प्रकाश 3 - राना थारु नयाँ नियम

सार्डिस सहरको मण्डली

¹ येशू मोसे अइसेफिर कही, “सार्डिस सहरके मण्डलीके स्वर्गदूतके जा सन्देश लिख: मए बहे हओं जौन अपनो हातमे सात तारा पक्णे हओं और जौन परमेश्वरको सात आत्माके बाहिर पठातहए। बा अइसे कहान डटो हए: मोके पता हए, कि तए कैसो कडा मेहेनत करत हए। तए मोके बिश्वास करो कता करत हए पर खासमे तए नेहात्तओक तए मिर अनुसरण नाए करत हए।

² जहेमारे जगो रहो, मोएमे तिर बिश्वासके मजबुत बना, ताकी जा सब पुरा रुपमे खतम नाए होए, काहेकी तिर कुछ बिश्वास बाँकी हए। मोके पता हए, कि तए सिद्ध नाए हए काहेकी तए जो करनडटो हए बोसे परमेश्वर खुसी नाए हए।

³ तए पहिले सुनो भओ और बिश्वास करोभओ शिक्षाके याद कर। तोके जो सिखाओ गओ रहए बोके पालन कर, तेरो गलत कामसे पाप करन छोडके परमेश्वर घेन घुम। अगर तए गलत काम करन नाए छोडो कहेसे, मिर आगमन एक चुट्टा कता इक्बरी हुइहए, और तोके बो बेरा फिर पता नाए हुइहए, कि जब मए तोके सजाए देन आमंगो।

⁴ पर तेरे बीचमे सार्डिस सहरमे कुछ आदमी हएं, जौन पापसे अशुद्ध नाएभए हएं, बे मेरे सँग शुद्ध सेतो कुर्ता लगाएके नेँगङ्गे, काहेकी बे लायकके हएं।

⁵ जौन आदमी बुराइके हराए देबैगो, बे सेतो कुर्ता पैँधंगे। मए बो आदमीको नाउँ जीबनको किताबसे नाए मिटएहओं जोमे अनन्त जीबन पाओभओ आदमीनको नाउँ लिखो हए। पर मए, मिर दौवा और बाको सेवा करन बारे स्वर्गदूतके अग्गु ठाणङगो और मए घोषणा करंगो, कि बे मेरे हएं।

⁶ जो तुम सुनत हओ, बो सुनीभइ बातके बारेमे ध्यानसे सोँचओ, कि पबित्र आत्मा मण्डलीनसे का कहात हए।”

फिलाडेल्फिया सहरको मण्डली

⁷ येशू मोसे जा फिर कही, “फिलाडेल्फिया सहरके मण्डलीके स्वर्गदूतके जा सन्देश लिख: मए बहे हओं जो पबित्र और सत्य हए, जोके सँग राजा दाऊदको चाभी हए, जब मए बो चभीसे ढोका खोलंगो, बोके कोइ फिर बन्द नाए कर्पएहए और जब मए चाभीसे बन्द करंगो बोके कोइ फिर नाए खोल पएहए। जो मए तोसे कहात हओं बोके सुन:

⁸ मोके पता हए तए कैसो कडा मेहेनत करत हए। मोए पता हए, कि तेरे सँग थोरीए शक्ति हए, तहुँफिर मए तोसे कहीभइ बात तए पालन करो हए। तए मोएमे लगातार बिश्वास करेपणे हए, जहेमारे मए तेरे ताहीं एक ढोका खोलंगो जोके कोइ फिर बन्द नाए कर्पएहए।

⁹ बे आदमी जौन शैतानको एक समुहके सदस्य हएं, बे दाबी करत हएं कि बे यहूदी हएं पर बे सच्चे यहूदी नाए हएं और बे ठगरहे हएं। मए अइसो करंगो, कि बे आएके तेरे चरणमे पणके ढोगंगे। और मए तोके प्रेम करत हओं कहान बारी बात बे पता पामंगे।

¹⁰ तए मेरे सन्देशके पालन करो ताकी जब तए दुख उठाबए तओ बोके धैर्य साथ सहिपाबए। जहेमारे, मए तोके बडी परीक्षाके समयमे रक्षा करंगो। परीक्षाको जा समय संसारके सब आदमीनमे आबैगो।

