फिलिप्पी 3 - राना थारु नयाँ नियमजीबनको लक्ष 1 जहेमारे हे मेरे बिश्वासी ददाभइयओ, तुम प्रभुमे हओ कहिके आनन्दीत रहाओ। जौन बात मए तुमके पहिले लिखो हओं, बेहीं बात तुमके घरी-घरी लिखनमे मोके कोइ झन्झट नाए लागत हए, और जब मए बेहीं बात तुमके घरी-घरी कहात हओं तओ जा बात तुमके झुठे गुरुनसे बचाएके धरैगो। 2 बे खराब आदमीसे होसियार रहाओ जो कुत्ता हानी हएं। बे आदमीसे होसियार रहाओ, जो कहात हएं, कि तुमके बचाएजानके ताहीं खतना करबान जरुरी हए। 3 काहेकी खास करके हम परमेश्वरके आदमी हएं, जो परमेश्वरको आत्माकी अगुवाईसे आराधना करत हएं, और येशू ख्रीष्टमे घमण्ड करत हएं, और शरीरके उपर भरोसा नाए करन बारे सच्चो खतना हम करेहएं। 4 अइसियए मेरे ठिन बहुत कारण हए, कि मए अपनो कोसिसमे भरोसा करओं। अगर कोइ सोँचत हए, कि बोकेसँग अइसो मानवीय कोसिसमे भरोसा करनको अच्छो कारण हए कहेसे, मिर ठिन त औ फिर जद्धा कारण हए, कि मए अपने कोसिसमे भरोसा करओं। 5 जब मए आठ दिनको रहओं परमेश्वरको आज्ञा अनुसार खतना भओ रहए। काहेकी मए जनमसे इस्राएल देशके जातिको हओं, और बेन्यामीन कुलको हओं, एक असली हिब्रू हओं और मेरे पुर्खा फिर खास हिब्रू रहएं; एक फरिसीनको समुहके रुपमे मए कडासे मोशाको नियम कानुनके पालन करो। 6 उत्सहाके बारेमे अगर कहाओं तओ, मण्डलीके सतान बारो, और यहूदी नियम कानुनके पालन करनमे मए एक धर्मी आदमी रहओं, काहेकी मए बे सबके पालन करो। 7 पर जो-जो बात मेरे फाइदाके ताहीं रहएं, बे बातके ख्रीष्टको करो भओ कामके कारण मए बेकारको मानो। 8 पर प्रभु येशू ख्रीष्टके चिन्होके कारणसे, जो सब चीजसे आवश्यक हए, मए सब चीजके बेकारको मानो। जोके कारण मए सब चीज छोडदओ और बे सब चीजके फोहर बात सम्झो। ताकी मए ख्रीष्टके जान पामओं। 9 और मए परमेश्वरके सँग एकएमे रहिपामओं, नाएकी बो धार्मिकतासे जो मोशाको नियम कानुनसे हए। पर बहे धार्मिकतासे, जो ख्रीष्टमे बिश्वास करनको कारण हए, और परमेश्वरके घेनसे बिश्वास करनमे मिलत हए। 10 मए जा चाँहत हओं, कि ख्रीष्टके जानलेमओं। बाको मरके जिन्दा बनान बारो शक्तिके जान पामओं, और बाको मृत्युमे बाके हानी हुइके बाको दु:खमे सामिल हुइपामओं। 11 ताकी मए फिर मरो भओ मैसे जिन्दा करो जामओं। लक्ष घेन बढतए जानो 12 मए जा ठोकुवा नाए करत हओं, कि मए जे सब चीजके पहिलीयए पाएडारो हओं, मए कोसिस करके अग्गु बढतए जाएरहो हओं, कि मोके बो चीज मिलजाए, जौनके ताहीं येशू ख्रीष्ट मोके पहिलीयए चुनडारी हए। 13 हे मेरे बिश्वासी ददाभइयओ, मोको नाए लागत हए, कि मए पाइगओ हओं, पर एक काम करत हओं, कि जो पहिलो हुइगओ हए, मए बोके भुलके भबिष्यको लक्ष्यके ताहीं कडा मेहेनत कररहो हओं। 14 लक्ष्य घेन दौरत जात हओं, ताकी बो इनाम पामओं। जाको इनाम जा हए, कि परमेश्वर मोके स्वर्गमे बुलानडटो हए काहेकी येशू ख्रीष्ट मेरे ताहीं मरो। 15 जहेमारे हम मैसे जितनो बिश्वासमे पक्के हएं, अइसियए करके हम एकए हानी सोचएं, और अगर कोइके बातमे तुमर दुस्रो सोँच हए कहेसे परमेश्वर बोके फिर तुमके प्रकट करदेबैगो। 16 जहेमारे हमके उइसो सच्चाईके अनुसार काम करन चाहो, जौनके परमेश्वर पहिलीयसे हममे प्रकट करीहए। हम स्वर्गके हएं 17 हे मेरे बिश्वासी ददाभइयओ, तुम सब मेरे ब्यबहार जैसो चलओ, और बो आदमीके फिर ध्यान देबओ जौन मिर ब्यबहार हानी चलत हएं, और तुम उनके ब्यबहार हानी फिर चलओ। 18 काहेकी बहुत आदमी अइसे चलत हएं, जौननके बारेमे मए तुमसे घरी-घरी कहो हओं, और अभौफिर रोए-रोएके कहात हओं, कि उनको ब्यबहार दिखात हए, कि बे क्रूसमे ख्रीष्टको मृत्युको सन्देशके बिरोध करत हएं। 19 बिनको अन्त बिनाश हए, और बे शरीरको इच्छाके पुरा करनके ताहीं इकल्लो जीइत हएं। बे सरम लागन बारो काम करनके बारेमे घमण्ड करत हएं और बे हमेसा पृथ्वीके चीजके बारेमे सोँचत रहात हएं। 20 पर हम स्वर्गसे सम्बन्धित हएं, और हम एक उद्धारकर्ता प्रभु येशू ख्रीष्टके स्वर्गसे लौटके आनको आसरा करत हएं। 21 बा अपनो शक्तिको बहे प्रभावके अनुसार, जौनके द्वारा बा सब चीजके अपने अधिनमे कर सकत हए। हमर कमजोर संसारकी शरीरको रुप बदलके अपनो महिमाको शरीर जैसो बनाबैगो। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation