प्रकाश 16 - राना थारु नयाँ नियम

परमेश्वरके क्रोधके सात कटोरा

¹ तओपिछु मए मन्दिर मैसे एक बडो अबाज सुनो, जौन सात स्वर्गदूतनसे कही, “जाओ, संसारके आदमीनमे परमेश्वरके तरफको बो सजाय अख्नाओ जो सात कटोरामे हएं।”

पहिलो कटोरा

² जहेमारे पहिलो स्वर्गदूत कटोरामे भओ चीज पृथ्वीमे अख्नाइ, और डर लागन बारो और पिरान बारो दुखौनो बे आदमीनमे दिखाइ पणो, जोमे बो राक्षस अपनो छाप लगाए रहए। और बे आदमीनमे दिखाइ पणो, जौन बोको मूर्तिकी आराधना करी रहएं।

दुस्रो कटोरा

³ दुस्रो स्वर्गदूत अपनो कटोरामे भओ चीज समुन्दरमे अख्नाइ, और तुरन्त समुन्दरमे एक मरो भओ आदमीको खुन कता हुइगओ और जहेमारे, समुन्दरमे रहान बारे सब कुछ मरिगए।

तिस्रो कटोरा

⁴ तिस्रो स्वर्गदूत अपनो कटोरामे भओ चीज नदिया और पानीको भकभकामे अख्नाइ, और बे खुनए-खुन हुइगए।

⁵ तओ मए बो स्वर्गदूतके अइसे कहात सुनो, जौनके पुरो रुपमे पानीमे अधिकार रहए, बो परमेश्वरसे कही, “हे पबित्र परमेश्वर, जो समयकी सुरुवातसे लैके अबतक और हमेसा नाए बद्लत हओ, तुमर दओगओ सजाय ठिक हए।

⁶ काहेकी बे तुमर आदमीनके और अगमबक्तनके मारी रहएं और बिनको खुन बहाइ रहएं, जहेमारे अब तुम बिनके खुन पिनके दए, जा बिनके ताहीं इनामके रुपमे ठिक हए।”

⁷ फिरसे मए बेदीसे कोइके मस्कत सुनो, “हाँ, सर्बशक्तिमान परमप्रभु परमेश्वर, नेहात्तओ तुमर आदमीनको सजाय देन बारो तरिका ठिक और सत्य हए।”

चौथो कटोरा

⁸ चौथो स्वर्गदूत कटोरामे भओ चीज सूर्य उपर अख्नाइ, और अब सूर्यके आदमीनके जलान बारो शक्ति दओगओ।

⁹ आदमी जा तेज गर्मिसे जरिगए, और बे परमेश्वरके बदनाम करीं, काहेकी बाके इकल्लो बो बिपत्तीके उपर अधिकार दओगओ रहए। तहुँफिर बे पाप करन छोडके परमेश्वर घेन नाए घुमीं, और अभौफिर बे परमेश्वरके महिमा देन इन्कार करीं।

पाँचौँ कटोरा

¹⁰ पाँचौँ स्वर्गदूत अपनो कटोरामे भओ चीज राक्षसको सिंहासनमे अख्नाइ और बोको सिंहासनमे अन्धकार छैगओ। और आदमी बो बडो दुखके कारण अपने-अपने जिभ चबान लागे।

¹¹ बिनको दुख और घाओ-खटिराके कारणसे बे स्वर्गको परमेश्वरके बदनाम करीं। पर उनको अवस्था अइसो होएसे फिर बे पाप करन छोडके परमेश्वर घेन नाए घुमीं। और बे जो गलत काम करत रहएं, बे कामके करन नाए छोडीं।

छैठौँ कटोरा

¹² तओ छैठौँ स्वर्गदूत अपन कटोरामे भओ चीज महानदिया यूफ्रेटिसमे अख्नाइ, जोके कारण नदियाको पानी सुखगओ और जाके कारण अगारसे आन बारो राजा अपने सेनाके लैके नदीयाके बोपार नाँघपाइ।

¹³ जाके पिच्छु मए तीन भुत देखो जो मुण्का कता दिखात रहएं। एक अजिंगरके मुँहुँसे बाहेर आओ, एक पहिलो राक्षसको मुँहुँसे बाहिर आओ, एक दुस्रो राक्षसको मुँहुँसे बाहिर आओ, अर्थात् बो जो झुठो सन्देश दइ रहए।

¹⁴ तीन भुतके सँग अचम्मो काम करन क्षमता रहए और बे जा संसारके सब देशमे शासन करन बारेनके जमा करीं, ताकी बे सर्बशक्तिमान प्रभु परमेश्वरको महान दिनमे बाके बिरुद्धमे लणाइ लणन जाए पामएं।

^15-16 दुष्ट आत्मा सासकनके और उनको फौजनके बहे ठिहामे इकट्ठा करी जौनके हिब्रू भाषामे आर-मागेड्डोन कहोजात हए। जहेमारे प्रभु येशू कही, “जा बात सुन, मिर आगमन एक चुट्टा कता इक्बरी हुइहए। बो आदमी धन्यको हए, जो मिर आगमनके बेरामे जग्तए रहात हए, और अपनो कपडा तयार करे रहात हए। अगर बे अइसे करहएं, तओ बे नङ्गा नाए होमंगे और कोइ फिर उनके सरममे नाए करैगो, चहुँ बे बाहिर बहुत आदमीनके बीचमे चले जाएं।”

सातौँ कटोरा

¹⁷ सातौँ स्वर्गदूत अपनो कटोरामे भओ चीज हबामे अख्नाइ, और हुवाँ स्वर्गको मन्दिरमे कोइ रहए जो परमेश्वरको सिंहासनसे जोडसे बोली, “मए सब चीज पुरा करदओ हओं।”

¹⁸ तओ बिजुली चम्को, बादर तड्को भओ जोडको अबाज आओ और डरौनो हालाचाला आओ। इतनो बडो हालाचाला, कि पृथ्वीमे आदमीनको सृष्टिसे हबएतक कभीनाए भओ रहए।

¹⁹ बेबिलोनको बडो सहर तीन भागमे अलग हुइगओ, और जाति-जातिके आदमीनको सहर नष्ट भए। काहेकी परमेश्वर बो पुरा करी, जौनके बा बेबिलोनके आदमीनके दण्ड देनके बारेमे प्रतिज्ञा करी रहए। जाके परमेश्वरके तरफसे बडो दण्ड दओ जाबैगो। जा अइसियए होबैगो, जैसे बे बिना पानी मिलाओ भओ दारु पिलैहएं। जौनके परमेश्वर अपनए बो कटोरासे अख्नाइ हए, जो बाको क्रोधके जनात हए।

²⁰ बो बेरा, समुन्दरके सब टापू अचानक गाइब हुइगए और पहाड गाइब हुइगए।

²¹ मेँहेमे बादरसे आन बारे बणे-बणे पत्थर आदमीनके उपर गिरे, सबए पत्थरको बजन लगभग पचास-पचास किलोके रहएं। जहे कारण बे परमेश्वरको अपमान करीं, काहेकी बिनके परमेश्वरको पठाओ भओ बिपत्तिसे बहुत दुख सहान पणो।