यूहन्ना 6 - राना थारु नयाँ नियम

येशू पाँच हजारके खबाइ

¹ जाके पिच्छु येशू, गालील समुन्दर और तिबेरियास समुन्दरके बोपार गओ।

² और एक बहुत बणी भिड येशूके पिच्छु लग्गइ, काहेकी येशू रोगीन उपर करोभओ शक्तिशाली चमत्कार बे देखी रहएं।

³ येशू डँगा उपर गओ, और अपन चेलन सँग बैठो।

⁴ यहूदीनको निस्तार तेवहार और यहूदी समुहनको निस्तार तेवहार ढिँगै रहए।

⁵ जब येशू अपन चारौ घेन देखी तओ बा एक बहुत भरी भिड अपने घेन आत देखी, तओ फिलिपसे कही, “इनके खबानके ताहीं हम कहाँसे रोटी किनएं?”

⁶ येशू फिलिपके जाँच करन ताहीं कही रहए, काहेकी बा जो करन जात रहए, बोके बारेमे बक पता रहए।

⁷ फिलिप येशूके जबाफ दइ, “हिना भए सब आदमीनके थोरी-थोरी रोटी इकल्लो देहएं कहेसे फिर हमके आठ महिनाको देहाणी (दुई सओ चाँदीको सिक्का) से फिर नाए पुगैगो।”

⁸ येशूको चेला मैसे एक जनै, सिमोन पत्रुसको भइया अन्द्रियास कही,

⁹ “हियाँ एक लौंणा हए, बोके सँग जओकी पाँच रोटी और दुई मछ्री इकल्लो हए। पर उत्नो जनै आदमीनके ताहीं इत्कासे का पुगैगो?”

¹⁰ येशू कही, “आदमीके बैठानके लगाबओ।” हुवाँ बहुत डुबर्रा भओ बंगरा रहए। तओ पाँच हजार लोग हुवाँ बैठे।

¹¹ तओ येशू रोटी लइ, और परमेश्वरके धन्यबाद चढाएके डुबर्रामे बैठन बारेनके बाँट दइ। और बे सब अघान तक खाइं।

¹² और जब बे पेट भरके खाइं, तओ येशू अपन चेलनसे कही, “उब्रो भओ खुद्रा-खुद्री बटोरओ और एकौफिर खराब नाए होबए।”

¹³ और बे उब्रे भए जओकी खुद्रा-खुद्री बटोरीं तओ बाह्र डलैया भरीगए।

¹⁴ बहेमारे येशूको करोभओ शक्तिशाली चमत्कार देखके बे आदमी कहान लागे, “संसारमे आन बारो अगमबक्ता नेहात्तओ जहेहए।”

¹⁵ बे आएके बाके जबरजत्तीसे लैजाएके राजा बनान चाहेरहेहएं, करके पता पाएके येशू फिरसे इकल्लो रहानके ताहीं पहाडमे गओ।

येशू पानी उपर नेँगी

¹⁶ संझा हुइगओ तओ येशू चेलनके सँग समुन्दर घेन गओ।

¹⁷ और नैयाँमे चढके, बे समुन्दरके बोपार कफर्नहुम सहर घेन जान लागे। बो बेरा अँध्यारो हुइगओ रहए, और येशू हबएतक बिनके ठिन नाए आओ रहए।

¹⁸ तओ बहुत भारी आँधी चली, और आँधी बिनके उल्टा घेनसे चलनके कारणसे समुन्दरमे लणुरा उठन लागे।

¹⁹ जब बे नैयाँ चलाएके लगभग पाँच-छय किलोमिटर चलेगए, तओ बे येशूके समुन्दरमे पानीके उपर नेँगत, और नैयाँके ठिन आत देखीं, तओ बे डराइगए।

²⁰ तओ येशू उनसे कही, “मए हओं, मत् डराओ।”

²¹ जा सुनके चेला खुसी हुइके येशूके नैयाँमे चढाइं और जौन ठिहामे पुगन रहए, बे तुरन्त नैयाँमे बहे ठिहामे पुगके किनारे लग्गए।

²² समुन्दरके बोपार भए भिड दुस्रे दिन हुवाँ एकए इकल्लो नैयाँ देखीं। बे कहीं, कि येशू अपने चेलन सँग नैयाँमे चढो रहए। पर बाके चेला इकल्ले गए रहएं।

²³ तओ तिबेरियास मैसे आदमी औ नैयाँ बो ठाउँके ताहीं लाइं, जहाँ प्रभु धन्यबाद दइके तओ बे रोटी खाइ रहएं।

²⁴ जब येशू और बाके चेला हुवाँ नाए हएं कहान बारी बात पता पाइं तओ बो आदमी येशूके ढुणत नैयाँ चढके कफर्नहुम सहरमे गए।

जीबनको रोटी

²⁵ बे समुन्दरके बोपार येशूके भेँटके पुछीं, “गुरुजी, तुम हियाँ कब आए?”

²⁶ येशू बिनके जबाफ दइके कही, “नेहात्तओ मए तुमसे कहात हओं, तुम शक्तिशाली चमत्कार देखके नाए, पर तुम पेट भरके रोटी खानके पातहओ, तभीमारे तुम मोके ढुणत हओ।

²⁷ नष्ट होन बारो रोटीके ताहीं काम मत् करओ, बल्कि कभी फिर नाश नाए होन बारो जीबन तक रहान बारो रोटीके ताहीं काम करओ, जो मए, आदमीको लौंणा तुमके देमंगो, काहेकी दौवा परमेश्वर मोके अइसो करनके ताहीं अधिकार दइ हए।”

²⁸ बे येशूसे कहीं, “परमेश्वरको काम करनके ताहीं हम का करएं?”

²⁹ येशू बिनसे कही, “परमेश्वरको काम जा हए, कि तुम मोएमे बिश्वास करओ जौनके बा पठाइ हए।”

³⁰ जहेमारे बे येशूसे कहीं, “तुम अइसो कौनछो शक्तिशाली चमत्कारको काम दिखाएपाबैगे ताकी हम तुमके बिश्वास करएं? बो कौनछो काम हए?

³¹ हमर दौवा-पुर्खा जंगली इलाकामे मन्ना खाइं, जैसे पबित्र-शास्त्रमे लिखो हए, ‘परमेश्वर बिनके खानके ताहीं स्वर्गसे रोटी दइ।’”

³² येशू उनसे कही, “नेहात्तओ मए तुमसे कहात हओं, कि तुमके स्वर्गसे रोटी देन बारो मोशा नाए हए, बल्कि स्वर्गसे तुमके सेतएमेत रोटी देन बारो मिर दौवा परमेश्वर हए।

³³ काहेकी परमेश्वरको रोटी बहे हए, जो स्वर्गसे उतरके आत हए, और संसारके जीबन देतहए।”

³⁴ तओ बे येशूसे कहीं, “प्रभु, जा रोटी हमके रोजदिन देए करियओ।”

³⁵ येशू बिनसे कही, “मए बो रोटी हओं जो कभी फिर अन्त नाए होन बारो जीबन देत हए, मेरे जौँणे आन बारे भुँखे नाए रएहएं, और मिर उपर बिश्वास करन बारे कभु प्यासे नाए हुइहएं।

³⁶ मए तुमसे पहिली कहो रहओं, तुम मोके देखलए हओ, ताहुँ फिर बिश्वास नाए करत हओ।

³⁷ जौन-जौनके दौवा मोके दइहए, बे मिर ठिन आमंगे। और जौन-जौन मिर ठिन आमंगे मए उनके कभु नाए छोडंगो

³⁸ मिर अपनो इच्छा नाए बल्कि मोके पठान बारोको इच्छा पुरो करनके ताहीं मए स्वर्गसे आओ हओं।

³⁹ और मोके पठान बारेको इच्छा जहेहए, परमेश्वर मोके जित्नोनके देहए बे मैसे कोइके फिर मए नाए गुमाओं, बल्कि बिनके संसारको अन्तके दिनमे जिन्दा करओं।

⁴⁰ काहेकी मिर दौवाको इच्छा जहेहए, कि लौंणाके देखन बारे और बाके उपर बिश्वास करन बारे, सब कभी फिर नाश नाए होन बारो जीबन पामएं, और दुनियाको अन्तके दिनमे मए बिनके मरे भए मैसे जिन्दा करंगो।”

⁴¹ येशू कही, “स्वर्गसे आन बारी रोटी मही हओं” बहेमारे यहूदी समुहके अगुवा बाके बिरुद्धमे अइसे बरबरान लागे।

⁴² बे कहीं, “का जा योसेफको लौंणा, येशू नाए हए? का जाके अइया और दौवाके हम चिन्त हएं? तओ कैसे जा कहात हए कि ‘मए स्वर्गसे आओ हओं?’”

⁴³ येशू बिनके जबाफ दइके कही, “तुम आपसमे मत् बरबराओ।

⁴⁴ मोके पठान बारो दौवा मिर ठिन आनके मन नाए देहए कहेसे कोइ फिर मिर ठिन नाए आएपाबैगो, मिर ठिन आन बारेके मए संसारको अन्तके दिनमे जिन्दा करेहओं।

⁴⁵ पबित्र-शास्त्रमे अगमबक्ता अइसे लिखी हएं, ‘परमेश्वर सब आदमीनके सिखाबैगो।’ अइसियए दौवा परमेश्वरको शिक्षा सुनन बारे और सिखन बारे सब मिर ठिन आमंगे।

⁴⁶ दौवा परमेश्वरके कोइ आदमी नाए देखी हए, महीँ इकल्लो हओं, जो परमेश्वरके घेनसे आओ हओं, जो बाके देखो हओं।

⁴⁷ नेहात्तओ मए तुमसे कहात हओं, जौन कोइ बिश्वास करैगो बोके सँग कभी फिर नाश नाए होन बारो जीबन हए।

