प्रकाश 21 - राना थारु नयाँ नियमनयाँ स्वर्ग और नयाँ पृथ्वी 1 तओ मए नयाँ स्वर्ग और नयाँ पृथ्वी देखो, काहेकी पुरानो बादर और पुरानो पृथ्वी अब नाए रहए। और अब समुन्दर फिर रहियएनाए। 2 मए पबित्र सहरके फिर देखो, जोकी स्वर्गको यरूशलेम रहए, जो सहर परमेश्वरके ठिनसे स्वर्ग मैसे तरे आत रहए। बो सहरके एक दुल्हीन कता तयार करोगओ रहए, जौनके लत्ता पैँधाओगओ रहए और सिंगार करोगओ रहए और जो दुलहासे बेहा करनके ताहीं तयार हए। 3 तओ मए परमेश्वरको सिंहासनसे बडो स्वरसे मस्कनडटो एक अबाज सुनो, “देखओ, अबसे परमेश्वर मानब जातिनके अपनो बासस्थान बनाबैगो। और बे बाके प्रजा होमंगे और बा अपनए बिनके अपने आदमीनके रुपमे स्वीकार करैगो और बे फिर बाके अपनो परमेश्वरके रुपमे स्वीकार करंगे। 4 और परमेश्वर उनकी आँखीसे सब आँसु पोँछ देहए, और बे फिरसे कभु नाए मरङगे। कोइ फिर कभु दुख महसुस नाए करंगे और नए रोमंगे और नए पिडा अनुभव करंगे, काहेकी पुरानो संसार अब नाए हए।” 5 सिंहासनमे बिराजमान होन बारो मोसे कही, “देख, मए सब बात नयाँ बनामंगो।” बा अइसेफिर कही, “जा लिख, जो मए कहात हओं बोमे तए बिश्वास कर सकत हए। जे बात सत्य हएं और नेहात्तओ होमंगी।” 6 बा मोसे कही, “अब सब खतम हुइगओ। महीँ हओं जौन सब चिजनको सुरुवात करो, और महीँ हओं जो सब चीजके खतम करंगो, सुरु और अन्त महीँ हओं। जोकोइ फिर प्यासो हए, बोके मए बहे पानीको भकभकासे सेँतएमे पानी पिइनके देमंगो जौन कभी फिर नाश नाए होन बारो जीबन देतहए। 7 जौन आदमी बुराइके हराए देतहए, बो मोसे जे आशिष पामंगे, और मए बिनको परमेश्वर होमंगो, और बे मिर लौंणा होमंगे। 8 पर जोकोइ मिर उपर बिश्वास नाए करत हए, उनके पज्रत आगीमे और गन्धकमे फेँकदओ जाबैगो, जोकी दुस्री मृत्यु हए। और जहे हालत उनको फिर होबैगो, जौन आदमीनके अग्गु मोके स्वीकार करनसे डरात हएं, खराब काम करत हएं, जो हत्या करत हएं, व्यभिचार करत हएं, जादु करत हएं, और मूर्तिनको पुजा करत हएं या ठगत हएं।” थुमाके दुल्हीन 9 और फिर बे सात स्वर्गदूत मैसे एक जनै, जौन आदमीनके उपर सात अन्तिम बिपत्ति भरेभए सात कटोरा अख्नाइ रहएं, उन मैसे एक आएके मोसे बात करी और अइसे कही, “आ, मए तोके दुलहीन दिखामंगो जौननको जल्दीए थुमासे बेहा होबैगो।” नयाँ यरूशलेम 10 और परमेश्वरको आत्माको शक्तिके माध्यमसे स्वर्गदूत मोके एक बडो उँचो पहाडमे लैगओ। और स्वर्गदूत मोके पबित्र स्वर्गको यरूशलेम दिखाइ, बो स्वर्गसे परमेश्वरके घेनसे तरे आनडटो रहए। 11 बो सहर परमेश्वरको महिमासे चम्कनडटो रहए। और बोको चमक जास्पर कहान बारो बहुमुल्य पत्थर कता रहए और बो सिसा कता सफा रहए। 12 बो सहरके आसपिस एक बहुत बडो और उँचो दिबाल रहए, और बोमे बाह्र फाटक रहएं और बे हर फाटकमे एक-एक स्वर्गदूत लख्बारी करत रहएं, और बो फाटकमे इस्राएल देशके बाह्र कुलके नाउँ लिखे रहएं। 13 सहरको चारौ तरफ तीन-तीन फाटक रहएं: अगार तीन, पछार तीन, सिरे तीन और दक्खिन तीन। 14 बे, सहरको दिबाल बणे-बणे बाह्र पत्थरके उपर बनाए रहएं। और हर एक पत्थरमे थुमाको बाह्र चुनेभए चेलन मैसे एक-एकको नाउँ लिखो रहए। 15 बो स्वर्गदूत, जौन मोसे बात करनडटो रहए बोके सँग सहर और बोको फाटक और दिबाल नापनके एक सोनोको नापन बारो लग्घा रहए। 16 बो सहरके चार एकन कोनो रहएं और चारौ कोनो बरोबर रहए। स्वर्गदूत अपनो नापन बारो लग्घासे सहरके नापी: जाको लम्बाई दुई हजार चार सओ किलिमिटर रहए। और चौडाइ-उचाई जाको लम्बाई बरोबर रहए। 17 जाके पिच्छु स्वर्गदूत दिबालको उचाई नापी। बो जाके उइसीयए नापी जैसे आदमी चिजनके नापत हएं। दिबाल पैसठ्ठी मिटर उँचो रहए। 18 बो सहर निख्रो भओ सोनोसे बनोगओ रहए, जो सिसा कता चम्कत रहए। और जाको दिबाल बहुमुल्य पत्थरसे बनोगओ रहए, जोके यास्पर कहोजात हए। 19 दिबालके जग बहुत मेलके बहुमूल्य रत्नसे सम्हारोगओ रहए। पहिलो जग बहुमुल्य पत्थर बिल्लौरको, दुस्रो नीर, तिस्रो हरित गहना, चौथो पन्ना, 20 पाँचौँ आनिक्स, छैठौँ लालमणि, सातौँ पीतमणि, आठौँ बेरूज, नवौँ पुष्पराज, दशौँ लसुने, एघारौँ नीलमणि, बाह्रौँ कटेलाको रहए। 21 बाहिरको फाटक फिर एक-एक मोतीसे बनो रहए और सहरको डगर निख्रो भओ सोनो कता बनाओ गओ रहए, जो सिसा कता चम्कत रहए। नयाँ यरूशलेमको महिमा 22 मए कोइ मन्दिर नाएदेखो काहेकी सर्बशक्तिमान परमेश्वर और थुमा बो सहरमे हएं। जहेमारे हुवाँ मन्दिरको कोइ जरुरत नाए हए। 23 हुवाँ सूर्य और जोनीको चमकको जरुरी नाए हए। काहेकी बो सहर परमेश्वर और थुमाको महिमामय दियासे चम्को हए। 24 बो सहरमे भओ उजियारो, संसारमे बैठन बारे जति-जातिके आदमीनके उजियारो देतहए और पृथ्वीके सबए राजा अपनो-अपनो सम्पति बो सहरमे लामंगे। 25 बो सहरके फाटक दिनभर खुले राहात हएं। बो कभी फिर बन्द नाए होतहए, काहेकी हुवाँ कभी फिर रात नाए होत हए। 26 जाति-जातिके आदमी संसारमे भए सबए सुथ्रे चिजनके और संसारके आदमीनको सम्पति बो सहरमे लामंगे। 27 पर जोकुछ फोहर रहए या बे आदमी जो अशुद्ध काम, घिनौनो काम करत हएं या जो ठगत हएं, उन्हएं नेहात्तओ जामे घुसनके ताहीं अनुमति नाए रहए। जामे घुसन बारे आदमी बे हएं, जौनको नाउँ थुमाको जीबनको किताबमे लिखो रहए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation