याकूब 3 - राना थारु नयाँ नियम

जिभके तहा लगानके आदेश

¹ हे मेरे बिश्वासी ददाभइयओ, तुम मैसे बहुत जनै परमेश्वरको बचनसे सन्देश देन बारे मतबनओ। काहेकी तुम जानतहओ, कि दुस्रेनके तुलनामे हमर न्याय बहुत कर्रो होबैगो।

² हम सब बहुत भुल करत हएं। पर अपनो कहो भओ बातमे गल्ती नाए करन बारे आदमी नेहात्तओ सिद्ध आदमी हएं। और बो अपनो सारे कामके अधिनमे करनमे सक्षम होतहए।

³ जब हम अपने अधिनमे करनके ताहीं घोडाके मुँहुँमे लगाम लगात हएं, तओ जीतए मन लागो उतै हम लैजानके सकत हएं।

⁴ देखओ, पानीजहाज जो तेज हबासे चलत हएं, बे बणे-बणे हुइके फिर एक छोटो डबनाके द्वारा नैयाँके इच्छा अनुसार घुमए सकत हए।

⁵ उइसीयए जिभ फिर एक छोटो अंग हए, पर बडे-बडे बातमे घमण्ड करत हए। देखओ, छोटोसे-छोटो आगीकी चिँल्गी फिर बडोसे-बडो जंगलके जलाए देतहए।

⁶ जिभ एक आगी हानी हए, जा शरीरको बो भाग हए, जो बहुत दुष्ट हए, और जा एक आदमीको पुरो शरीर नाश करदेत हए, जा नरककी आगीसे लैके हमर पुरो जिन्दगिमे आगी लगाए देतहए।

⁷ आदमी सब जंगली जानबर या घिसटन बारे जन्तु और समुन्दरके जीवजन्तुनके तहा लागए सकत हए, और तहा लगाए फिर हए।

⁸ पर जिभके कोइ आदमी फिर अधिनमे नाए करपाइहए। जिभ दुष्ट, तहा नाए लगन बारो और एक साँपको बिष कता बहुत हानिकारक होतहए।

⁹ जहे जिभसे हम प्रभु और दौवा परमेश्वरको स्तुति करत हएं, और जहे जिभसे परमेश्वरको रुपमे सृष्टि करेभए आदमीनके सराप देत हएं।

¹⁰ एकए मुँहुँसे आशिष और सराप दुनौ निकरत हएं। हे मेरे बिश्वासी ददाभइयओ, अइसो नाए होन पणो।

¹¹ नेहात्तओ, कोइ एकए कुँइँयाँसे करुवान बारो पानी और मिठो पानी दुनौ नाए निकरत हए।

¹² हे बिश्वासी ददाभइयओ, अञ्‍जीरको पेणमे जैतून, या अंगुरको हँगामे अञ्‍जीर नाए फर पाबैगो। उइसीयए नुनाइन पानीको कुँइँयाँसे मिठो पानी नाए निकर पाबैगो।

सच्चो बिबेक

¹³ तुम मैसे बुद्धिमान और समझदार कौन हए? अगर तुम हओ कहेसे, तुम अपनो असल चालचलनसे और बुद्धिसे आन बारो नम्रताको काम करके दिखान पणो।

¹⁴ पर अगर तुम अपने-अपने मनमे बहुत जलन होनो और स्वार्थ हए, कहेसे तुमर घमण्ड एक झुटो हए, जौन सच्चाईके लुकात हए।

¹⁵ जा बुद्धि परमेश्वरसे नाए आओ हए। पर जा त संसारिक स्वार्थसे भरो हए, और शैतानके घेनसे आत हए।

¹⁶ जहेमारेकी जहाँ जलन करन बारे और स्वार्थी होत हएं, हुवाँ अशान्ति और हर मेलके दुष्ट बात होत हएं।

¹⁷ पर जो ज्ञान परमेश्वरसे आतहए, बो त पहिले पबित्र होतहए; फिर शान्ति देन बारो, कोमल, सुधो, कृपापूर्ण, और अच्छो फलसे भरो भओ, बिना भेदभाबको और बिना कपटको होतहए।

¹⁸ और जो मेलमिलाप करन बारे हएं, बे शान्तिके बीज बोमंगे और धार्मिकताकी फसल काटंगे।