प्रकाश 15 - राना थारु नयाँ नियम

सात स्वर्गदूत और सात बिपत्ति

¹ तओपिच्छु मए बादरमे भओ चमत्कार चिन्हा देखो, जोकी बहुत अचम्मो और बहुत डरौनो रहए। हुवाँ सात स्वर्गदूत रहएं, जो सात अलग-अलग मेलके बिपत्ति लए रहएं। बे बिपत्ति अन्तिम हएं, काहेकी जब बे खतम हुइजामंगी, तओ परमेश्वरको क्रोध अन्त हुइ जाबैगो।

² तओ मए कुछ देखो, जो समुन्दर कता दिखात रहए, जो फुलको बर्तन कता चम्कनडटो रहए और बोमे आगी फिर मिलो रहए। मए बे आदमीनके फिर देखो, जो राक्षससे जिते रहएं। बे राक्षसको और बोको मूर्तिको आराधना नाए करी रहएं, और उनमे राक्षसको नाउँको संख्याको छाप नाए लगाओगओ रहए। हुवाँ बे, बो समुन्दर किनारे ठाणे रहएं, और बे सब एक बिणा पक्णे रहएं जो परमेश्वर उन्हएं दइ रहए।

³ बे परमेश्वरको दास मोशाको गीत गात रहएं जो थुमाके बारेमे गीत हए, “हे सर्बशक्तिमान परमप्रभु परमेश्वर तुम जो करे, बो काम महान और अचम्मोके हएं, तुम सब देशके राजा हओ, तुम जो करत हओ सब ठिक और सत्य हएं।

⁴ हे परमप्रभु, तुमके सब आदमी आदर करत हएं, और बे सब तुमर नाउँके सम्मान करत हएं, काहेकी तुमही इकल्ले पबित्र परमेश्वर हओ। हर राज्यके सब जाति तुमर ठिन आत हएं और बे तुमर आराधना करत हएं, काहेकी तुमर धार्मिक काम सबके अच्छेसे पता हए।”

⁵ जब जे आदमी गीत गएडारीं, तओ मए देखो, कि स्वर्गमे मन्दिर खुलो रहए, जोकी तम्भु जैसो हए।

⁶ और अन्तिम सात पिपत्ति बोकन बारे सात स्वर्गदूत बो मन्दिरसे बाहिर आए। बे चम्कन बारो सेतो लत्ता लगाए रहएं, और बे छातीके आसपिस सोनेको पेटी लगाए रहएं।

⁷ और फिर चार जिन्दा प्राणीन मैसे एक प्राणी हर एक स्वर्गदूतके, परमेश्वरके घेनसे जो हमेसा जीवित हए, क्रोधसे भरो भओ एक-एक सोनोको कटोरा दइ।

⁸ मन्दिर, परमेश्वरको महिमा और बाको शक्तिसे आन बारो धुवाँसे भरो रहए। तबतक कोइ मन्दिरमे जाए नाएपाइं जबतककी बे सात बिपत्ति खतम नाएभए, जौनके सात स्वर्गदूत लाइ रहएं।