཉི་ཇི་གི་ ཨོ་ཐ་ཡི་གུ་ཁེ་པ་ དཀོན་མཆོག་གི་སི་ཁཱན་བ་ ཕིས་ཀ་ཏཱན་ཏོར་ཉི་དི་ཉི་ ས་ཆ་པོན་ཏྲས་ ག་ལ་ཏི་ཡ་དང་ ཀ་པ་དོ་ཀི་ཡ་ ཉི་ཨེ་ཤི་ཡ་དང་ བི་ཐི་ནི་ཡ་ག་ཆོ་ཁཱན་བ་ཀ་ཏཱན་ འབྲི་ཅ་གི༌ལ། 2 ན་ཧ་བ་ཤོ་ ཡབ་དཀོན་མཆོག་གི་ གོ་མ་གེ་རང་ སི་ཝ་ཆོ༌ཝ། ཉི་ན་ཧ་བ་ ཐུགས་ཉིད་གི་ དམ་པ་ཅོད་ཉི་ གནང་མ་གི༌ལ། ཨོ་ཉི་ཨ་དེན་གེ་ ན་ཤི་ ཡི་ཤུ་ཁིརིས་ག་ ཆ་གནས་ཐ་ཝ་རི་ཉི་ རོ་ཀ་སྐུ་ཁྲག་གི་ ན་ཧ་བ་ ཙང་མ་རི་ཝ༌ཅ། དཀོན་མཆོག་གི་ ན་ཧ་ཐུགས་རྗེ་དང་སྐྱིད་པུ་ མང་པུ་ཨ་ཉི་གནང་ཆེན། 3 དཀོན་མཆོག་དང་ ཨ་ཧ་གཙོ་བོ་ཡི་ཤུ་ཁིརིས་ག་ཡབ་ག་ བསྟོད་པ་ཕུལ་ཁེ། རོ་ཀ་ཐུགས་རྗེ་ ཆི་ལུ་ཆོ་ཝ་ཨ་དེན་གེ་ ཡི་ཤུ་ཁིརིས་གཤགས་པ་གེ་ གསོན་པོ་ཨ་ཉི་ སྐུ་བཞེངས་གནང་ཉི་ རོ་ཀི་ ཨ་ཧ་ཚེ་སིང་མ་གནང་མ་གེ་ཏེན་ ཨ་ཧ་རེ་ཆ་ གསོན་པོ་རི་ཝ༌ཅ། 4 དཀོན་མཆོག་གི་ རོ་ཀ་སྲས་སྲས་མོ་བ་ཀ་དེན་གེ་ བྱིན་རླབས་ཆི་ལུ་ ཞིང་ཁམས་ག་ ཐ་ཉི་གནང་མ༌ཅ། ཉི་ཨོ་ཉ་བྱིན་རླབས་ཤོ་ ཧ་ལ་རང་ མ་ཝ་མ་རི༌ལ། ཧ་ལ་རང་ མེ་པ་མ་དི༌ལ། ཉི་ཧ་ལ་རང་ ཡེ་ཉི་མ་དི༌ལ། 5 ན་ཤི་དད་པ་ཨ་ཝ་ཨ་དེན་གེ་ ཐར་པ་མ་ཉོང་པ་སག་པུ་ དཀོན་མཆོག་ག་ སྟོབས་དབང་གི་ ན་ཧ་སྐྱབས་ཨ་ཉི་གནང༌མེ། ཉི་ཨུ་ཉུ་ཤོ་ དུས་ཇུ་ཀ་དག་པ་ཀབ་ཉི་ཤ་ གེན་ཉི་གནང༌མེ། 6 ཨོ་ཐ་ཀོར་གེ་ ན་ཧ་བ་ ཤོ་ནང་ཕེ་ཉི་ཆོའི། གི་ལུ་ཏ་ བར་ཆད་མ་འདྲ་ཝ་ ཨོ་ཕ་ཀབ་ཉི་ ནང་དོག་ཉི་ རེབ་ཀིན་ཐུར་ག་དེན་གེ་ ན་ཧ་བ་ སེམས་ཤི་ལེ་ཨུ་དུ། 7 ཨོ་ཐ་བར་ཆད་བ་ཤོ་ ན་ཧ་དད་པ་ཁེ་པ་ ངོ་མ་གི་ལ་དག་ཉི་ ཁུངས་ཀེ་བེ་དེན་གེ་གི༌ལ། མེ་པ་དི་ལེ་རེ་ཁཱན་ གསེར་ཆང་ ངོ་མ་གི་ལ་དག་ཉི་ ཁུངས་ཀེ་བེ་དེན་གེ་ མི་གི་ཨ་ཉི་ རྒྱུགས་ལཱན༌ཅ། དག་པ་ཀབ་ཉི་ ན་ཧ་དད་པ་ཏ་ གསེར་གེ་བུ་ལག་ཉི་ ཁག་ཆི་ལུ་གི༌ལ། ཨོ་ཉི་ཨ་དེན་གེ་ ན་ཧ་དད་པ་ག་བུ་ རྒྱུགས་ལ་ལེ་ཁེ༌ལེ། ཉི་ཤ་ ཡི་ཤུ་ཁིརིས་ བྱོན་མེ་ནོང་ཀ་ ན་ཤི་བསྟོད་པ་དང་ གཟི་བརྗིད་ ཉི་གུས་ཞབས་ཉོང་པེ་རེ༌བེ། 8 ན་ཧ་མིང་གི་ རོག་མ་མཇལ་བ་གི་ནེ་བུ་ ན་ཤི་ རོག་ཕང༌ཅ། ཉི་ཨོ་མ་གི་ནེ་བུ་ ན་ཤི་ རོག་མཇལ་བེ་མར་ནེ་བུ་ ན་ཤི་ རོ་ཀ་དད་པ་ཨན༌ཅ། ཨོ་ཉི་ཨ་དེན་གེ་ རང་ག་ནོ་ཝང་གི་ཡེག་ནེ་བུ་ ཡེག་པེ་མར་བ་ཨ་ཉི་རང་ ན་ཧ་བ་ གཟི་བརྗིད་ཅན་ག་ ཤོ་ནང་ཕེ་ཉི་ཆོ་ཝ༌ཅ། 9 ཧང་ཡ་དག་ནེ་ལ་ ན་ཧ་སྲོག་གི་ ཐར་པ་ཉོང་ཉི་ ན་ཤི་ རོ་ཀ་ཏཱན་ དད་པ་ཨ་ཝ་ག་ དེན་ཐ་ཁེ་པ་འགྲུབ་ཅ་གི༌ལ། 10 ཨོ་ཐ་ཐར་པ་ག་ཀོར་གེ་ ལུང་བསྟན་པ་བ་ཀི་ མང་པུ་སེ་ལེ་གོད་ཉི་ གནམ་མེད་ས་མེད་ ལ་མ་ཆོ༌ཝ། ཉི་ན་ཧ་དེན་གེ་ཅམ་ཁཱན་ ཐུགས་རྗེ་ག་ཀོར་གེ་ རོག་ཏེ་བ་ཀི་ ལུང་བསྟན་མ་ཆོ༌ཝ། 11 གོ་མ་རང་ ཁིརིས་གནམ་མེད་ས་མེད་ དཀའ་ཝ་ཅཱད་པེ་ཁེ༌ལེ། ཉི་ཤ་ གཟི་བརྗིད་ནང་ཀ་ ནུ་ཕེ་གི་ལ་དག་ཉི་ རོག་ཏེ་བ་ཀ་ནང་ཀ་བཞུགས་ཁཱན་ ཁིརིས་ག་ཐུགས་ཉིད་གི་ རོག་ཏེ་བ་ཀ་ གསུངས་མ་ཀབ་ཉི་ རོག་ཏེ་བ་ཀི་ ཧ་ལ་དང་ ཨོ་ག་ཇུང་མེ་གི་ས་དག་མི་ཉི་ རོག་ཏེ་བ་ ངང་པ་ཆོ་ཝ༌ལ། 12 དཀོན་མཆོག་གི་ ལུང་བསྟན་པ་བ་ཀ་ཏཱན་ རོག་ཏེ་བ་ཀི་ ལུང་བསྟན་ཁཱན་ཁེ་པ་ རོག་ཏེ་བ་ཀ་གང་ཀ་ མ་ཇུང༌མ། དག་པ་ཀབ་ཉི་ ན་ཧ་གང་ཀ་ཤ་ ཇུང་མེ་དག་ཉི་ གེན་གནང་མ༌ལ། ཉི་ཨོམ་ ཨོ་ཐ་འཐེན་ལེག་པུ་ཁེ་པ་ ཞིང་ཁམས་གེ་དོང་ ཀུན་ཏི་ཁཱན་ དམ་པའི་ཐུགས་ཉིད་ག་ སྟོབས་དབང་ག་ཐུང་ཀེ་ཨ་ཉི་ རོག་ཏེ་བ་ཀི་ བཤད་པ་ག་ ན་ཤི་ ན་ཐ་ཝ༌ཅ། ཞིང་ཁམས་ག་འཐེན་པ་བ་ཀི་ཆང་ ཨོ་ཐ་བ་ ཇུང་མ་ག་ གོད་པེ་ག་ སེམས་ཨན༌ཅ༎ དམ་པ་ཨ་ཉི་ཆོའི། 13 ཨོ་ཉི་ཨ་དེན་གེ་ ན་ཧ་སེམས་ཁེ་པ་ རིག་པ་སྒྲིམ་ཉི་ ལའི་ཨ་ལེ་ག་ གྲ་སྒྲིག་ཨ་ཉི་ཆོའི། ཉི་ན་ཤི་ རེ་ཆ་ཐམས་ཅན་རང་ ཐུགས་རྗེ་ག་ཐུང་ཀ་ཀེ་ཤོ། ཉི་ཡི་ཤུ་ཁིརིས་བྱོན་མ་ཀབ་ཉི་ ན་ཤི་ ཨོ་ཐ་ཐུགས་རྗེ་ཉོང༌པེ། 14 ན་ཧ་བ་ཤོ་ རོ་ཀ་སྲས་སྲས་མོ་ གི་ཝ་ཨ་དེན་གེ་ དཀོན་མཆོག་ག་ ཆ་གནས་ཐའི། ཉི་ན་ཤི་ མ་སེ་ལཱན་ཆོ་ལེ་གང་ཀ་ ཨ་ཁཱན་ངན་པ་བ་ ཨ་ཉི་མ་ཆོའི༎ 15 དག་པ་ཀབ་ཉི་ ན་ཧ་བ་ ར་ཉི་གནང་ཁཱན་ཁེ་པ་ དམ་པ་ཆོ་ཝ་པུརུས་ཀིན་ཨ་ཉི་ ན་ཤི་བུ་ ཧང་ཨ་ཝ་ཐུར་ དམ་པ་ཨོ་ཕེ་ཁེ༌ལེ། 16 ཨོ་ཉི་ཨ་དེན་གེ་ གསུང་རབ་གེ་ཤོན་ཅ་ ཇང་ཤོ་ དམ་པ་དཀོན་མཆོག་གི༌ལ། ཉི་ན་ཧ་བ་བུ་ དམ་པ་ཨོ་ཕེ་ཁེ་ལེ་དག༌ཉི། 17 ཏི་ངེ་རང་ ཉེ་རིང་མ་ཆི་ལཱན་ སོ་ངོ་ཐམས་ཅན་ག་ རང་རང་ས་ལའི་དང་ཏུ་ཉི་ ཁྲིམས་ཅཱད་ཉི་གནང་ཁཱན་ དཀོན་མཆོག་ཤོ་ ན་ཧ་ཡབ་གི་ལ་དག་ཉི་ ན་ཤི་ཡེག་ནེ་ལ་ ན་ཧ་བ་ ཨོ་ཐ་འཛམ་གླིང་ག་ ཕིས་ཀ་སོ་ངོ་ཨ་ཉི་ ཆོན་ཅ་དག་མི་ཉི་ དཀོན་མཆོག་གེ་ ཡོང་ཁེ་ཉི་ གུས་ཞབས་ཨ་ལེ་ཁེ༌ལེ། 18 ན་ཤི་ ན་ཧ་ཕ་མ་བ་ཀེ་ ཁུངས་ཧང་རང་མ་ཁཱན་ཚེ་ ཉོང་པ་ཆོ༌ཝ། ཉི་ན་ཧ་ ཨོ་ཐ་ཚེ་ཁེ་པ་ ཤོག་པེ་དེན་གེ་ དངུལ་དང་ གསེར་མ་བིན་ཤི། ཧང་ཡ་དག་ནེ་ལ་ དངུལ་དང་ གསེར་ཤོ་ ཡེ་ཉི་དིན༌ཅ། 19 དག་པ་ཀབ་ཉི་ ན་ཧ་བ་ཤོ་ གནམ་མེད་ས་མེད་ གོང་ཆི་ལུ་ཆོ་ཁཱན་ ཁིརིས་ག་སྐུ་ཁྲག་གི་ཨ་ཉི་ ངོན་ཐཱན་ཤོག་པ་གི༌ལ། ཉི་ཁིརིས་ཤོ་ ཅོན་དང་སྡིག་པ་ ད་སུ་རང་མ་ཁཱན་ ཤི་ཤ་ཀ་ཏོང་གི༌ལ། 20 འཛམ་གླིང་ མ་བཀོད་པེ་གོ་མ་གེ་རང་ དཀོན་མཆོག་གི་ ཁིརིས་སི་ཝ་ཆོ་ཝ༌ལ། དག་པ་ཀབ་ཉི་ ཨོ་ཐ་དུས་ཇུ་ཀ་དག་པ་ཀབ་ཉི་ རོག་ན་ཧ་ཡོར་ཀེ་ བྱོན་མ་གི༌ལ། 21 ཁིརིས་གེ་ཨ་ཉི་ ན་ཤི་ དཀོན་མཆོག་ག་ དད་པ་ཨ་ཝ་གི༌ལ། ཉི་དཀོན་མཆོག་གི་ རོག་གཤགས་པ་གེ་ ལོག་ཉི་བཞེངས་ཐཱན་ གཟི་བརྗིད་ཆི་ལུ་གནང་མ༌ཅ། ཨོ་ཉི་ཨ་དེན་གེ་ ན་ཤི་ དཀོན་མཆོག་ག་ དད་པ་དང་ རེ་ཆ་ཨ་ཝ༌ཅ། 22 ན་ཤི་ དེན་པ་ག་ ཆ་གནས་ཐ་ཝ་ཨ་དེན་གེ་ ན་ཧ་བ་ ཙང་མ་རི་ཝ༌ཅ། ཉི་ཨོམ་ ནའི་ཡུང་ཟི་ནང་ཀ་ ཐུར་གི་ཐུར་ག་ གནམ་མེད་ས་མེད་ སྙིང་རྗེ་ཨ་ཝ་རི་ཝ༌ཅ། དག་པ་ཀབ་ཉི་ ན་ཤི་སྙིང་རྗེ་ཨ་ལ་ཀབ་ཉི་ སེམས་ནང་ཀེ་ཨ་ཉི་རང་ སྙིང་རྗེ་ཨ་ལེ་ཁེ༌ལེ། 23 ཧང་ཡ་དག་ནེ་ལ་ ན་ཧ་བ་ཤོ་ ལོག་ཉི་ཀེ་ཁཱན་བ་གི༌ལ། ན་ཧ་ཚེ་སིང་མ་ཁེ་པ་ ན་ཧ་འཛམ་གླིང་ག་ ཕ་མ་གེ་ ཉོང་པ་མང་གི། ཧང་ཡ་དག་ནེ་ལ་ ན་ཧ་བ་ ཤི་ལ་ཀབ་ཉི་ ན་ཧ་ཕ་མ་གེ་ཉོང་ཁཱན་ ཚེ་ཁེ་པ་ཆུམ༌ཅ། དག་པ་ཀབ་ཉི་ གསོན་པོ་དང་ མ་འགྱུར་བརྟན་པ་ཨ་ཉི་ བཞུགས་ཁཱན་ དཀོན་མཆོག་ག་ གསུང་གེ་ཨ་ཉི་ ཨོ་ཐ་ཚེ་སིང་མ་ཁེ་པ་ ཉོང་པ་ཨ་དེན་གེ་ ཨོ་ཐ་ཚེ་སིང་མ་ཤོ་ མ་འགྱུར་བརྟན་པ་ག་དེན་གེ་གི༌ལ། 24 གསུང་རབ་གེ་བུ་ ཨོ་ཐེན་རང་ཤོན༌ཅ་ སོ་ངོ་བ་ཤོ་ ངོན་ད་བུ་ཤ་གི༌ལ། ཉི་རོག་ཏེ་བ་ཀ་ གཟི་བརྗིད་བུ་ བོ་རང་ག་ མོམ་ནང་ད་བུ་ཤ་གི༌ལ། ངོན་སང་ཅ་ ཉི་མོམ་ནང་ བབ་ཉི་ཇོང༌ཅ། 25 དག་པ་ཀབ་ཉི་ གཙོ་བོ་གི་ གསུངས་ཁཱན་ཁེ་པ་ དུས་ཏ་བུ་རང་བཞུགས་པེ་ དག༌ཉི། ཉི་ཨོ་ཐ་གསུང་ཤོ་ ཨ་ཤི་ ན་ཧ་བཤད་ཁཱན་ འཐེན་ལེག་པུ་གི༌ལ། |