प्रकाश 8 - राना थारु नयाँ नियम

सातौँ मोहर और सोनोको धुप

¹ जब थुमा सातौँ मोहर खोली, तओ बे सब जो स्वर्गमे रहएं, आधो घण्टाके ताहीं शान्त हुइगए।

² और मए बे सात स्वर्गदूतनके देखो जो परमेश्वरके अग्गु ठाणे रहात हएं, और उन्हएं सात तुरही दओगओ।

³ हुवाँसे, एक औ स्वर्गदूत आओ और धुपको बेदीके ठिन ठाणीगओ। बो स्वर्गदूत धुप जलानके ताहीं सोनोसे बनो भओ कटोराके लैके आओ, और बोके सब आदमीको प्राथनाके सहित जलानके ताहीं बहुत जद्धा धुप दओगओ। तओ बो धुप और आदमीनको प्राथना, परमेश्वरके सिंहासनके अग्गु सोनोको बेदीके उपर जलाए दइ रहए।

⁴ स्वर्गदूतके द्वारा जलाओगओ धुपसे निक्रन बाली धुवाँ परमेश्वरके पबित्र आदमीनके प्राथनाके सँग उपर परमेश्वरके अग्गु पुगो।

⁵ तओ फिर स्वर्गदूत धुपौरो लैके बेदीके उपरसे पजरत अंग्रासे भरदइ, और पृथ्वीमे फेँकदइ और सिंहासनसे बिजुली, अबाज और हलाचाला आओ।

तुरही

⁶ और बे सात तुरही होन बारे सातौ स्वर्गदूत तुरही फुँकन तयार भए।

⁷ पहिलो स्वर्गदूत अपन तुरही फुँकी, और तुरन्त खुनसे मिलिभइ बहुत पत्थर बारो मेहे और आगी पृथ्वीमे गिरे, और जाके कारण पृथ्वीको तिस्रो भाग जलिगओ; और औ रुखाके तेस्रो भाग जलिगए और सबए हरे जंगलके तिस्रे भाग जलिगए।

⁸ तओ फिर दुस्रो स्वर्गदूत अपन तुरही फुँकी, और अइसो कुछ जोकी एक बडो पज्रनडटो पहाड कता दिखात रहए, बो समुन्दरमे गिरिगओ; और जाके कारण, समुन्दरको तिस्रो भाग खुन हुइगओ।

⁹ समुन्दरमे रहान बारे तिस्रे भागके सब जिन्दा प्राणी मारीगए। और समुन्दरके पानीजहाजको तिस्रो भाग फिर नष्ट हुइगए।

¹⁰ तिस्रो स्वर्गदूत अपन तुरही फुँकी; और जाके कारण, बादरसे पजरत ऊँका कता पज्रनडटो एक बडो तारा गिरो। और नदीयाके तिस्रो भागमे और ताजा पानीके मुहानमे गरिगओ।

¹¹ बो ताराको नाउँ “ऐरेलु” हए। और जाके कारण, बो सारा पानी जहाँ जा गिरो, सबए करुवाइगओ, और बहुत आदमी मरिगए।

¹² चौथो स्वर्गदूत अपन तुरही फुँकी, और जाके कारण, सूर्यको तिस्रो भाग, और जोनीको तिस्रो भाग और ताराको तिस्रो भागमे नुक्सान हुइगओ, हियाँतककी तारनको तिस्रो भाग अन्धियारो हुइगओ और सूर्यको तिस्रो भागमे उजियारो नाए रहो, और उइसीयए रातको तिस्रो भागमे अन्धियारो हुइगओ।

¹³ जब मए फिरसे देखो, तओ बादरमे एक चिल्हरियाके बहुत उपर उणत और उँचो अबाजसे अइसे कहात सुनो, “बे दुष्ट आदमीनके परमेश्वर दण्ड देहए जो पृथ्वीमे रहात हएं, काहेकी जब बाँकी रहेभए तीन स्वर्गदूतके उनके दओगओ तुरहीके फुँकंगे, तओ संसारमे सब आदमीनमे आन बारो बिपत्ति एकदम डर लागन बारो हुइहए।”