प्रकाश 11 - राना थारु नयाँ नियम

दुई साक्षी

¹ तओपिच्छु मोके नापनके ताहीं एक लट्ठी दओगओ और परमेश्वर मोसे कही, “उठ, जा और मेरे महापबित्र ठाउँ और बेदीको नाप ले, और बे आदमीनको गिन्ती कर, जो हुवाँ मेरे आराधना कर रहे हएं,

² पर पबित्र ठाउँको बाहेरको आँगनके मत् नपिए काहेकी बो गैर-यहूदी आदमीनके दओगओ हए, बे बयालीस महिनातक मेरे सहरमे राज्य करंगे।

³ बो समय मए अपने दुई साक्षीन्के एक हजार दुई सओ साठी दिननके ताहीं मेरे सन्देशनकी घोषणा करनको अधिकार देमंगो। बे शोक करन बारो लत्ता पैँधे होमंगे।”

⁴ जे दुई साक्षीनको तुलना दुई जैतूनको पेण और दुई दियाके साथ करोगओ हए, जो सारे संसारके प्रभु, परमेश्वरके अग्गु ठाणे रहात हएं।

⁵ अगर कोइ उन्हएं नुक्सान पुगानके कोसिस करत हए, तओ उनके मुँहुँसे आगी निक्रत हएं और उनके दुश्मनके नाश करदेत हएं; और अइसियए जोकोइ उन्हएं नुकसान पुगानके कोसिस करैगो, बो मारो जाबैगो।

⁶ परमेश्वर उन्हएं अधिकार दइ हए, कि बे बाके सन्देशके घोषणा करनके समयमे स्वर्गको पानीके रोक देएं। उन्हएं पानीके खुन कता लाल रंगमे बद्लन और पृथ्वीके हर मेलके भयानक दण्डसे मारनके फिर अधिकार मिलो हए। बे जितनो चोटी चाहएं, उत्नुवए चोटी अइसे कर सकत हएं।

⁷ जब दुई साक्षी परमेश्वरके सन्देशके परचार करडारंगे, तओ बो राक्षस जो गहिरो कुण्डा मैसे निक्रैगो, बो बे दुई आदमीनके सँग लणैगो, उन्हएं हराए देबैगो और उन्हएं मार डारैगो।

⁸ बे दुई साक्षीन्के मार डारनके पिच्छु, उनको लहासके हुवएं, बो बडो सहरको डगरमे छोडदओ जाबैगो, जहाँ उनको प्रभुके क्रूसमे चढाओगओ रहए। बो सहरके उदाहरणके रुपमे “सदोम सहर” या “मिश्रदेश” कहोजात हए, काहेकी हुवाँके आदमी बहुत दुष्ट हएं, बे आदमीन कता जो सदोम और मिश्रदेशमे रहात हएं।

⁹ साढे तीन दिनतक संसारके हर जाति, कुल, राष्ट्र और भाषाके आदमी उनको लहासके देखंगे, पर बे कोइ फिर उनको लहासके दफ्नानको अनुमति नाए देमंगे।

¹⁰ अपनी मृत्युसे पहिले, बे दुई साक्षी बिपत्तिन्के द्वारा आदमीनके इतनो परेसान करीं, कि जब आदमी सुनीं कि, बे मरिगए हएं, तओ बे बहुत खुसी भए। बे इतना खुसी हुइगए, कि बे खुसीसे आनन्द मनान लग्गए और एक-दुस्रेके उपहार देन लागे।

¹¹ पर साढे तीन दिन पिच्छु, परमेश्वरके घेनसे जीबनको साँस बे दुईमे घुसीगओ; और बे अपने पाँओँके बलमे उठके ठाणीगए, और बे सब जौन देखी, कि बे अब फिरसे जिन्दा हुइगए, तओ बे बहुत डराइगए।

¹² जाके पिच्छु, बे दुई आदमी स्वर्गसे एक अगमबक्ताके मस्कत सुनीं, जौन उनसे जोडसे चिल्लाएके कही: “हियाँ उपर आओ!” जब उनके दुस्मन देखन डटे रहएं, तओ बे एक बादरसे लिपटके उपर स्वर्गमे चलेगए।

¹³ बहे समयमे, यरूशलेम सहरमे एक बहुत भारी हालाचाला आओ, और सहरके घरन्को दशौँ भाग गिरिगओ; और बचे भए आदमी, जौन आदमी नाए मरे रहएं बे बहुत डराइगए, जहेमारे बे स्वर्गको परमेश्वरको महिमा करीं।

¹⁴ जा दुस्री बिपत्ति बितिगइ; अब तिस्रो बिपत्ति जल्दी आएरहो हए।

सातौँ तुरही

¹⁵ जब सातौँ स्वर्गदूत अपन तुरही फुँकी, तओ मए स्वर्गमे बडो अबाजके पुकारत सुनो: “संसारमे अब औ कोइ नाए हए, जो राज्य करए। सिरफ हमर प्रभु परमेश्वर और बाको चुनो भओ ख्रीष्ट हए। और बा हमेसा-हमेसाके ताहीं राज्य करैगो।”

¹⁶ तओ चौबिसौ धर्मगुरु जो परमेश्वरके अग्गु अपने-अपने सिंहासनमे बैठे रहएं, बे सब सिंहासनके अग्गु घुपटा पणे और परमेश्वरके आराधना करीं,

¹⁷ और कहान लागे, “हे सर्बशक्तिमान परमप्रभु परमेश्वर, सुरुवातसे लैके अबतक और कभी फिर नाए बद्लन बारो, हम नेहात्तओ तुमके धन्यबाद देत हएं काहेकी तुम अब अपनो महान शक्ति दिखाए हओ और तुम अब पृथ्वीमे अपनो राज्य सुरु करदए हओ।

¹⁸ बे गैर-यहूदी बहुत गुस्साने हएं जो तुमर उपर बिश्वास नाए करत हएं, अब समय आइगओ हए, कि तुम अपनो गुस्सा दिखाबओ और बे सबको न्याय करनको समय आइगओ हए, जो मरिगए हएं। अब बो समय फिर हए जब तुम बे अगमबक्तनके प्रतिफल देबैगे जो तुमर सेवा करत हएं और बे सब आदमीनके जो तुमर सम्मान करत हएं, जो कमजोर हएं और जो शक्तिशाली हएं और उनके जौननके महत्त्वपूर्ण मानो जातहए और जौननके महत्त्वपूर्ण नाए मानो जातहए, जब बहे समय तुम उनके नाश करदेबैगे जौन पृथ्वीमे बिनाश करीहए।”

¹⁹ और परमेश्वरको पबित्र मन्दिर जो स्वर्गमे हए, बो खोलो गओ, और बाको मन्दिरमे बाके करारको सन्‍दुक दिखाओगओ, तओ सिंहासनमे बिजुली चमको, बद्रि तड्कनको अबाज और हलाचला आओ और बहुत पत्थर बारो मेँहे बर्षो।