¹¹ मए जल्दी आएरहो हओं। बहेमारे तोके मोएमे मजबुत हुइके बिश्वास करे रहान पणैगो, ताकी कोइ तेरो जितको इनामके पानेसे रोकनाए पाबए, जो एक मुकुट कता हए।

¹² जौन आदमी बुराइके हराए देबैगो, बे परमेश्वरके बे महापबित्र ठाउँके खम्बा कता होमंगे, जौनको मए सेवा करत हओं और बे जाके कब्ही नाए छोडंगे। मए हुवाँ बक शरीरमे परमेश्वरको नाउँ लिखंगो। और परमेश्वरको सहरको नाउँ लिखंगो जौनके स्वर्गको यरूशलेम कहोजात हए। जा बो सहर हए, जो स्वर्गसे, अर्थात्, मिर परमेश्वरसे तरे आत हए। मए हुवाँ बक् शरीरमे मिर नयाँ नाउँ फिर लिखंगो।

¹³ तुम जो सुनत हओ, बो सुनीभइ बातमे ध्यानसे सोँचओ, कि पबित्र आत्मा मण्डलीनसे का कहात हए।”

लाउडिकिया सहरके मण्डली

¹⁴ येशू मोसे जा फिर कही, “लाउडिकिया सहरके मण्डलीके स्वर्गदूतके जा सन्देश लिख: मए बहे हओं जौनके आमेन कहोजात हए, काहेकी मए बिश्वासयोग्य हओं और मेरे द्वारा परमेश्वरके बारेमे कहीभइ सब बात सत्य हएं। जो कुछ फिर बा सृष्टि करीहए मए बे सबको स्रोत हओं। जो मए तोसे कहात हओं बोके सुन:

¹⁵ मोके पता हए तए कैसो कडा मेहेनत करत हए, तए बहे पानी कता हए जो नए तत्तो नए ठन्डो हए। मए चाँहत हओं, कि अगर तए मेरे पिच्छु नेँगैगो कहेसे, नेहात्तओक नेँग, अगर नाए निँगेहए कहेसे पिच्छु मतलग।

¹⁶ काहेकी तए पानी कता हए जो नए तत्तो हए नए ठन्डो हए, तभीमारे मए तोके इन्कार करनके तयार हओं।

¹⁷ तए कहात हए, ‘मए धनी हओं और मिर सँग बहुत धनसम्पति हए। मोके चाहन बारी सब चीज मेरे सँग हए।’ पर सच्चो जा हए, कि तए अन्धरा कता हए, तए खासमे कैसो हए कहान बारी बात तोके पता नाए हए। तोके दयाको जरुरत हए, काहेकी तए गरीब हए, जाको मतलब तोके बिश्वासको जरुरत हए। तए फिर बहे आदमी कता हए जोके सँग लत्ता नाए होत हए।

¹⁸ तभीमारे, मए तोके सल्लाहा देहओं, कि आगीसे शुद्ध भओ सोनो मोसे खरिद, ताकी तए नेहात्तओ धनी बनपाबए। तोके अपनए लगान ताहीं सेतो लत्ता फिर किनन पणैगो, जौनके कारण तेरे सँग लता होबए और तए सरममे नाए पडए। और तोके तेरे आँखीमे लगानके ताहीं कुछ मलम फिर किनन पणैगो, ताकी तए देख पाबए।

¹⁹ जौनके मए प्रेम करत हओं, उनके मए सिखात हओं, और दण्ड देत हओं। ताकी बे अच्छे बनपामएं। जहेमारे सही काम करनके ताहीं उत्साहित हो, और पाप करन छोडके परमेश्वर घेन घुम।

²⁰ सुन, तेरे हृदयमे घुसनके ताहीं मए घरके बहेर ठाणके और फाटक ढकढकान बारो आदमी कता हओं। अगर तए मिर अबाज सुनके अपनो हृदय खोलदेहए कहेसे मए भितर आमंगो और हम एकदुस्रेन सँग सबए मिल्के संगती करंगे।

²¹ जौन आदमी बुराइके हराए देबैगो, बे मेरे सँग मेरे सिंहासनमे बैठंगे जैसे मए जितो और मिर दौवा सँग बाको सिंहासनमे बैठो हओं।

²² तुम जो सुन्त हओ, बो सुनीभइ बातके बारेमे ध्यानसे सोँचओ, कि पबित्र आत्मा मण्डलीनसे का कहात हए।”