प्रकाश 10 - राना थारु नयाँ नियम

स्वर्गदूत और खलरीको छोटोमोटो चिट्ठी

¹ फिर मए एक और शक्तिशाली स्वर्गदूतके एक बादर घिरो भओ स्वर्गसे उतरत देखो; और एक धनकमान बाके मुणके चारौ घेन रहए। और बोको मुँहुँ सूर्य कता चम्कत रहए और बोके पाउँ आगीके खम्मा कता रहएं।

² बोको दहिना पाउँ समुन्दरमे धरो गओ, और बोको दिब्रा पाउँ समुन्दर किनारे जमीनमे धरोगओ। बोके हातमे छोटोसो खलरीको चिट्ठी रहए जो खुलो रहए।

³ बो स्वर्गदूत जोडसे चिल्लाई, और बोको अबाज बघटा कता रहए। जब बो चिल्लाई, तओ सात तेज अबाज बोके उत्तर दइं, जो गर्जनको अबाज कता रहएं।

⁴ जब सातौँ गर्जनके अबाज सुनाइ दइडारी, तओ जो मए सुनो बो लिखनके ताहीं तयार रहओं। पर मए स्वर्गसे जा अबाज सुनो, “जो गर्जन कही हए, बोके गुप्तमे धर, जे बातनके मत् लिखए।”

⁵ तओ अपनो दहिना हात बादर घेन उपर उठाइ, जो कसम खानके ताहीं रहए। तओ समुन्दर और जमिनमे ठाडेभए जौन स्वर्गदूतके मए देखो रहओं, बो अपनो दहिना हात बादर घेन उपर उठाइ।

⁶ और सदादिन जिन्दा रहन बारे, और जो बादर, पृथ्वी और समुन्दर और उनमे रहान बारे सब चीजके सृष्टि करीहए, बहेको कसम खाएके कही कि “अब कोइ फिर बातके ताहीं औ आसरा नाए करन पणैगो। अब बे सब पुरा हुइजामंगी।”

⁷ तओ औ देर नाए होबैगी। जैसीए बो सातौँ स्वर्गदूत अपनी तुरही फुँकैगो, बो तुरन्त काम करैगो। परमेश्वर अपनी गुप्त योजनाके पुरा करैगो, जैसेकी बा अपने सेवक अगमबक्तनके जाकी अच्छो समाचार परचार करी रहए।

⁸ तओ मए फिरसे बो अबाज सुनो, जौन स्वर्गसे मोसे बात करी रहए। अबाज मोसे कही, “जा, बो खलरीको चिट्ठीके लैले जो स्वर्गदूतके हातमे खुली हए, जो समुन्दर और जमिनमे ठाणो हए।”

⁹ और मए स्वर्गदूतके ढिँगै जाएके कहो, “जा छोटी खलरीको चिट्ठी मोके देओ।” और बो मोसे कही, “तए जाके खाएले; जाको स्वाद सहात कता मिठो हए, पर पच्छु जाके करुवानसे तेरो पेट पिराबैगो।”

¹⁰ जहेमारे मए बो खलरीको चिट्ठीके लैलओ जो स्वर्गदूत पक्णे रहए, और बोके खाएलओ। और नेहात्तओ जाको स्वाद सहातके कता मिठो रहए, पर जब मए जाके घिँचलओ, तओ मिर पेट पिरान लग्गओ।

¹¹ तओ मोसे जा कहोगओ, “अलग-अलग जाति और देशके आदमी, अलग-अलग भाषा मस्कन बारे आदमीनके और राजनके एकचोटी फिरसे बता, जो परमेश्वर तोके बतानके ताहीं कहात हए।”