कलस्सी 4 - राना थारु नयाँ नियम

ख्रीष्टको अनुग्रह

¹ हे मालिकओ, अपने-अपने कमैयनके सँग बिना पक्षपात करे अच्छो ब्यबहार करओ, जा समझके कि स्वर्गमे तुमर फिर एकए इकल्लो मालिक हए।

² जब तुम प्राथना करत हओ तओ लगातार जागा रहाओ, और सदिमान परमेश्वरके धन्यबाद देओ।

³ और जाके सँगएसँग हमरे ताहीं फिर प्राथना करत रहाओ, कि परमेश्वर हमएं बचन सुनानको मौका देबए, और हम ख्रीष्टको बो रहस्यके बारेमे व्याख्या करपामएं, जौनके कारण मए पावल अभए जेलमे हओं, काहेकी मए जा सन्देशके परचार करो।

⁴ और मेरे ताहीं तुम प्राथना करदेओ, कि मए ख्रीष्टको रहस्य सफा और खुला रुपसे कहीपामओं।

⁵ गैर-बिश्वासीके सँग भलाइ करनके ताहीं सबए मौकाके सदुपयोग करओ।

⁶ उनसे हमेसा नम्र हुइके बातचित करओ, और अइसो बात करओ, कि बो तुमर बातमे ध्यान देबए। अगर तुम अइसो करे कहेसे तुमर बिश्वासके बारेमे तुमके प्रश्न करन बारेनके कैसे जबाफ देनके हए, सो तुम सिखजाबैगे।

अन्तिम नमस्कार

⁷ प्यारो बिश्वासी भइया, तुखिकस जो प्रभुमे मेरे सँग काम करत हए, बो मेरे सब बात तुमके बताए देहए।

⁸ तुखिकसके मए जाकेमारे तुमर ठिन पठाओ हओं, कि तुम बोसे जान पाबैगे कि हमर सँग का हुइ रहो हए, और बो तुमके बिश्वासमे मजबुत करैगो।

⁹ और बोकेसँग ओनेसिमसके फिर पठाओ हओं, जो बिश्वासयोग्य और प्यारो बिश्वासी भइया हए और बो तुम्रीयए गाउँसे हए, बे तुमके सबए बात बताए देहएं।

¹⁰ अरिस्‍तार्खस जो मेरे सँग जेलमे हए, और यूहन्ना मर्कूस जो बारनाबासको भइया लगत हए। मए जानत हओं, कि तुमके पहिलीयए यूहन्ना मर्कूसके बारेमे एक चिट्ठी मिलो हए, कि अगर बो तुमर ठिन आए, तओ बोसे अच्छेसे स्वागत करीयओ।

¹¹ और येशू फिर, जोके युस्तस कहात रहएं, तुमके नमस्कार पठाइ हए। खतना करेभए यहूदी बिश्वासी मैसे केबल जे तीन आदमी परमेश्वरको राज्यके ताहीं मेरे सँग काम करन बारे हएं और मोके उत्सहा देत हएं।

¹² इपाफ्रास जो तुमर गाउँसे हए, और ख्रीष्ट येशूको सेवक हए, तुमके नमस्कार कहात हए। और हमेसा तुमर ताहीं निरन्तर प्राथना करत हएं, ताकी तुम पुरा परिपक्का हुइके पुरा बिश्वासके सँग परमेश्वरके इच्छामे मजबुत हुइ पाबओ।

¹³ मए बोको साक्षी हओं, कि बो तुमर ताहीं और लाउडिकिया सहर और हिरापोलिस सहरके आदमीनके ताहीं प्राथना करत हए।

¹⁴ प्रिय बैदा लूका और डेमास फिर तुमके नमस्कार पठाइ हएं।

¹⁵ लाउडिकिया सहरके बिश्वासी ददाभइया और नुम्फास और बोको घरको मण्डलीके नमस्कार कहियओ।

¹⁶ और जब जा चिट्ठी तुमर ठिन पढोजाबैगो, तओ तुम बो चिट्ठीके फिर पढियओ जो मए लाउडिकिया सहरके मण्डलीके बिश्वासीनके लिखो रहओं।

¹⁷ तओ अर्खिप्पससे फिर कहियओ कि जो सेवा करनके ताहीं प्रभु तोके चुनी हए बोके पक्का कर, कि तए बो सेवाके पुरा करैगो।

¹⁸ मए पावल, तुमके नमस्कार करनके ताहीं चिट्ठीको जा हिस्साके अपने लिखावटमे लिखरहो हओं। याद करओ, कि मए जेलमे हओं, और मेरे ताहीं प्राथना करओ। परमेश्वरको अनुग्रह तुमरमे होतए रहाबए।