प्रकाश 13 - राना थारु नयाँ नियम

समुन्दर मैसे निक्रो भओ राक्षस

¹ मए एक राक्षसके समुन्दर मैसे निक्रत देखो, जौनके सात मुण और दश सिंग रहएं। और बक हर सिंगमे एक मुकुट रहए और बक हर मुणमे परमेश्वरके बिरुद्धमे बदनामको नाउँ रहएं।

² जो राक्षस मए देखो, बो चितर कता रहए; और बक पाउँ भलुवा कता और मुँहुँ बघटा कता रहए। अजिंगर जा राक्षसके अपनी शक्ति दइ और बोके पृथ्वीमे राज्य करनको अधिकार दइदइ।

³ बो राक्षसके मुणन मैसे एक मुणमे गम्भीर दुखौनोको निसान रहए, जौनके कारण बोके मृत्यु लान सकत रहए। पर जा दुखौनो ठिक हुइगओ रहए। जहेमारे, पृथ्वीके सब आदमी अचम्मो मानिगए और राक्षसको अनुसरण करन लग्गए।

⁴ और बे बो राक्षसके आराधना करन लग्गए, और कहान लागे, “बो राक्षस कता औ कौन हए? और कौन बोके सँग लडाइ करपएहए?” और आदमी बो अजिंगरके फिर पुजा करन सुरु करदइं, काहेकी बो जा राक्षसके अपनो अधिकार दइदइ रहए।

⁵ राक्षसके अपने बारेमे घमण्डको बात करनको अधिकार प्राप्त भओ और अइसियए राक्षस परमेश्वरके बदनाम करी। बोके बयालीस महिनातक काम करनको अधिकार प्राप्त भओ।

⁶ और राक्षस परमेश्वरके बदनाम करन सुरु करी, बो बाके नाउँके बिरुद्ध, और बो ठिहाके बिरुद्ध मस्की जहाँ परमेश्वर रहात हए अर्थात् स्वर्गके। और बे सब आदमीनके बिरुद्ध मस्की, जो स्वर्गमे रहात हएं।

⁷ राक्षसके अपने बारेमे घमण्डको बात करनको अधिकार दओगओ, ताकी पबित्र आदमीनसे लडए, और उन्हएं हराए देबए। और बोके संसारके हर जाति, कुल, राष्ट्र और भाषाके आदमीनमे अधिकार दओगओ।

⁸ पृथ्वीमे रहान बारे सब आदमी बोके आराधना करन लागे। सिरफ बेहीं आदमी बक आराधना नाए करीं जौननको नाउँ संसारके सृष्टि करोजानसे पहिलिएसे जीबनको किताबमे लिखोगओ रहए। जा जीबनको किताब बहे थुमाको पुस्तक हए जोके बलिदानके रुपमे मारोगओ रहए।

⁹ जौनको कान हए बो सुनए।

¹⁰ जौन आदमीनके जेलमे डारो जानके ताहीं फैसला हए, बे पक्कए फिर जेलमे डारे जामंगे, और अन्य आदमीनके ताहीं तरबारसे मारो जानके ताहीं फैसला हए, बे पक्कए फिर मारे जामंगे। जहेमारे नेहात्तओ, कि परमेश्वरके आदमी बे कठिनाइके सहाएं जौननको बे अनुभव करत हएं और बे बिश्वास करनमे पक्के हएं।

पृथ्वीसे आओ भओ राक्षस

¹¹ फिर मए एक और राक्षसके पृथ्वी मैसे निक्रत देखो, बोके भेंणा कता दुई सिंग रहएं; पर जब बो मस्की तओ बक अबाज अजिंगर हानी रहए।

¹² जा दुस्रो राक्षस बो पहिलो राक्षसको सब अधिकारको इस्तमाल करत रहए। दुस्रो राक्षस पृथ्वी और जामे रहान बारेनसे बो पहिलो राक्षसको आराधना करबात रहए, जौनको दुखौनोको निसान ठिक हुइगओ रहए।

¹³ और दुस्रो राक्षस बडो और शक्तिशाली चमत्कारको चिन्हा दिखाइ, और आदमी बो चमत्कारके देखत पेती स्वर्गसे आगी पृथ्वीमे गिरो।

¹⁴ पहिलो राक्षसको शक्तिसे अचम्मोके काम करेके कारणसे बहुत आदमी दुस्रो राक्षससे प्रभाबित भए और धोखा पाइं। दुस्रो राक्षसके द्वारा आदमीनसे कहोगओ, कि बे पहिलो राक्षसको पुजा करनके ताहीं एक मूर्ति बनामएं, जो हथियारसे अध्मरा हुइगओ रहए, पर फिरसे अच्छो हुइगओ रहए।

¹⁵ दुस्रो राक्षसके परमेश्वरके द्वारा पहिलो राक्षसको मूर्तिके बनाएके बोके जिन्दा करनको अनुमति दओगओ रहए, ताकी राक्षसको मूर्ति बोल पाबए। और बे आदमीनके मरबाए डारए, जो बो राक्षसको मूर्तिके आराधना नाए करत हएं।

¹⁶ दुस्रो राक्षस साधारण या खास, धनी या गरीब, कमैया या जो कमैया नाए हए सबए आदमीनके पहिलो राक्षसको नाउँ दाहिना हात या उनको माथोमे छाप लगानके ताहीं जबरजत्ती करी।

¹⁷ सिरफ बेहीं जौनमे जा छाप रहए बेहीं कुछ किन या बेँचपात रहएं। बो छाप पहिलो राक्षसको नाउँ रहए या बोको नाउँके दर्सान बारो एक संख्या रहए।

¹⁸ जा छाप बुझनके ताहीं तुम्हएं बुद्धिको जरुरत हए, पर जौनके सँग बुद्धि हए बोके जा राक्षसको संख्याको अर्थ का हए कहिके पता लगाए पएहए। काहेकी जा एक आदमीको नाउँ हए। जा संख्या छय सओ छयसठ्ठी हए।