Mika 1 - La Bible en Otetela (Bible K'Ekila) 1991

Delu lu Dikambi Dia Samariya la Jerusalema

¹ Biui dia Latuyalaka diakayi le Mika, usi Moreshete, lu nshi ya Jotamaa ya Ahaza, ndu ya Hezekiya, khumi ya dikanga ya Juda. Ndi akenyi akambu wahatayi lu dikambu dia Samariya la Jerusalema.

² Nyuiungi, nyu antu tshe. Kete la kene tshe keli loko uyuhukami. Khumadiondjo, Latuyalaka ayali omenyi. Lu dikambu dianyu uma lʼetemwelo kandi kʼekila.

³ Nyendi, Latuyalaka lu ndjayi lu dihuli diandi. Ndi ayuhulo, ayokendakenda lʼahuli wa ladiku wa la kete.

⁴ Ekungu wayolelo la tshina diandi, Ndu ekidi Wayutate elonge. Uku elungu lasuki la dja, Uku ashi mbambuwutshulula lʼehulula.

⁵ Akambu ane tshe wambuyala ne dia uhedia wa Jakoba, Ndu ne dia kolo ka khumbu ka Isariyele. Na uhedia wa Jakoba? Aha Samariya? Na ahuli wa ladiku wa Juda? Aha Jerusalema?

⁶ Diako mbayumete Samariya uku tuta dia lʼekambo, Ndu uku ahuli watuwuneka ekodi wa vinyo. Dimi layutshulula ave wʼuma loko lʼukidi; Layukununadia atshina awe

⁷ Difanelu diawo dia losela tshe diayatshatshema betshi betshi. Afutu awo tshe wayutshumbama lu dja. Vo wakasanganyema uku tshindu dia umuntu kanga luseka. Vo wayukadimo tshindu ntu le umuntu kanga luseka.

⁸ Ne dia dikambu ne mbayumulela, mbayumuda ekuku. Dimi layukulula ahondo, layokendakenda utakataka. Dimi layawana uku mbulu, layukhuma akhumu uku kumbaka.

⁹ Puta yandi nayuyukuka nkono. Dikambu so diambukuma pulu ndu la Juda. Dio diambukuma lu eotwelo ka wudja ami, Pulu ndu la Jerusalema.

¹⁰ Tanyutaki dikambu diako lu Ngata, Tanyulelaki nduku yema. Dimi lambungito lu ditshu la Bete-Leafara.

¹¹ Eti utakataka ndu la sonyi, we ludjashi la Shafiri! Nyu wane wudjashi la Zamana, tanyutumbaki; Tuku ta Bete-Ezele tanyusike emalelu kawo.

¹² Usi Marota ambukunga akambu wʼololo lʼukiyanu, Ne dia elanyelu kakahuto uma le Latuyalaka, Pulu ndu lʼeotwelo ka Jerusalema.

¹³ We usi Lakishi, ukeleki pusupusu. Lu falasa katudjaka luwangu. We Lakishi kaki etatelu ka kolo ka ona umuntu a Siona, Ne dia ehedia wa Isariyele wakashwama lʼatei aye.

¹⁴ Diako mbayuyukimo etenyi ka ushasha. Wʼalakanelu le Moreshete-Ngata. Khumbu ya Akizibe yayuyala diango dia lukesu La khumi ya dikanga ya Isariyele.

¹⁵ We usi Maresha, dimi layukela one layukulela. Lutumbu la Isariyele layukuma pulu ndu la Adulama.

¹⁶ Unya divu diaye, Utshiki diketo lu dikambu dia ana watuyulangaka. Okokole diketo diaye uku pungu, Ne dia vo wambumo la le ye, Wambutsho etali lu fumbi.