रोमियों 16 - राना थारु नयाँ नियमबहिनीया फिबीके अभिबादन 1 मए चाँहत हओ कि तुम सब जनै हमर बिश्वासी बहिनीया फिबीके सम्मान करओ, जो किंक्रिया सहरमे भओ मण्डलीक सेबिका हए। 2 परमेश्वरके आदमी एकदुस्रेनके स्वगात करो कता तुम बोके प्रभुमे स्वागत करओ और बोके तुमर द्वारा चाँहन बारो मदत करओ। काहेकी बो अपनए, बहुत आदमीनके और मोके फिर मदत करीहए। रोम देश बारे पबित्र आदमीनके नमस्कार 3 येशू ख्रीष्टको काम करत पेती मेरे सँग काम करन बारे प्रिस्किला और बोक लोगा अकिलासके मिर नमस्कार हए। 4 बे मेरे ज्यानके बचानके ताहीं अपनो ज्यान खतरामे डारी रहएं, और महीँ इकल्लो नाए, बल्कि गैर-यहूदीनको सबए मण्डली फिर उनके धन्यबाद देतहए। 5 और बो मण्डलीनके फिर नमस्कार, जो उनके घरमे इकट्ठा होत हए। मिर प्यारो इपेनितसके, जो एशिया परदेशके ख्रीष्टमे बिश्वास करन बारो पहिलो आदमी रहए, मिर नमस्कार हए। 6 तुमर ताहीं बहुत मेहेनत करन बारी मरियमके मिर नमस्कार हए। 7 भइया एन्ड्रोनिकस और बहिनीया युनियस जो मेरे यहूदी सँगी हएं, और मेरे सँग कैदी रहएं और ख्रीष्टसे चुनेभए चेला द्वारा बे बहुत सम्मानित हएं, और मए बिश्वासी बननसे पहिले बे बिश्वासी बने गए रहएं, उनके मिर नमस्कार हए। 8 एम्प्लीआतस, प्रभुमे मिर प्यारोके नमस्कार हए। 9 उर्बानस, ख्रीष्टमे हमर सँगए-सँग काम करन बारो, और मिर प्यारो सँगी स्ताखुसके नमस्कार हए। 10 अपेल्लेसके, जो जा स्पष्ट करीहए, कि बो ख्रीष्ट प्रति कित्नो इमान्दार हए, बोके फिर नमस्कार हए। अरिस्तोबुलसको परिवारके नमस्कार हए। 11 मेरे सँगी यहूदी हेरोदियनके नमस्कार हए। नर्किसको परिवारके जो प्रभुमे बिश्वासी हएं, उनके नमस्कार हए। 12 बहिनीया त्रुफेना और त्रोफोसाके, जो प्रभुमे मेहेनत करत हएं, उनके नमस्कार हए। प्यारी बहिनीया परसीसके, जो प्रभुमे बहुत मेहेनत करी, बोके नमस्कार हए। 13 रुफसके, जो प्रभुको सेवाके ताहीं खास सेवक होनके ताहीं परमेश्वर द्वारा चुनो भओ हए, और बोकी अइयाके, जो मेरे ताहीं फिर एक अइया कता हए, बे दुनौके नमस्कार हए। 14 असिंक्रितस, फ्लेगन, हर्मेस, पत्रोबास, हर्मास, और उनके सँग भए बिश्वासी ददाभइयनके नमस्कार हए। 15 फिलोलोगास, युलिया, नेरियस और बोकी बहिनीया, और ओलिम्पास और बिनके सँग भए सबए पबित्र आदमीनके नमस्कार हए। 16 एकदुस्रेके ख्रीष्टके प्रेममे नमस्कार करओ: तुमए ख्रीष्टके सबए मण्डलीनके तरफसे नमस्कार हए। आखिरी सल्लहा 17 अब हे मेरे ददाभइयओ, मए तुमसे बिन्ती करत हओं, कि बे आदमी जो लडाइ करबात हएं, और जो आदमीनके गलत बातमे बिश्वास कारनके लागत हएं जो तुमर सिखो भओ शिक्षाके बिरुद्धमे हए, उनसे साबधान रहाओ, और उनसे दुर रहाओ। 18 काहेकी अइसे आदमी हमर प्रभु येशू ख्रीष्टके नाए हएं पर अपने सरीरिक इच्छाके ताहीं सेवा करत हएं। और मिठी-मिठो शब्द और अच्छी बात करके निर्दोष आदमीनके धोखा देत हएं। अइसियए बे निर्दोष आदमीनके धोखा देत हएं। 19 हर कोइ जानत हए, कि तुम कित्तो अच्छेसे प्रभुको आज्ञा मानत हओ; जहेमारे मए तुमर बारेमे आनन्द करत हओं; पर मए चाँहत हओं, कि जो असल हए बाके ताहीं तुम बुद्धिमान होबओ, और जो खराब हए बामे निर्दोष रहाबओ। 20 शान्तिको परमेश्वर शैतानके नाश करदेबैगो और बोके तुमर अधिनमे करदेबैगो। हमर प्रभु येशू ख्रीष्टको अनुग्रह तुमर सँग रहातए रहाबए। पावलके सँगीनके नमस्कार 21 मेरे सँग काम करन बारो तिमोथी, और मिर नतेदार लुकियस, यासोन और सोसिपात्रो जो मेरे सँगी यहूदी आदमी हएं, बे तुमके नमस्कार पठाइ हएं। 22 मए, तर्तियस जो पावलके ताहीं जा चिट्ठी लिखरहो हओं, मए अपन घेनसे नमस्कार पठाएरहो हओं। मए फिर प्रभुको एक चेला हओं। 23 गायस फिर तुमके अपनो नमस्कार पठाइ हए। मए बोको घरमे रहात हओं जहाँ मण्डली इकट्ठा होत हए। इरास्तस, जो सहरके ताहीं रुपैयाके मामलाके देखत हए, और हमर भइया क्वार्टस तुमके नमस्कार पठाइ हए। 24 मए प्राथना करत हओं, कि हमर प्रभु ख्रीष्टको अनुग्रह तुमर सँग रहातए रहाबए। आमेन। आशिर्बाद 25 अब उनके, जौन तुमके मिर परचार करन बारो अच्छो समाचार और येशू ख्रीष्टके बारेमे परचार करे अनुसार तुमके बिश्वासमे मजबुत करन सिकैगो, बो रहस्यको प्रकाश बमोजिम, जो युग-युगसे गुप्तमे रहए। 26 पर अब अनन्तको परमेश्वरको आज्ञाके अनुसार अगमबक्ताके लिखेभए पबित्र-शास्त्र द्वारा प्रकट करोगओ हए और परचार करोगओ हए जा हेतुसे, कि सबए जाति बिश्वास करएं और आज्ञापालन करएं। 27 और सर्वज्ञानी परमेश्वरके, येशू ख्रीष्टद्वारा सदादीन महिमा होत रहाबए। आमेन। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation