लूका 3 - राना थारु नयाँ नियम

बप्तिस्मा देन बारो यूहन्नाको सन्देश

¹ रोमको महाराजा कैसर, तिबेरिअसको शासनकालमे पन्द्रौँ वर्षमे पन्तियस पिलातस यहूदिया परदेशको बडो हाकिम रहए। बो बेरा राजा हेरोद गालील परदेशमे राज्य करत रहए, और बोको भइया फिलिप इतुरिया और त्राखोनितिस क्षेत्रमे राज्य करत रहए, और लुसानियास अबिलेनेके क्षेत्रमे राज्य करत रहए।

² और जब हन्नास और कैयाफा प्रधान पुजारी रहएं, बो समय परमेश्वरको बचन जंगली इलाकामे जकरियाको लौंणा बप्तिस्मा देन बारो यूहन्नाके ठिन आओ।

³ बप्तिस्मा देन बारो यूहन्ना पाप क्षमाके ताहीं पाप करन छोडके परमेश्वर घेन घुमन बारो बप्तिस्माको परचार करत यर्दन नदीयाके आसपासके सब इलाका हुइके आओ।

⁴ यशैया अगमबक्ताको किताबमे अइसो लिखो रहए, “जंगली इलाकामे एक आदमी अइसो चिल्लाएके कहात रहए, परमप्रभुके डगर तयार करओ, और बाको डगर सुध बनाओ,

⁵ हर एक खल्ला पटैगो, और सब पहाड और सब डँगा बरोबर होमंगे। और टेणेबेणे सुध होमंगे, और अग्ठो डगर सजिलो होबैगो।

⁶ और सब आदमी बो देखंगे, जौनके परमेश्वर बिनके उद्धार करनके ताहीं पठाइ हए।”

⁷ जो बणी भिड बप्तिस्मा देन बारो यूहन्नासे बप्तिस्मा लेनके आइ, तओ बिनसे बो कही, “तुम जहेरिले साँप कता दुष्ट हओ, तुमके हियाँ सोँचन गलत हए, कि बप्तिस्मा लेनसे तुम अपन पापसे परमेश्वरको दण्ड पानसे बचपए हओ!

⁸ जहेमारे पाप छोडके परमेश्वर घेन घुमओ, दण्डसे बचनके ताहीं अइसो काम करओ, कि तुम नेहत्तओ पाप छोडके परमेश्वर घेन घुमे हओ; और अपने-अपने मनमे मत् सोँचओ, कि परमेश्वर हमके दण्ड नाए देहए, काहेकी अब्राहाम हमर दौवा हए; पर मए तुमसे कहात हओं, परमेश्वर तुमर ठिहा लेनके ताहीं अब्राहामके ताहीं पत्थरसे सन्तान उत्पन्न करसकत हए।

⁹ और परमेश्वर सब मेलको दण्ड देनके ताहीं तयार हए, जौन पाप छोडके परमेश्वर घेन नाए घुमत हएं, ठिक बहे कता जैसी कुढाहरी बारो कोइ आदमी, बे रुखाके जरसे काटनके तयार हए, जौन अच्छो फरा नाए फारत हएं। हरेक आदमी जौन बे रुखा हानी हएं, और अच्छे फरा नाए फारत हएं, बे परमेश्वरसे दोषी ठहिरंगे, और आगीमे फेँके जामंगे।”

¹⁰ और आदमी बप्तिस्मा देन बारो यूहन्नासे पुछीं, “तओ हम परमेश्वरको दण्डसे बचनके ताहीं का करएं?”

¹¹ बप्तिस्मा देन बारो यूहन्ना बिनसे कही, “जौन ठिन दुई जोड कुर्ता हए, बो नाएहोन बारेके एक दइदेबए, और जौन ठिन खान बारो हए, बो फिर अइसियए करए।”

¹² कर उठान बारे फिर बप्तिस्मा लेनआए, और बप्तिस्मा देन बारो यूहन्नासे पुछीं, “महान गुरु हम का करएं?”

¹³ बप्तिस्मा देन बारो यूहन्ना बिनसे कही, “तुमके सरकार जितका तोकी हए, बोसे जद्धा कर मतलेओ।”

¹⁴ और सिपाही फिर पुछीं, “हम का करएं?” बप्तिस्मा देन बारो यूहन्ना बिनसे कही, “कोइके उपर अत्याचार करके, और झुठो दोष लगाएके मत् लुटीयओ। अपन तनखामे सन्तुष्ट रहियओ।”

¹⁵ जब आदमी, ख्रीष्ट जल्दी आबए करके आसरामे लागे रहएं, और सब अपन मनमे बप्तिस्मा देन बारो यूहन्नाके बारेमे, “साइत जहे ख्रीष्ट हए” करके बिचार करत रहएं,

¹⁶ तओ बप्तिस्मा देन बारो यूहन्ना जबाफ दइ, “जौन मिर पिच्छु आबैगो, बो येशू मोसे बहुत शक्तिशाली हए, और कमैया बनके और फिर लोहोकके बाको जुताको तनि खोलनको लायकको मए नाए हओं। मए तुमके पानीसे बप्तिस्मा दओ हओं। पर येशू तुमके पबित्र आत्मासे आगीको बप्तिस्मा देबैगो।

