प्रकाश 6 - राना थारु नयाँ नियम

मोहरको रहस्य

¹ फिर मए देखो, कि थुमा बे सात मोहर मैसे एकके खोली; और मए चार जिन्दा प्राणीन मैसे एकके बुलात सुनो। बोको अबाज गर्जन कता तेज रहए। बो कही, “अब जा, अग्गु बढ।”

² तओ मए एक सेतो घोडा देखो, और बोमे चढन बारे आदमी धनुस लए रहएं: और बोके एक मुकुट दओगओ, और बो स्वर्गसे बाहिर पृथ्वीमे चलो आओ, बहे कता जो पहिलीएसे जितिगओ हए, और फिरसे जीत जाबैगो।

³ तओ फिर थुमा दुस्रो मोहरके खोली, तओ मए दुस्रो जिन्दा प्राणीके जा कहात सुनो, “अब जा, अग्गु बढ।”

⁴ और एक चम्कन बारो लाल घोडा बो ठिहासे बाहिर निकरके आओ, जहाँ सिंहासन धरो रहए। परमेश्वर घोडा उपर चढन बारेनके पृथ्वीमे आदमीनको एकदुस्रेसे लडबानको शक्ति दइ, ताकी बे युद्धमे एकदुस्रेके मार डारएं। जा उदेश्यके ताहीं परमेश्वर घोडामे चढन बारेके एक बडी तरबार फिर दइ।

⁵ जब थुमा तिस्रो मोहर खोली, तओ मए तिस्रो जिन्दा प्राणीके जा कहात सुनो, “अब जा, अग्गु बढ।” और तओ मए देखो, कि एक कारो घोडा आओ; और बोमे बैठन बारोके हातमे एक तख्री रहए।

⁶ मए सुनो, कि बे चार जिन्दा प्राणीनके बीचसे कोइ मस्कत रहए, जो एक आदमी कता रहए: “भबिष्यमे पृथ्वीमे एक दिन अकाल होइगो और जहेमारे एक दिनको देहाणी सिरफ एक किलो गेहुँ या सिरफ तीन किलो जव इकल्लो किननके ताहीं पुगैगो। पर जैतूनको तेल और अंगुरको रसाको कमी नाए होबैगो।”

⁷ और जब थुमा चौथो मोहर खोली, तओ मए चौथो जिन्दा प्राणीके जा कहात सुनो, “अब जा, अग्गु बढ।”

⁸ तओ मए एक पेरो घोडा देखो; और घोडामे सवार करन बारेनके मृत्यु कहोजात रहए और पाताल फिर जाके पिच्छु लागो रहए। और उन्हएं पृथ्वीमे रहान बारे हर चार आदमी मैसे एकके मारनको अधिकार प्राप्त भओ। बे उन्हएं तरबारसे मारडारीं, बे उन्हएं भुखसे मारडारीं, बे उन्हएं खराब-खराब बिमारीनसे मारडारीं, और बे उन्हएं जंगली जानबरसे फिर मर्बाए डारीं।

⁹ जब थुमा पाँचौँ मोहर खोली, तओ बेदी तरे मए बिनको आत्मनके देखो जौननके मारडारी रहए काहेकी बे परमेश्वरके बचनके प्रति और बहे सन्देशके प्रति बिश्वासयोग्य रहएं, जो उनके मिलो रहए।

¹⁰ और बे अइसे कहिके जोडसे चिल्लात परमेश्वरसे कहीं, “हे सर्बशक्तिमान पबित्र और सत्य प्रभु; तुम पृथ्वीमे रहान बारे बे बुरे आदमीनके दण्ड देनमे इत्ना लम्बो आसरा काहे करत हओ? हम बिन्ती करत हएं कि तुम बे आदमीनको खुनको बदला लेए जौन हमएं मारडारीं।”

¹¹ उन मैसे सबएके सेतो लत्ता दओगओ। और परमेश्वर उनसे कही, “अभएके ताहीं अराम करओ, काहेकी अभौफिर तुमर कुछ सहकर्मी और बिश्वासी ददाभइया हएं जौननके तुमही कता मारडारे जएहएं। जब मारेजान बारेनकी संख्या पुरी हुइजएहए, तब्ही इकल्लो मए बदला लेमंगो।”

¹² और जब मए छैठौँ मोहरके खोलत देखो, तओ एक बडो हालाचाला आओ; और सूर्यको रंग कारो कमरा कता कारो रंगमे बदलीगओ और पुरो जोनीको रंग खुन कता लाल हुइगओ।

¹³ तारा, बादरसे पृथ्वीमे अइसे गिरपणे जैसे जोडसे आँधी आत हए तओ अञ्‍जीरको पेणसे कच्चो फरा गिरजात हएं।

¹⁴ बादर बो खलरीको चिट्ठी कता गाइब हुइगओ, जोके लपेट दओगओ होए। और सब पहाड और समुन्दर मैके सब टापू अपनो ठिहा बदलदइं।

¹⁵ परिमाण स्वरूप, पृथ्वीसे सब आदमी, जौनमे राजा, सासक, सेनापति, धनी, अधिकारी, हर एक कमैया और जो आदमी गुलामी नाए करत हएं और औ सबए आदमी पहाडके गुफा और चट्टानमे लुकिगए;

¹⁶ और पहाड और चट्टानसे कहान लागे, “हमर उपर गिरजा और हमए रक्षा कर ताकी बा जो सिंहासनमे बैठो हए, हमके देख नाए पाबए और थुमा हमके दण्ड नाए दइपाबए।

¹⁷ काहेकी बो भयानक दिन आइगओ हए जब परमेश्वर और थुमा सबके दण्ड देबैगो, और कोइ फिर जा दण्डसे बचनाए पाबैगो।”