⁴⁸ मए बो जीबनको रोटी हओं, जो कभी फिर अन्त नाए होन बारो जीबन देतहए।

⁴⁹ तुमर पुर्खा जंगली इलाकामे मन्न खाइँ तहुँफिर बे मरीगए।

⁵⁰ पर स्वर्गसे आओ भओ रोटी जहेहए, जौन जा खएहए बो कभी फिर नाए मरैगो।

⁵¹ स्वर्गसे आओ भओ जिन्दा रोटी महीँ हओं। कोइ फिर जा रोटी खएहए कहेसे बो सदिमानके ताहीं जिइहए। और जौन रोटी मए संसारके आदमीनके जीबनके ताहीं देहओं, बो मिर शरीर हए।”

⁵² जा बात करके यहूदी समुह आपसमे बहस करन लागे। बे कहीं, “जा आदमी कैसे हमके अपनी शरीर खबाबैगो?”

⁵³ येशू बिनसे कही, “नेहात्तओ मए तुमसे कहात हओं, जब तक मए, आदमीको लौंणाको शरीर तुम नाए खएहओ, और मिर बलिदानको खुन नाए पिइहओ कहेसे तुमरमे जीबन नए रएहए।

⁵⁴ पर मिर शरीर खान बारो और मिर बलिदानको खुन पिन बारे सँग कभी फिर नाश नाए होन बारो जीबन हुइहए, और अन्तके दिनमे मए बोके मरो भओ मैसे जिन्दा करेहओं।

⁵⁵ काहेकी मिर शरीर नेहात्तओ खान बारी चीज हए, और मिर बलिदानको खुन नेहात्तओ पिन बारी चीज हए।

⁵⁶ मिर शरीर खान बारो और मिर बलिदानको खुन पिन बारो मोएमे रएहए, और मए बोमे रएहओं।

⁵⁷ जैसी जीवित दौवा परमेश्वर, मोके पठाइ हए और मए दौवा परमेश्वरके कारणसे जिइतहओं। उइसी करके मोके खान बारो फिर मेरी कारणसे जिइबैगो।

⁵⁸ स्वर्गसे आन बारो रोटी जहेहए। जा तुमर पुर्खा खाइभइ रोटी जैसो नाए हए। बे रोटी खाइं तहुँफिर मरिगए। पर मए दओ भओ रोटी खान बारे आदमी सदादिन जिइबैगो।”

⁵⁹ जे बात येशू कफर्नहुम सहरको यहूदी सभाघरमे शिक्षा देत पेती कही रहए।

बहुत चेला येशूके छोडीं

⁶⁰ जा सुनके येशूके चेला मैसे बहुत कहीं, “जा शिक्षा त बहुत अग्ठो हए, कौन जा शिक्षा सुनपएहए?”

⁶¹ येशूके चेला जाके बारेमे बरबरात हएं, करके जानके येशू बिनसे कही, “का जा बातके कारणसे तुम अपन बिश्वास छोड देहओ?

⁶² उइसो हए कहेसे मए, आदमीको लौंणाके उपर स्वर्गमे जात देखैगे, जहाँ मए पहिले रहओं, तओ तुम का करैगे?

⁶³ जीबन देन बारो परमेश्वरको आत्मा हए, शरीरए कुछु फाइदा नाए होत हए। जौन बचन मए तुमरे सँग मस्कनडटो हओं बो आत्मा और जीबन हए।

⁶⁴ पर तुम मैसे बहुत जनै हएं जो मोएमे बिश्वास नाए करत हएं।” काहेकी बिश्वास नाए करन बारे कौन-कौन हएं, और बाके धोखा कौन देहए कहिके येशूके सुरुवएसे पता हए।

⁶⁵ तओपिच्छु येशू फिर कही, “जहेमारे मए तुमसे कहो हओं, मिर दौवा परमेश्वर मिर ठिन आन बारो मन नाए देनतक कोइ फिर मिर ठिन नाए आएपाबैगो।”

पत्रुसको बिश्वास

⁶⁶ बहे बेरासे येशूके चेला मैसे बहुत बाके सँग नेगन छोडीं।

⁶⁷ येशू बाह्रऔ चेलनसे पुछी, “का तुम फिर मोके छोडके जाबैगे?”

⁶⁸ सिमोन पत्रुस जबाफ दइके कही, “हे प्रभु, हम काके ठिन जाएं? तुमरसँग कभी फिर नाश नाए होन बारो जीबनको बचन हए।

⁶⁹ और हम बिश्वास करेहएं, और जाने हएं, कि तुमही परमेश्वरके तरफसे आएभए परमेश्वरको पबित्र सेवक हओ।”

⁷⁰ येशू बिनके जबाफ दइके कही, “का मए अपनए तुमके बाहृऔ जनैके नाए छानो? तहुँफिर तुम मैसे एक जनै शैतानके अधिकारमे हए।”

⁷¹ येशू जा बात सिमोन इस्करियोतको लौंणा यहूदा इस्करियोतसे कही रहए, काहेकी बाहृऔ चेला मैसे एक जनै रहए, जौन येशूके धोखा देन तयारीमे रहए।