AEfeso 1 - Takwane

Madhu oolojela

¹ Wa oweela mirima enakala oEfeso, nyo oororomela mwa Yesu Kirixtu. Di miyo Pawulo, oosakuliwa a Mulugu wi gikale murumiwi a Yesu Kirixtu.

² Mulugu Babiihu ni Nabwiya Yesu Kirixtu yuuvaheni mahala ni murenddele mmirimani mweenyu.

Mareeliho mwa Kirixtu

³ Athithimihiwe Mulugu, oli Mulugu ni Baabi a Nabwiya eehu Yesu Kirixtu, oyene onireelihe ni mareeliho maatene enakamihedha mineba dheehu, mwiipaddi dha odhulu, mwaha wi nili vamohi mwa Kirixtu.

⁴ Mulugu ahiirana ela mwaha wi ahinidhivela, onisakula elabo ehinasasanyiwe wi nooniwe wona oweela mirima ni oohukalana yoothega.

⁵ Vanthomiliiye hiyo okala anaaye mwa Yesu Kirixtu, aharihaga odhiveliwa waaye, ofuna waaye:

⁶ oliye ahiirana ela wi oonihe nthithimiho na mahala aaye voonivaha ebeweene Mwaanaye amudhiveliiye.

⁷ Mwa Mwaana ola, nihikanna wooboliwa ni mwazi waaye, oleveleliwa dhoothega dheehu. Mulugu onowooniha wunnuwa wa mahala aaye.

⁸ Mulugu ohukuthulela mahala ala wa hiyo ni tthottho ni ononelamo waatewene.

⁹ Ohunivuhulela dhamaruweliiye dha ofuna waaye. Ahimaruwela wiirana nda mwa Kirixtu.

¹⁰ Moomaruwela waaye, mudhidhiya wafiya, onotugumanya mwa Kirixtu dhego dhaatedhene, dhego dha odhulu ni dha elabo ya vati.

¹¹ Mulugu ohunisakula teto hiyo, aZhudewu wi nikale athu aaye. Oliye ahiirana nda mwaha wi ahimaruwela wiirana mooligana ni ofuna waaye,

¹² wi hiyo, aZhudewu, owambeela ojejihedha mwa Kirixtu, nimutamaalege Mulugu, mwaha wowunnuwa waaye.

¹³ Mwa Kirixtu, nyoovo mugeewile madhu eli ebaribari, (Muselu Wapama wa ovulumusiwa weenyu,) varumeedhiliinyu mwa oliye, muhuheliwa etoonyihedho yoohuthima ya Muneba Woweela waroromelihiwe.

¹⁴ Vowi Mulugu ohunivaha Muneba Woweela, nnokalana ebaribari wi oneere onivaha mareeliho yaniroromelihiiye. Nda dhinaapadduwe mudhidhi oyene Mulugu vinawooboliiye athu aaye.

Ovahedha mahala ni malobelo

¹⁵ Mwaha wa dhaatedhene Mulugu dhiiriliiye, mwaha wowiiwa nroromelo neenyu mwa Nabwiya Yesu, vowiiwa wi munowaadhivela athu aatene a Mulugu,

¹⁶ kaginahiya omutthettheela Mulugu mwaha wa nyoovo, wuwuubuwelelani mmalobeloni mwaaga.

¹⁷ Miyo ginolobela wi Mulugu a Nabwiya eehu Yesu Kirixtu, Baabi anthithimiho, oovaheni muneba wa tthottho ni wa ovuhulela wi mwaande omunona oliye.

¹⁸ Miyo ginolobela teto wi Mulugu afugule meento a mirima dheenyu wi munone mareeliho aaye yoororomelihiiyeni vowiithaniliiyeni. Ginolobela wi munone dhooreela dha nthithimiho dhinaroromelihiiye waavaha oweela mirima,

¹⁹ munone wunnuwa wa owodha waaye. Oliye onolabiha owodha wula mwa okamihedha wa ale enaroromela. Wula owodha wuulubale

²⁰ Mulugu woonihiliiye vamvenyihiliiye Kirixtu wa athu ookwa, ahimukaraatiha moono waaye wooja mwiipaddi dha odhulu.

²¹ Oliye oli vadhulu va anamathonga aatene a odhulu, vadhulu va oolamula, vadhulu va oowodha ni akopolo apama naari abure. Ndina naaye nnowaakwaranya mandina maatene, kahuwo wa mudhidhi olenave, mbwenye teto mudhidhi dhaatedhene dhedho dhinadha.

²² Mulugu <>, wi akale musogoleli a dhedho wi akale muru wa gerezha.

²³ Gerezha oli mwiili waaye. Oliye dinavaha gerezha owodha waatewene ni odhaaliha dhego dhaatedhene.