गलातियों 4 - राना थारु नयाँ नियम

ख्रीष्टमे परमेश्वरको बिजय लौंणा

¹ मोके जा उदाहरणके द्वारा सम्झानके देओ; कि लौंणा अपनो दौवाको सम्पतिको मालिक होइगो, पर जब तक बो छोटो रहात हए, तबतक बो एक कमैया कता होतहए और जामे अधिकार फिर नाए रहात हए। पर पिच्छु बो लौंणा बो सबकुछको मालिक बनैगो, जो बोको दौवाको हए।

² जबतककी दौवासे निर्णय करो भओ समय पुरा नाए होत हए, तबतक बो लौंणा अइयादौवा और रेखदेख करन बारे अधिकारके अधीनमे रहात हए।

³ उइसीयए हम फिर बहे लौंणा हानी रहएं। हम बेहीं रिति-रिबाज और नियमके अधीनमे रहएं, जो जा संसारमे हएं।

⁴ पर जब बो समय आओ जोको योजना परमेश्वर बनाइ रहए, तओ परमेश्वर अपनए अपनो लौंणाके जा संसारमे पठाइ, और एक बैयर बाके जनम दइ, और बा एक यहूदी समुहके रुपमे जन्मो रहए और मोशाको नियम कानुनके पालन करत रहए।

⁵ ताकी बा हमके छुटकारा कर पाबए, जो मोशाको नियम कानुनके अधीनमे रहात रहएं। और बा हमके अपनुवए बच्चाके रुपमे बनाएलै।

⁶ काहेकी हम बाके सन्तान हएं, जहेमारे परमेश्वर अपनो लौंणाको आत्माके हमरे हृदयमे पठाइ हए, जो आत्मा परमेश्वरके “हे अब्बा, हे दौवा” कहिके कहात हए।

⁷ जहेमारे, अब हम कमैया नाए हएं, पर हम परमेश्वरके लौंणा बनिगए हएं; काहेकी हम परमेश्वरके लौंणा हएं, तओ बा हमके बे सब कुछ देबैगो, जो बाके ठिन बाके लौंणाके ताहीं हएं।

मण्डलीके ताहीं पावलको चिन्ता

⁸ बिते समयमे जब तुम परमेश्वरके नाए जानत रहओ, तुम बे चिजनके कमैया रहओ, जो ईश्वर नाए हएं।

⁹ जबकी परमेश्वरके सँग तुमर सम्बन्ध हए, और परमेश्वर हमके अपनो लौंणाके रुपमे स्वीकारलै हए। तहुँफिर तुम कमजोर और गैर कामके गुरुको कमैया बननके ताहीं काहे लौटरहे हओ? का तुमके दुबारा उन्हींनको कमैया बननके इच्छा हए?

¹⁰ तुम गैर-बिश्वासी मोशाको नियम कानुनमे दओ गओ आज्ञाके अनुसार दिन, महिना, मौसम और सालके मानत हओ।

¹¹ मोके चिन्ता हए, कि तुम जो काम करत हओ, बोसे मए तुमर बीचमे करो सेवाकाइ व्यर्थ हुइहए।

¹² हे बिश्वासी ददाभइया, तुमर जैसे बननके ताहीं, मए बो यहूदी नियम कानुनके पालन करनके छोडदओ, जौनको मए पालन करत रहओं। जहेमारे अब मए तुमसे बिन्ती करत हओं, कि मेरे कता बन्जाबओ और बो यहूदी नियम कानुनके पालन मत् करओ; तुम मिर अच्छेसे रेखदेख करे।

¹³ तुमके पता होबैगो, कि जब मए पहिलो चोटी तुमर ठिन अच्छो समाचारको परचार करनके आओ तओ मए बिमार रहओं।

¹⁴ और जबकी मए बिमार रहओं, तओ तुम परेसान रहओ, पर तहुँफिर तुम मोके घृणा नाएकरे और नए त मोके दुर करे। तओ तुम परमेश्वरको एक स्वर्गदूतके अथवा येशू ख्रीष्टके ग्रहण करे कता तुम मोके ग्रहण करे।

¹⁵ बो समय तुम बहुत खुसी रहओ! तुमरी बो खुसी अब कहाँ हए? मए सचमे जा कहान सिकत हओं, कि तुम मेरे ताहीं सब कुछ बलि करदित्ते, हियाँतककी अपनी आँखी फिर।

¹⁶ और अब अइसो लगत हए, कि मए तुमर दुस्मन बनिगओ हओं, काहेकी मए तुमके सच्चो बात कहेरहो हओं।

¹⁷ झुठे गुरु तुमके अपने समुहसे सामिल करानके ताहीं पुरा कोसिस कर रहे हएं। पर उनको उदेश्य तुमर भलाइके ताहीं नाए हए; उनको उदेश्य जा हए, कि बे तुमके मोसे अलग करबान चाँहत हएं, ताकी तुम लगातार उनकी आज्ञाके पालन करओ।

