फिलिप्पी 4 - राना थारु नयाँ नियम

पावलको सल्लाहा

¹ जहेमारे हे मेरे बिश्वासी ददाभइयओ, मए तुमसे बहुत प्रेम करत हओं, और मए तुमसे भेँटनको आसरा करत हओं, जौन मिर आनन्द और मुकुट हओ। हे मेरे प्यारे भइयओ, प्रभुमे अपनो बिश्वासमे मजबुत रहाओ।

² मए इयोदिया और सुन्तुखे दुनौ जनैके अनुरोध करत हओं, कि बे प्रभुमे एकतामे रहामएं।

³ मेरे सँग सच्चो सेवामे मदत करन बारो, मए तोसे फिर बिन्ती करत हओं, कि तए बे बैयरनके मेलमिलाप करनमे मदत कर, काहेकी बे मेरे सँग अच्छो समाचार फैलानमे, क्लेमेस और बाँकी मेरे सँग सेवामे मदत करन बारे समेत मेहेनत करीं, जौनन्को नाउँ जीबनको किताबमे लिखेहएं।

जब फिर आनन्दित रहानो

⁴ प्रभुमे रोज आनन्द करओ, मए फिरसे कहात हओं, आनन्द करओ।

⁵ सब आदमी तुमर सहनशील स्वाभावके जान जामएं। प्रभु येशू जल्दी आएरहो हए।

⁶ कोइ बातमे चिन्ता मत् करओ, पर सब परिस्थितिमे तुमर निबेदन, प्राथना और बिन्तीद्वारा परमेश्वरके धन्यबाद देओ।

⁷ तओ परमेश्वरको शान्ति, जो आदमीको समझके बाहेर हए, जहे शान्ति तुमर हृदय और बिचारनके ख्रीष्ट येशूमे बचाएके धरैगो।

जे बातमे ध्यान लगाओ

⁸ जहेमारे, हे मेरे बिश्वासी ददाभइयओ, जो-जो बात सच्चे हएं, और जो-जो बात आदरणीय हएं, और जो-जो बात धर्मी हएं, और जो-जो बात पबित्र हएं, और जो-जो सुन्दर हएं, और जो-जो बात प्रसंसा करनके लायक हएं, अन्तमे जो-जो बात बहुत अच्छे हएं। और अइसे चीज जोके आदमी सम्मान करत हएं, बिन्हिनमे तुमर मन लागो रहाबए।

⁹ मेरे शब्दसे और मेरे कामसे जो कुछ तुम सिखे हओ और पाएहओ, बिनके पालन करओ, तओ शान्ति देन बारो परमेश्वर तुमरसँग रहाबैगो।

दानके ताहीं धन्यबाद

¹⁰ मए प्रभुमे गजब आनन्दित हओं, कि बहुत दिन पिच्छु, मेरे ताहीं रुपैया पठाएके मोएमे तुमर वास्ता फिरसे दिखाए हओ। तुम नेहात्तओ मेरे ताहीं चिन्तामे रहओ, पर तुमके मौका नाए मिलो रहए।

¹¹ जा नाएकी मेरे सँग बे सब चीज नाए रहएं, जो मोके जरुरी रहए। काहेकी मए जा सिखो हओं, कि जैसो परिस्थितिमे होए, बहेमे सन्तुष्ट रहान पणत हए।

¹² थोरी होएसे फिर मए रहिलेत हओं, और सब चीज होएसे फिर मए रहिलेत हओं। और मेरे ठिन मिर जरुरीके सब चीज होएसे फिर या जब मेरे ठिन मिर जरुरीके चीज नाए होएसेफिर मए जे सब परिस्थितिमे सन्तुष्ट रहानके सिखडारो हओं।

¹³ ख्रीष्टके द्वारा जौन मोके शक्ति देतहए, बहेमे मए सब कुछ कर सकत हओं।

¹⁴ तओ फिर मोके रुपैया पठाएके मिर दुखमे तुम मदत करके तुम बहुत अच्छो करे।

¹⁵ हे फिलिप्पी सहरके आदमीउ, तुम अभौफिर जानत हओ, कि मए तुमर बीचमे अच्छो समाचार परचार करो, जब मए माकेडोनिया परदेशमे रहओं। और तुम अपनए फिर जानत हओ, कि खुसीको परचारके सुरुमे मोसे बिदा होत, देन और लेनको काममे, तुमर बाहेक कोइ मण्डली मिर सँग सामिल नाए भओ रहए।

¹⁶ जहे हानी, जब मए थेसलोनिके सहरमे रहओं: जब मोके मदतको जरुरी रहए, तओ तुम रुपैया पठाएके दुई चोटी मोके मदत करे।

¹⁷ मए जा चिट्ठी जाकेमारे नाए लिखो, कि मए रुपैया चाँहत हओं, बल्कि मए अइसो फल चाँहत हओं कि, जो तुमर फाइदाके ताहीं बढत जाबए।

¹⁸ मोके मिलन बारो चीजसे जद्धा पाओ हओं। तुम इपाफ्रोडिटसके हातमे पठाओ भओ रुपैया पाएके मए सन्तुष्ट हुइगओ हओं। मेरे ताहीं तुमर उपहार मिठो महाँकन बारो बलिदान जैसो हए, जो पुजारी परमेश्वरके चढात हए। जा इनाम परमेश्वरके ताहीं ग्रहणयोग्य हए, और परमेश्वरके खुसी करत हए।

¹⁹ और परमेश्वर फिर अपनो बो धनके अनुसार जो महिमा सहित ख्रीष्ट येशूमे हए, बा तुमर हरेक घटिकमीके पुरा करैगो।

²⁰ हाम्रो परमेश्वर दौवाकी महिमा सदासर्वदा होतए रहाबए। आमेन।

बिदाइ और आशिष

²¹ येशू ख्रीष्टमे सब पबित्र आदमीनके मिर नमस्कार कहियओ। और हियाँ, जो बिश्वासी ददाभइया मेरे सँग हएं तुमके नमस्कार कहात हएं।

²² सब पबित्र आदमी, खास करके जो रोमको महाराजा कैसरके घरानाके हएं, तुमके नमस्कार कहात हएं।

²³ हमर प्रभु येशू ख्रीष्टको अनुग्रह तुमरसँग रहातए रहाबए। आमेन।