MAKTUB DO PAUL TOI CA TIT 1 - Kebu go dore go herua 1978

Waigi do Paul toi

¹ Na ’enung Paul, go gié go Kumu koi, dang paja go gié go Jésu Krist koi bu’. Kumu bung gié ca jégené kalang ga bo cindi ga ddi ba pargé, ca ké sela gelé guana go cindi dang henga ga lo ga Kumu kai bu’,

² ca ké tugoia jomé goang cindegé go bera kuddum, Kumu go yo kual go poi ’eno bering na, ddi dor kebu ca jomé goang cin lé tumu din basé ddi debé delinya dé.

³ Kiddin ga kiddin ba bbal na, Kumu gel kual goi a duro Nô do Ddari do ddi ba bungang na, ca ’enung dura ca so goi go Minyena koi.

⁴ ’Enung pasu maktub lé kua gusin ji kurandang go cindi Tit, go a duro bo cindi go nang nai. Dda Ba Kumu dang Jésu Krist go Minyana, ké lain waiang jalua juam.

Gié go Tit koi a Krét

⁵ ’Enung ddein a Krét ca kual go ba ji na, ji nyanai si kerab, ji si gemdong ga gelé yaué go Kumu koi a duro gulong go gumu goni goni mam. Ji ’erem ca géjé go ’enung ba géjeinyang nai.

⁶ Dda kema go gelé yaué go Kumu koi na, ddi jima kema go basé kual go wané cai, na gad ddi jima barua goang tama pena mera bua, karndia ga bo cindi gang hendé do ddari basé lo gendei dang térin ’eno bu’.

⁷ Cawa gumu go gelé yaué go Kumu koi go lo gié go Kumu koi na, ddo ddi jomang kual cai ’eno bua, ddi jomé kema go pedé gusi ’eno bua, kema go lo mainyé kala cai ’eno bua, ddi jomé kema go pedé gusi ’eno bua, kema go lo mainyé kala ’eno bua, go koié dang céré ’eno bua, go togé gusuang kalang ’eno bua, ddo ddi lo tabelang ca wo cageda do laré toi do isini ’eno bu’.

⁸ Na gad ddi jima kema go bogé kergé bua, go kederei ’ya henga ga ddari bua, go ’yomé gusi ddar bua, go geddang bua, go arin carara bua, go nari gusi ca wané doni doni mam bu’.

⁹ Na gad ddi ’ima kual go gelé go geddang osu dang dang main ké ba geliang kain, ca ddi bbala géjé kalang kané ca kual go gelé go cindi lé bua, ca naré kalang ga mainyé kual lé bu’.

¹⁰ Cawa kalang ga gaué wo kené combu ga kaié kalang dang kual go kalin yag, a duroigé na ga Juib na combia ddo.

¹¹ Na gad ji lebu kebegé, cawa ké belé kalang combu dang gulong gogé mam toigé dang gelé gogé go poi, ca ké waié cageda do laré toi do isini.

¹² Kema go cogelé kebu go Kumu koi go pena a ca gesong ga Krét yé wa: Kalang ga Krét na, ka kalang ga poi waindo waindo bua, ka kalang ga isindong ga bbojo bua, ga daberong bua, ga do belem bu’.

¹³ Kual go ddi ba yei lé na, na kual go cindi, na ca ma ji bberajagang dono ca ké jimang bo cindi go geddang.

¹⁴ Ddo ké kobé lingé do ga Juib togé, dang so go kalang kogé go kaié kalang a duro kual go cindi ’eno.

¹⁵ Henga mam na arin carara a cin kalang ga arin carara, ama kalang ga ddisin dang ga bo cindi ’eno na, henga ga arin carara wo ’eno cindegé, cawa ’eremé gogé dang kual duro ddaindigé na ddisin bu’.

¹⁶ Ké yé wa ka sol Kumu, ama gié goga kaindi, ka henga ga doré kel bua, ka kalang ga gaué bua, ké bbala ca lo gié go ddari ’eno bu’.