यूहन्ना 7 - राना थारु नयाँ नियम

येशू और बाके भइया

¹ तओ पिच्छु येशू गालील परदेशको क्षेत्रमे घुमफिर करी। बा यहूदिया परदेशमे जानके नाए चाही, काहेकी यहूदी समुह बाके मारनके ताहीं दाउमे रहएं।

² और यहूदीनको तम्भु बनाएके मनान बारो तेवहार ढिँगै रहए।

³ बहेमारे येशूके भइया बासे कहीं, “जा ठाउँ छोडके यहूदिया परदेशमे चलो जा, तिर करोभओ चमत्कार तेरे चेला फिर देखएं।

⁴ नाउँ कमान ढुँणन बारे अपनो करोभओ कामके लुकान नाए चाँहत हएं। उइसीयए तहुँफिर अचम्मको काम करनडटो हए और जा अचम्मो काम संसारके सब आदमीनके पता होबए।”

⁵ काहेकी येशूके भइया फिर बाके उपर बिश्वास नाए करत रहएं।

⁶ येशू बिनसे कही, “मिर ठिक समय अभए फिर नाए आओ हए। पर तुमर ताहीं त सब समय ठिक हए।

⁷ संसार तुमके घृणा नाए कर्पएहए, पर मोके त घृणा करत हए, काहेकी मए संसारको चालचलन खराब हए कहिके गवाही देत हओं।

⁸ तुम तेवहार मानन्के जाओ, मए अभए नाए जएहओं काहेकी मिर समय नाए आओ हए।”

⁹ इतका कहिके बा गालील परदेशमे रहिगओ।

झोपणीको तेवहारमे येशू

¹⁰ येशूके भइया तेवहारमे गए। तओ बा फिर कोइ पता नाए पामएं करके यरूशलेम सहरमे गओ।

¹¹ तेवहारमे यहूदी समुहके अगुवा बाके ढुणत रहएं। और “येशू कहाँ हए?” करके बे पुँछत रहएं।

¹² भिडमे भए बहुत आदमी येशूके बारेमे बात करत रहएं। कुइ कहात रहएं, “बा अच्छो हए।” और दुस्रे कहात रहएं, “नाए हए, बा त आदमीके भ्रममे पणात हए।”

¹³ तहुँफिर यहूदी समुहके अगुवनसे डरके मारे कोइ बाके बारेमे खुल्लम-खुल्ला नाए बतात रहएं।

तेवहारमे येशूको शिक्षा

¹⁴ जा तेवहारके बीचमे येशू यरूशलेमको मन्दिर भितर घुसके शिक्षा देन लागो।

¹⁵ यहूदी समुहके अगुवा बहुत अचम्मो मानके अइसे कहीं, “जा आदमी पबित्र-शास्त्रको शिक्षा कभी फिर नाए पाएके कैसे इतनो जद्धा जानन बारो हुइगओ?”

¹⁶ तओ येशू बिनके जबाफ दइके कही, “मिर शिक्षा मिर अपनो नाए हए, बल्कि मोके पठान बारो परमेश्वरको हए।

¹⁷ अगर कोइ आदमी परमेश्वरको इच्छा पालन करन चाँहत हए, तओ बो जान जाबैगो, कि मिर शिक्षा परमेश्वरके घेनसे आतहए कि मिर अपनो शिक्षा हए।

¹⁸ अपनो बातसे मस्कन बारो त अपनो प्रसंसा ढुणत हए। पर जौन अपनएके पठान बारोके प्रसंसा ढुणत हए, बो आदमी इमान्दार होतहए, और बोमे थोरी फिर बेमानी नाए होत हए।

¹⁹ का मोशा तुमके नियम कानुन नाए दइ हए? तहुँफिर तुम कोइ फिर बोको नियम कानुनके पालन नाए करत हओ। तुम काहे मोके मारनके ढुणत हओ?”

²⁰ भिडमे भए आदमी जबाफ दइके कहीं, “तुमके भुत लागो हए। तुमके कौन मारन ढुणत हए?”

²¹ येशू जबाफ दइके भिडसे कही, “मए एक शक्तिशाली काम करो, तओ तुम सब अचम्मो मनत हओ।

²² मोशा तुमके खतना करनको चलन दइ हए, होन त जा काम मोशा सुरुवात नाए करीहए। पर सुरुवात त तुमर पुर्खा करी रहएं; जोको अनुसार तुम पबित्र दिनमे फिर खतना करत हओ।

²³ अब तुम मोशाको दओ भओ नियम कानुन भंग नाए होबए कहिके पबित्र दिनमे खतना करत हओ कहेसे, मए पबित्र दिनमे एक आदमीके पुरो अच्छो करत पेती तुम काहे गुस्सात हओ?

²⁴ आदमीके देखके न्याय मत् करओ, बल्कि ठिक-ठिक तरिकासे न्याय करओ।”

ख्रीष्टके बारेमे आदमीनको बिचार

²⁵ तओ यरूशलेमके आदमी कहीं, “का जा ख्रीष्ट नाए हए, जौनके मारनके ताहीं अगुवा ढुणनडटे हएं?

²⁶ पर देखओ बो त खुल्लम-खुल्ला बात कररहो हए और कोइ कुछ नाए कहिरहो हए! का जहे ख्रीष्ट हए कहिके अगुवा नेहात्तओ पता पाइगए हएं?

²⁷ पर हम जा जानत हएं, जा आदमी कहाँसे आओ हए। पर जब ख्रीष्ट देखा पणैगो, बा कहाँको हए कहिके कोइ फिर पता नाए पएहए।”

²⁸ बहे बेरा येशू यरूशलेमको मन्दिरमे सिखान डटो रहए। बा सबके सुनन करके कही, “का तुम मोके नेहात्तओ नाए चिन्त हओ? मए कहाँसे आओ हओं, का बो तुमके नेहात्तओ पता नाए हए? मए अपने इच्छासे नाए आओ हओं, बल्कि जौन मोके पठाइ हए बो बिश्वासयोग्य हए। तुम बाके नाए चिन्त हओ।

²⁹ पर मए बाके चिन्त हओं काहेकी मए बहेको कहीनासे आओ हओं। बहे मोके पठाइ हए।”

³⁰ बहेमारे अगुवा ख्रीष्टके पकणन चाँहत रहएं, पर कोइ बाके नाए पकणीं, काहेकी बाको मरनको सही बेरा हबए नाए आओ रहए।

³¹ पर भिडके बहुत आदमी बाके उपर बिश्वास करीं और बे कहीं, “जब मुक्ति देन बारो राजा ख्रीष्ट आबैगो, का बा जा आदमीसे फिर शक्तिशाली चमत्कारको काम करैगो?”

येशूके पकणबानके ढुणत रहए

³² भिडमे भए आदमी, येशूके बारेमे बात करत फरिसीनको समुह सुनी। जहेमारे बे फरिसीनको समुह और मुखिया यहूदी पुजारी मिलके येशूके पकणनके ताहीं मन्दिरके लखबरियनके पठाइं।

³³ तओ फिर येशू उनसे कही, “मए हबए कुछु समय तक तुमर सँग रहामंगो, और तओ पिच्छु मोके पठान बारोके ठिन लौट जामंगो।

³⁴ तओ तुम मोके ढुणेहओ, पर नाए पएहओ। और जहाँ मए रहामंगो, तुम हुवाँ नाए आए पाबैगे।”

³⁵ जा सुनके यहूदी समुहके अगुवा आपसमे कहीं, “जा कहाँ जानके समहरो हए, और हम इनके नाए पामंगे? शायद जे, बे यहूदी समुहनके आदमीनके ठिन जामंगे जो ग्रीक सहरमे तितरबितर बैठे हएं, और कि त ग्रीक भाषा मस्कन बारेके शिक्षा देन चाँहत हुइहए।

³⁶ जा का कहान ढुँणरहो हए? कि ‘तुम मोके ढुणैगे पर नाए पाबैगे, काहेकी मए जहाँ हओं, बो ठिहामे तुम नाए आए पाबैगे।’”

जीबनको पानीकी नदीया

³⁷ अब तेवहारको अन्तिम दिन और तेवहारको मुख्य दिनमे, येशू ठाणके सबए सुनपामएं करके चिल्लाएके कही, “अगर कोइ प्यासो हए तओ बा मिर ठिन अबए और पिबए।

³⁸ पबित्र-शास्त्र अनुसार मोए उपर बिश्वास करन बारे आदमीको हृदय मैसे पानीकी नदिया जो जीबन देतहए बहातए रहाबैगो।”

³⁹ जब येशू “जीबन देन बारो पानीको नदिया” कही तओ बा पबित्र आत्माके बारेमे बताइ रहए और हबएतक बाके उपर बिश्वास करन बारे पबित्र आत्मा नाए पाइ रहए। काहेकी अभएतक उनके पबित्र आत्मा नाए दओगओ रहए। और परमेश्वर अभएतक येशूको महिमा नाए दिखाइ रहए।

⁴⁰ येशूकी बात सुनन बारे भिडमे भए बहुत आदमी कहान लागे, “नेहात्तओ जहे बो अगमबक्ता हए जौनको हम आसरा करनडटे रहएं।”

⁴¹ और कोइ-कोइ कहान लागे, “बा त मुक्ति देन बारो राजा ख्रीष्ट हए।” पर कोइ-कोइ कहान लागे, “का ख्रीष्ट गालील परदेशसे अएहए? जा नाए हुइसकत हए।

⁴² पबित्र-शास्त्रमे लिखो भओ बचन कहात हए, कि ख्रीष्ट दाऊदके बंश मैसे और दाऊदके गाउँ बेथलेहेमसे आबैगो?”

⁴³ जहेमारे येशूके बारेमे आदमीनके बीचमे फुट आओ।

⁴⁴ बे मैसे कोइ-कोइ बाके पकणनके ढुणत रहएं, पर बाके कोइ फिर हात नाए लगाइं।

यहूदी समुहके अगुवनको अबिश्वास

⁴⁵ तओ मन्दिरके लखबरीया मुखिया यहूदी पुजारी और फरिसीनको समुहके ठिन आए। और बिनसे पुछी, “तुम येशूके पकणके काहे नाए लाए?”

⁴⁶ लखबरीया जबाफ दइं, “बाको बात सुनके हम त अचम्मोमे पणिगए। हम उइसो बात कभु नाए सुनेहएं।”

⁴⁷ फरिसीनको समुह बिनसे कहान लागे, “का बा तुमके फिरसे बहकाए दइ?

⁴⁸ का हमर यहूदी अगुवा और फरिसीनको समुह मैसे कोइ बाके उपर बिश्वास करीहए?

⁴⁹ पर जे आदमी जो मोशाको नियम कानुन नाए जानत हएं, बिनके उपर त परमेश्वरके द्वारा सराप पणीगओ हए।”

⁵⁰ फरिसीनको समुह मैसे एक जनै निकोदेमस, जो पहिलो रातमे येशूके ठिन आओ रहए, बो कही,

⁵¹ “का हमर नियम कानुन अनुसार, दोष लगाओ भओ आदमीको बात नाए सुनके और बोको करोभओ कामके पता नाए लगाए, बोके दोषी ठहरान मिलेहए?”

⁵² पर औ जनै बोसे कहीं, “का तए फिर गालील परदेशको हए? पबित्र-शास्त्रमे ढुणके देख, तओ तए देखैगो, कि गालील परदेशसे अगमबक्ता कोइ नाए आबैगो।”

⁵³ तओ पिच्छु सब आदमी अपन-अपन घर घेन गए।