परकासन 1 - बुक्सा

यहून्‍ना कै परमेसर को दरसन मिलनो

¹ जौ ईसु मसी को परकासन है, जौ बाकै परमेसर नै इसताँई दओ कै अपने सेवकौ कै बे बात दिखाऐ, जो जल्दी होनै बारी हैं, ईसु मसी नै अपने सुरगदूत कै भेजकै जा परकासन को गियान अपने सेवक यहून्‍ना कै बताओ,

² जिसनै परमेसर के बचन और ईसु मसी की गभाई दई, यानी उन सिगरी बातौं की जो बानै देखीं।

³ धन्‍न है बौ जो इस भबिसबानी के बचनौ कै पढ़कै सुनावै है, और धन्‍न हैं बे जो सुनै हैं और जामै लिखी भई बातौं कै मानै हैं, कैसेकै बौ टैम धौंरे आ गओ है।

बिसवासिऔ की मंडलिऔ के ताँई यहून्‍ना को सन्‍देसो

⁴ यहून्‍ना की ओर सै एसिया की उन सात बिसवासिऔ की मंडलिऔ के ताँई लिखौ हौं। उस परमेसर की ओर सै जो है और जो हो और जो आनै बारो है, और उन सात आत्‍माऔ की ओर सै जो बाके सिंगासन के सामने हैं; तुमकै किरपा और सान्‍ति मिलती रैह।

⁵ ईसु मसी की ओर सै जो बिसवासजोग गभाई, मरे भएऔं मै सै पैलो जी उठनै बारो और धरती के राजाऔं को राजा है, तुमकै किरपा और सान्‍ति मिलती रैह। बौ जो हम सै पियार रक्‍खै है, और बानै अपने खून के दुआरा हमरे पापौं सै हमकै छुड़ाओ है।

⁶ उसनै हमकै अपने पिता परमेसर के ताँई राज और पुजारिऔं को समू बनाओ, उसई की महिमा और पराकरम युगौं-युगौं तक रैह। ऐंसोई होए।

⁷ देखौ, बौ बादरौं के संग आनै बारो है, और हर एक आँख बाकै देखैगी पर जिनौनै बाके सरीर मै भालो घौंपो हो, बे बी बाकै देखंगे और धरती के सिगरे गोत बाके बजै सै छाती पीटंगे। हाँ! ऐंसोई होए।

⁸ परभु परमेसर, जो है और जो हो और जो आनै बारो है, जो सरब सकतिमान है, जौ कैबै है, “मैंई सुरूआत और अन्‍त हौं।”

यहून्‍ना कै मसी को दरसन

⁹ मैं यहून्‍ना, जो तुमरो भईया और ईसु मै दुख सैहनै और राज और धीरज मै तुमरो संगी साती हौं, परमेसर के बचन और ईसु की गभाई के कारन पतमुस नाम के टापू मै हो।

¹⁰ मैं परभु के दिन आत्‍मा मै आ गओ और मैंनै अपने पीछे तुरही जैसी ऊँची अबाज मै जौ कैते भए सुनो,

¹¹ “जो कुछ तू देखै है बाकै किताब मै लिखकै और बाकै इफिसुस, इसमुरना, पिरगमुन, थूआतीरा, सरदीस, फिलादेलफिया और लौदीकिया, इन सातौं जघै की बिसवासिऔ की मंडलिऔ कै भेज दे।”

¹² तब मैंनै उसकै, जो मैंसै बोल रओ हो, देखनै के ताँई अपनो मौह फेरो, और पीछे घूम कै मैंनै सौने के सात आरे देखे,

¹³ और उन आरौं के बीच मै आदमी के लौंड़ा के जैसो एक आदमी देखो, जो पाँऐ तक को लत्‍ता पैहरे, और छाती मै सौने को पट्‍टा बांधे भए हो।

¹⁴ बाकी खोपड़ी और बाके बार ऊन या बरप के हाँई सपेद हे और बाकी आँख आग की लपटौं के जैसी हीं।

¹⁵ बाके पाँऐ ऐंसे चमकदार पीतर जैसे हे जैसे भट्‍टी मै तपाकै चमकाए गए हौं। और अबाज बेसानी पानी के के हाँई ही।

¹⁶ बौ अपने खाने हात मै सात तारे लेए भए हो, और बाके मौह की सकति सै तेज दोधारी तरवार लिकर रई ही और बाको मौह दूफैरीया के सूरज के जैसे चमक रओ हो।

¹⁷ जब मैंनै बौ देखो तौ मरे भए के जैसे मैं बाके पाँऐऔं मै गिर पड़ो। तब बानै अपनो खानो हात मेरे ऊपर रक्‍खो और कैई, “मत डर; मैंई पैलो, और आखरी हौं।

¹⁸ मैं जिन्‍दो हौं, मैं मर गओ हो, और अब देख मैं युगौं युग जिन्‍दो हौं। मौत और अधलोक की कूंची मेरेई धौंरे हैं।

¹⁹ इसताँई जो बात तैनै देखी हैं और जो बात हो रई हैं और जो बात इसके बाद होनै बारी हैं उन सबकै लिख ले।

²⁰ उन सात तारौं को, जो तैनै मेरे खाने हात मै देखे हे और उन सात सौने के आरौं को भेद, जौ है कै बे सात तारे सातौं बिसवासिऔ की मंडलिऔ के सुरगदूत हैं, और बे सात आरे सात बिसवासिऔ की मंडली हैं।”