¹⁸ हमेसा अच्छे उदेश्यके ताहीं जोशिलो होन अच्छो होत हए। और केबल बहे समय इकल्लो नाए, कि जब मए तुमरसँग उपस्थित होत हओं।

¹⁹ मेरे छोटे बालका, जौनके मए प्रेम करत हओं, मए तुमर मारे कठिनाइसे गुजर रहो हओं, जैसे कि मए फिरसे तुमके जनम दइ रहो हओं, और मए तबतक जा कठिनाइसे गुजरतए रहामंगो, जबतककी तुम ख्रीष्टके बरोबर नाए बन्जाओ।

²⁰ मए चाँहत हओं, कि अब मए तुमरसँग रहामओं ताकी मए तुमसे नम्र तरिकासे बात करपामओं, काहेकी मए तुमर ताहीं बहुत चिन्ता करत हओं।

हागार और साराको तुलना

²¹ और तुम, जो मोशाको नियम कानुनको अधिन होन चाँहत हओ! मेरी बात सुनओ! मए तुमके बतामंगो, कि मोशाको नियम कानुनको किताबमे का लिखो हए।

²² पबित्र-शास्त्रमे जा लिखो हए, कि अब्राहामके दुई लौंणा रहएं; बोको एक बच्चाको जनम हागारसे भओ रहए, जो एक टाहलुनिया रहए। और दुस्रो बच्चाको जनम सारासे भओ रहए, जो टाहलुनिया नाए रहए।

²³ अब्राहामको लौंणा, जो बक टाहलुनिया बैयर हागारसे भओ रहए, बो आदमीको योजनासे जनमो रहए। पर अब्राहामको दुस्रो लौंणा जो बोकी बैयर सारासे मिलो रहए, बोको जनम परमेश्वरको प्रतिज्ञाको पुरा होनको परिमाण स्वरुप भओ रहए।

²⁴ जे दुनौ बैयर परमेश्वरके दुई बच्चनके ताहीं एक कहानीके रुपमे काम करत हएं। जे बैयरसे दुई मेलके करार हएं, एक बैयर सीनै पहाडसे बच्चनके जनम देतहए, जो टहालुवा बनतहएं; और बो हागारसे हए।

²⁵ हागार सीनै पहाडके दर्शात हए, जो अरब देशमे हए। बो आजको यरूशलेम सहर कता हए, जौनके आदमी मोशाको नियम कानुनके गुलाम हएं।

²⁶ पर स्वर्गको यरूशलेम अब्राहामकी बैयर सारा कता हए, और बोको लौंणा टहालुवा नाए हएं। जा यरूशलेम हमरी अइया कता हए, जो बिश्वास करत हएं।

²⁷ काहेकी पबित्र-शास्त्र कहात हए, “हे स्त्रीयओ तुमर जौनको कभी बच्चा नाए भओ हए, और जौन बच्चाके जनम देनको पिडाके कभी फिर महसुस नाए करेहओ, खुसी होबओ, चिल्लाओ और आनन्दसे उत्साहित होबओ, काहेकी लोगा होन बारेनसे लोगा नाए होन बारेनके जद्धी सन्तान होमंगे।”

²⁸ हे मेरे बिश्वासी ददाभइयओ, अब्राहामको लौंणा इसहाक कता जो परमेश्वरके प्रतिज्ञाके अनुसार पैदा भओ रहए, हम फिर परमेश्वरके प्रतिज्ञा अनुसार परमेश्वरके सन्तान बने गए हएं।

²⁹ और बो समय, बो लौंणा जो आदमीनको योजनाके अनुसार जन्मो रहए। बो बहे लौंणाके परेसान करत रहए, जो परमेश्वरको आत्माके सामर्थसे पैदा भओ रहए। उइसीयए, अब हम बे आदमीनसे परेसानीको सामना कर रहे हएं, जो चाँहत हएं, कि परमेश्वरके सँग सही ठहिरनके ताहीं बे मोशाको नियम कानुनके पालन करत हएं।

³⁰ जाके बारेमे पबित्र-शास्त्र का कहात हए? “टहालुनिया बैयर और बोको लौंणाके दुर पठाएदे, काहेकी टहालुनियाको लौंणाके ठिन दौवाको सम्पति मैसे कुछु फिर नाए होनचाहो; जा दौवाक बैयरको लौंणाके मिलन चाहो जो टहालुनिया नाए हए।”

³¹ जो मए कहिरहो हओं, बोको निष्कर्ष जा हए: हे मेरे बिश्वासी ददाभइयओ, हम टहालुनिया बैयर, अर्थात् नियम कानुनके बच्चा नाए हएं, पर स्वतन्त्र बैयर अर्थात् बिश्वासके बच्चा हएं।