Titu 1 - Takwane

Madhu oolojela

^1-4 Wa we Titu, mwaana aaga-aaga vowi nili a nroromelo nimohive. Di miyo Pawulo, mwiimeleli a Mulugu, murumiwi a Yesu Kirixtu. Girumiwe wi gunnuwihe nroromelo na ale esakuliwe ni Mulugu, gaasuuzihege ebaribari wi aliwa yeeddege mwa mukalelo onafuna Mulugu. Ndo aliwa eneere, ojejihedha moohaanganyedha wi aliwa eneerege okalawoove. Malabo ehinakalewo Mulugu ahiroromeliha wi athu aaye yeerege okalawoove, Mulugu kanaratha, naari. Mudhidhi wasakuliiye, ahooneyiha madhu aaye odheela mwa dhoolaleya dhaaga. Ala bi mabasa gisakuleliwiimi moolamuleliwa ni Mulugu, Mvulumusi eehu. Titu, Mulugu Baba ni Yesu Kirixtu Mvulumusi eehu yuuvahe mahala ni murenddele mmurimani mwaawo.

Osakuliwa wa asogoleli

⁵ Guhuuhiya eliga ya oKereta wi osasanyedhe mwapama dhili dhoohaleela teto waasakule asogoleli a gerezha dha maluwa maatene wona muuxagiheliimi.

⁶ Musogoleli akale muthu oohukanna yoosumululiwana. Akale mulobwana a mwihiyana mmohi, anaaye ekale aKirixtu, ehikale owiinkedhiwa ni meeddelo abure, naari oohiiwelela.

⁷ Vowi soofuneya wi musogoleli winna omwiinya wa mabasa a Mulugu, ahikalegena yoosumululiwana. Ahikalege owiithukulela, ahikalege owaaguva otakaleliwa, ahikale namang'wa, ahikale namaddwadha, ahikale oofuna oreela moohufwaneelela.

⁸ Mbwenye musogoleli akale muthu oowawaakela aleddo, oodhiveliwa opama, oowaraala, owogoowa, oomudidela Mulugu, owiihiiha.

⁹ Teto oliye akale oohiddeela madhu oororomeleya mooligana musuuziheliwiiwa wi aandege waalibiha akwaaye ni masuuziho a ebaribari teto wi aavaanyege ale enapokiha mutheenga.

Anamavuhulela ooratha

¹⁰ Vowi ehikalawo ajinji enapokiha, enawoga dhoohufwaneelela, enaanyengetha akwiiwa, tthabwa-tthabwa ayene enarumeedha ofuneya wa dhowiineliwa.

¹¹ Enofuneya wi aliwa ekale oomaalihiwa, vowi enonoonga emudhi yaatene, esuuzihaga dhego dhoohufwaneelela, yiiragana ndo eharagamo korowa.

¹² Namavuhulela eewa-eewa mmohi ahiiraga: <>.

¹³ Onamoona ola bwa ebaribari. Mowindo waasumululege mohaahiyedhedha wi ekale ooliba munroromeloni,

¹⁴ ehivuruwanege dhilemeelelo dha aZhudewu, ehivuruwanege malamulo a alobwana enaholowa ehiyaga ebaribari.

¹⁵ Wa athu apama, dhaatedhene sapama. Mbwenye wa athu abure, ehinaroromela, kavili yapama. Owodha weewa woodidela yapama ni yabure ohubwanyuliwa.

¹⁶ Ala enowoga wi ehimunona Mulugu mbwenye enomukoodda ni meerelo eewa. Aliwa boweeddiha murima, oohiiwelela, kinna owodha wowiirana mabasa apama.