गलातियों 1 - राना थारु नयाँ नियम1 मए पावल, तुमके जा चिट्ठी लिखरहो हओं, और मोके चुनो भओ चेला होनके ताहीं आदमीनको कोइ फिर समुह या कोइ फिर आदमीसे नाए चुनो गओ हओं। पर येशू ख्रीष्टसे और दौवा परमेश्वरसे चुनो गओ हओं जौन येशूके मृत्युसे जिन्दा करी। 2 मए जा बे मण्डलीनके या बिश्वासी ददाभइयनको समुहके लिखरहो हओं, जो गलातिया परदेशमे हएं। 3 मए प्राथना करत हओं, कि हमर दौवा परमेश्वर और प्रभु येशू ख्रीष्ट तुमके अनुग्रह और शान्ति देबए। 4 हमर दौवा परमेश्वरकी इच्छाके अनुसार ख्रीष्ट येशू अपनए हमरे पापके ताहीं बलि हुइगओ, ताकी हम जा बर्तमान संसारके आदमीनके खराब प्रभावसे बचे रहिपामएं। 5 मए प्राथना करत हओं, कि परमेश्वरके सदासर्वदा महिमा होबए। आमेन! एकए अच्छो समाचार 6 मए दुखी हओं, कि परमेश्वर तुमके ख्रीष्टको अनुग्रहसे अपने आदमी होनके ताहीं बुलाइ बासे तुम इतनो जल्दी घुमिगए, और एक अलग शिक्षा जोसे कुछ आदमी “अच्छो समाचार” कहात हएं, और तुम बोके बिश्वास करनके या स्वीकार करनके सुरु करदए हओ। 7 सिरफ एकए इकल्लो सच्चो अच्छो समाचार हए, पर कुछ आदमी ख्रीष्टके अच्छो समाचारके नाश करनके चाँहत हएं, और बे आदमी तुमके धोखा दइ हएं। 8 पर अगर हम मैसे एक या स्वर्गसे तरे आओ भओ एक स्वर्गदूत फिर आएके हमर सुनाओ भओ अच्छो समाचारके बाहेक कोइ दुस्रो मेलको अच्छो समाचार सुनाबैगो कहेसे परमेश्वर उनके सदाकालको दण्ड देबैगो। 9 जैसे हम पहिले कहीडारे हएं, उइसीयए मए अभौफिर कहात हओं, कि बो अच्छो समाचारके छोडैगे, जोके तुम ग्रहण करेहओ, अगर कोइ और बोको बिपरित अच्छो समाचारके परचार करैगो कहेसे परमेश्वर बोके दण्ड देबैगो। 10 स्पष्ट रुपसे, मए आदमीनके खुसी करनके कोसिस नाए कररहो हओं, पर मए परमेश्वरके खुसी करन चाँहत हओं। मए आदमीनके खुसी करनके कोसिस नाए कररहो हओं, अगर मए अबतक आदमीनके खुसी करत रहितो तओ ख्रीष्टको दास नाए हुइतो। पावल कैसे येशूसे चुनो भओ चेला भओ 11 हे मेरे बिश्वासी ददाभइयओ, मए तुमके कहात हओं, कि जो अच्छो समाचार मए सुनात हओं, बो आदमीको सोँचमे अधारित नाए हए। 12 काहेकी मए जा अच्छो समाचार पुर्खनसे नाए सिखो और नए त कोइ धार्मिक गुरु मोके जा सिखाइ। पर येशू ख्रीष्ट मोके अच्छो समाचार सम्झनमे मदत करी। 13 तुम सुनडारे हओ, कि मए यहूदी धार्मिक नियमके अनुसार जीइत रहओं; और मए परमेश्वरको मण्डलीके बिश्वासीनके बहुत सताओ और बोके नाश करनके कोसिस करत रहओं। 14 और मए यहूदी समुहको धर्ममे, अन्य यहूदी समुह जो मेरेसे जद्धा उमरके अपने पुर्खानको शिक्षनके पढन और उनकी आज्ञा माननके ताहीं बहुत उत्सुक रहओं। 15 पर परमेश्वर मोएमे अपनो लौंणा प्रकट करनके पक्का करी जोमे मए गैर-यहूदीनमे परमेश्वरको लौंणाको अच्छो समाचार परचार करओं, परमेश्वर मिर जनम होनसे पहिलीयए मोके चुनलै और अपनो अनुग्रहसे बुलाए लइ। 16 मोएमे अपनो लौंणाके प्रकट करी, कि मए गैर-यहूदीनमे बाको अच्छो समाचार परचार करओं; और मए कोइके ठिन सल्लाह लेनके ताहीं नाए गओ। 17 और जो मोसे पहिले येशूसे चुनेभए चेला रहएं, उनसे मिलनके ताहीं मए यरूशलेम सहरमे नाए गओ, पर मए तुरन्त अरब देशमे चलो गओ, और हुवाँसे दुबारा दमस्कस सहरमे लौटके आओ। 18 फिर तीन बर्ष पिच्छु मए येशूसे चुनो भओ चेला पत्रुससे मिलनके ताहीं यरूशलेम सहरमे गओ, और बोकेसँग पन्ध्र दिनतक रहो। 19 मए सिरफ एक चुनो भओ चेला और प्रभुको भइया याकूबसे मिलो। 20 परमेश्वर जानतहए, कि जो मए तुमके लिखरहो हओं, बो नेहात्तओ सच्चो हए। 21 जब मए यरूशलेम सहर छोडके सिरिया परदेश और किलिकिया परदेशमे गओ। 22 पर ख्रीष्टमे बिश्वासी जो यहूदिया परदेशके मण्डलीमे रहात रहएं, बे मोके कभु भेँटी नाए रहएं। 23 पर बे सुनत रहे, कि एक समयमे जो हमके सतान बारो रहए, अब येशू ख्रीष्टमे बहे बिश्वासको अच्छो समाचार परचार करत हए, जोके बो नाश करनके कोसिस करी रहए। 24 और जहेमारे परमेश्वर मेरे सँग जो करी, बोके ताहीं ख्रीष्टके बिश्वासी परमेश्वरके लगातार महिमा करतए रहएं। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation