དང་པ་ཡུ་ཧན་ན། 1 - Tshangla New Testament (BSI)

ཚེ་ག་གསུང་།

¹ ཉི་ཨ་ཤི་བཤད་ཁཱན་ཤོ་ གོ་ཙུག་པེ་གང་ཀེ་རང་བཞུགས་ཁཱན་ཚེ་ག་གསུང་ག་ཀོར་གེ་གི༌ལ། ཉི་རོག་ཤོ་ ཨ་ཧ་མིང་གི་ཐོང་ཁཱན་དང་ ན་གི་ཐ་ཁཱན་གི༌ལ། རོག་ཤོ་ ཨ་ཤི་ཐོང་མ་ ཉི་ཨ་ཧ་ག་དང་གི་ཐོ་ཕ།

² ཨོ་ཐ་ཚེ་ཁེ་པ་ ཨ་ཧ་མིང་གི་ ཐོང་མེ་རེ་བ་ རི་ཝ་ཨ་དེན་གེ་ ཨ་ཤི་ཐོང༌མ། ཉི་ཨོམ་ རོག་ཤོ་ མ་འགྱུར་བརྟན་པ་ག་ ཚེ་གི་ལ་དག་ཉི་ ཨ་ཤི་ན་ཧ་ རོ་ཀ་ཀོར་གེ་ཡེག༌ཅ། རོག་ཤོ་ ཡབ་ཀབ་ཉི་བཞུགས་པ་ཆོ༌ཝ། ཉི་ན་ཧ་པོང་ཀ་བྱོན་གནང༌མ།

³ ན་ཤི་ ཨ་ཧ་བ་ཀབ་ཉི་ ཆོས་གྲོགས་ཨ་ལེ་རེ་ཆེན་དག་པ་གི་ ཨའི་ཏེན་ག་མིང་གི་ཐོང་ཁཱན་དང་ ན་གི་ཐ་ཁཱན་ག་ཀོར་གེ་ ཨ་ཤི་ན་ཧ་ཡེག་ཅ་གི༌ལ། ཉི་ཨ་ཧ་ཆོས་གྲོགས་ཤོ་ ཡབ་དང་རོ་ཀ་སྲས་ ཡི་ཤུ་ཁིརིས་ཀབ་ཉི་གི༌ལ།

⁴ ཨ་ཧ་བ་ ལག་ཏང་ ཤོ་ནང་ཕེན་ཆེན་དག་པ་གི་ ཨ་ཤི་ ཨོ་ཐ་ཡི་གུ་ ན་ཧ་ཏཱན་འབྲི་ཅ་གི༌ལ༎

འོད་ཟེར་གེ་དང་ཤོ།

⁵ ཨུ་ཐུ་ཤོ་ ཨ་ཤི་ རོ་ཀེ་ན་ཐ་ཁཱན་གསུང་གི༌ལ། ཉི་ཨ་ཤི་ ན་ཧ་ཏཱན་ཡེག་ཅ་ ཨ་ཤི་ན་ཐ་ཁཱན་གསུང་ཤོ་ ཧང་གི་ལ་ཡ་དག་ནེ་ལ་ དཀོན་མཆོག་ཤོ་ འོད་ཟེར་གི༌ལ། ཉི་རོ་ཀ་ནང་ཀ་མེར་བུ་ ཏི་ངེ་རང་མཱན༌ཅ།

⁶ ཨོ་ཉི་ཨ་དེན་གེ་ ཨ་ཤི་མེར་བུ་ནང་ཀེ་རང་དང་ཐཱན་ རོག་ཀབ་ཉི་ ཆོས་གྲོགས་ཨན་ཅ་དག་ཉི་ ཡེག་ནེ་ལ་ ཨ་ཤི་སོ་ད་ཕི་ཉི་ དེན་པ་ནང་ཀ་ མ་ཆོན་ཅ་གི༌ལ།

⁷ དག་པ་ཀབ་ཉི་ རོག་འོད་ཟེར་ནང་ཀ་ བཞུགས་པ་པུརུས་ཀིན་ཨ་ཉི་ ཨ་ཧ་བ་བུ་ འོད་ཟེར་ནང་ཀ་ཆོ་ནེ་ལ་ ཉི་ཤ་ ཨ་ཧ་བ་ཐུར་དང་ཐུར་ཀབ་ཉི་ ཆོས་གྲོགས་ཨན་ཅ་གི༌ལ། ཉི་རོ་ཀ་སྲས་ ཡི་ཤུ་ག་སྐུ་ཁྲག་གི་ ཨ་ཧ་བ་ སྡིག་པ་ཐམས་ཅན་གེ་ དག་ཉི་གནང༌ཅ།

⁸ ཨ་ཧ་བ་ཤོ་ སྡིག་པ་མ་ཁཱན་ སོ་ངོ་གི་ལ་དག་ཉི་ཡེག་ནེ་ལ་ ཨ་ཤི་ རང་ཏེན་ག་ མགུ་སྐོར་ཕིན་ཅ་གི༌ལ། ཉི་དེན་པ་ཁེ་པ་ ཨ་ཧ་བ་ཀབ་ཉི་མང་ཕ།

⁹ དག་པ་ཀབ་ཉི་ ཨ་ཤི་ ཨ་ཧ་སྡིག་པ་ག་ ཁ་དོག་ནེ་ལ་ རོག་ཤོ་ དམ་ཚིག་ཙུང་ཁཱན་དང་ ཐྲང་ཉི་གནང་ཁཱན་ གི་ཝ་ཨ་དེན་གེ་ རོ་ཀི་ཨ་ཧ་སྡིག་པ་ ཐམས་ཅན་རང་ བཤགས་པ་གནང༌མེ། ཉི་དྲང་པུ་མ་ཁཱན་ ཐམས་ཅན་གེ་ ཨ་ཧ་བ་ ཙང་མ་ཅོད་ཉི་གནང༌མེ།

¹⁰ ཉི་ཨ་ཤི་ སྡིག་པ་ཨ་ཝ་མཱན་ཅ་དག་ཉི་ ཡེག་ནེ་ལ་ ཨ་ཤི་ དཀོན་མཆོག་ཤོ་ སོ་ད་ཕི་ཁཱན་གི་ལ་དག་ཉི་ ཙིན་ཅ་གི༌ལ། ཉི་ཨ་ཧ་ཚེ་ག་ རོ་ཀ་གསུང་མང་ཕ།