¹⁷ येशूको फटकन बारो सुपो, बहेक हातमे हए, बोसे येशू अपनो आँगनमे अच्छेसे सफा करैगो, और गेहुँ अपनो कुठियामे जम्मा करैगो, पर भुसाके नाए बुतन बारी आगीमे जलाबैगो।”

¹⁸ अइसियए औ बेढम उपदेशसे शिक्षा दइके यूहन्ना आदमीके अच्छो समाचार परचार करत रहो।

हेरोद यूहन्नाके जेलमे डारी

¹⁹ तओ राजा हेरोद अपन भइया फिलिपकी बैयर हेरोदियाससे बेहा करलै रहए, और जा खराब कामके मारे और अइसियए बहुत गलत कामके मारे बप्तिस्मा देन बारो यूहन्ना बोके डाँटी रहए।

²⁰ बप्तिस्मा देन बारो यूहन्नाके जेलमे डारके सब खराब कामके उपर, औ एक खराब काम थपलै।

यूहन्नासे येशूको बप्तिस्मा

²¹ जब सब आदमी बप्तिस्मा लइं, तओ येशू फिर बप्तिस्मा लैके परमेश्वरसे प्राथना करत रहए, तओ येशू स्वर्ग उघरो देखी।

²² और पबित्र आत्मा कबुतरके रुपमे अपन उपर उतरत देखी। तओ स्वर्गसे परमेश्वरको अबाज आओ, “तए मिर प्यारो लौंणा हए, तोसे मए गजब खुसी हओं।”

येशूको बंशावली

²³ येशू अपनो सेवाको काम सुरु करत पेती बा लगभग तीस वर्षको रहए। आदमी बाके योसेफको लौंणा हए कहिके कहात रहएं। योसेफ एलीको लौंणा रहए।

²⁴ एली मत्तातको लौंणा, मत्तात लेबीको लौंणा, लेबी मल्कीको लौंणा, मल्की यान्‍नाको लौंणा, यान्‍ना योसेफको लौंणा।

²⁵ योसेफ मत्ताथियासको लौंणा, मत्ताथियास आमोसको लौंणा, आमोस नहूमको लौंणा, नहूम इसलीको लौंणा, इसली नग्गैको लौंणा।

²⁶ नग्गै माथको लौंणा, माथ मत्ताथियासको लौंणा, मत्ताथियास सेमैनको लौंणा, सेमैन योसेखको लौंणा, योसेख योदाको लौंणा।

²⁷ योदा योआननको लौंणा, योआनन रेसाको लौंणा, रेसा यरुबाबेलको लौंणा, यरुबाबेल शालतिएलको लौंणा, शालतिएल नेरीको लौंणा।

²⁸ नेरी मल्कीको लौंणा, मल्की अध्धीको लौंणा, अध्धी कोसामको लौंणा, कोसाम एलमादमको लौंणा, एलमादम एर् को लौंणा।

²⁹ एर् यहोशूको लौंणा, यहोशू एलीएजरको लौंणा, एलीएजर योरीमको लौंणा, योरीम मत्तातको लौंणा, मत्तात लेबीको लौंणा।

³⁰ लेबी शिमियोनको लौंणा, शिमियोन यहूदाको लौंणा, यहूदा योसेफको लौंणा, योसेफ योनानको लौंणा, योनान एल्याकीमको लौंणा।

³¹ एल्याकीम मलेआको लौंणा, मलेआ मिन्नाको लौंणा, मिन्ना मत्ताथाको लौंणा, मत्ताथा नातानको लौंणा, नातान दाऊदको लौंणा।

³² दाऊद यिशैको लौंणा, यिशै ओबेदको लौंणा, ओबेद बोअजको लौंणा, बोअज सल्मोनको लौंणा, सल्मोन नहशोनको लौंणा।

³³ नहशोन अम्मीनादाबको लौंणा, अम्मीनादाब अरामको लौंणा, अराम हेस्रोनको लौंणा, हेस्रोन फारेसको लौंणा, फारेस यहूदाको लौंणा।

³⁴ यहूदा याकूबको लौंणा, याकूब इसहाकको लौंणा, इसहाक अब्राहामको लौंणा, अब्राहाम तेरहको लौंणा, तेरह नाहोरको लौंणा।

³⁵ नाहोर सरुगको लौंणा, सरुग रऊको लौंणा, रऊ पेलेगको लौंणा, पेलेग एबेरको लौंणा, एबेर शेलहको लौंणा।

³⁶ शेलह केनानको लौंणा, केनान अर्पक्षदको लौंणा, अर्पक्षद शेमको लौंणा, शेम नोआको लौंणा, नोआ लेमेखको लौंणा।

³⁷ लेमेख मतूशेलहको लौंणा, मतूशेलह हनोकको लौंणा, हनोक येरेदको लौंणा, येरेद महलालेलको लौंणा, महलालेल केनानको लौंणा।

³⁸ केनान एनोशको लौंणा, एनोश शेतको लौंणा, शेत आदमको लौंणा, आदम परमेश्वरको लौंणा रहए।