3 यूहन्ना 1 - राना थारु नयाँ नियम

शुभकामना

¹ मए, मण्डलीको अगुवा यूहन्ना जा चिट्ठी मिर प्यारो सँगी गायसके लिखरहो हओं, जोसे मए सच्चो प्रेम करत हओं।

² हे मेरो प्यारो सँगी, मिर प्राथना जहे हए, जैसे तए अपनो आत्माको उन्नति कररहो हए, उइसीयए तेरे सब काममे हमेसा भलो होबए, और तेरो शारीरिक स्‍वास्‍थ्‍य ठिक होबए।

³ काहेकी कोइ बिश्वासी ददाभइया आए, और हमके बताइं, कि तए परमेश्वरके सच्चो डगरके अनुसार जिइनडटो हए, जोमे तए नेहात्तओ चलत हए, जा सुनके मए गजब खुसी भओ।

⁴ जबही फिर मए जा सुनत हओं, कि बे आदमी, जो मेरे लौंणालौंणीया हानी हएं, बे बहे तरिकासे जिइनडटे हएं, जो सचमे परमेश्वर हमएं दिखाइ हए, तओ जा मोके औ खुसी बनाए देत हए।

अच्छो काम करनके ताहीं हौसला

⁵ हे मेरो सँगी, तए बिश्वासयोग्यतासे हमर बिश्वासी ददाभइयनको मदत करनके ताहीं बहुत चीज करो हए। और हियाँतककी तए बे आदमीनके फिर मदत करत हए, जौनके तए नाए जानत हए।

⁶ बे मैसे कुछ आदमी हियाँके मण्डलीके बिश्वासी बताइ हएं, कि तए अपने सँगी बिश्वासीनके कित्नो प्रेम करत हए। अब मए तोके कहान चाँहत हओं, कि जब बे तेरे ढिँगैसे जामएं, तोके बे आदमीनके लगातार मदत करन चाहो काहेकी जा परमेश्वरके खुसी करत हए।

⁷ काहेकी बे आदमी हर ठाउँमे यात्रा जहेमारे कररहे हएं, ताकी बे ख्रीष्टको नाउँके, आदमीनमे चिन्हाए पामएं। और अबिश्वासीनसे जे कोइ मदत नाए लेत हएं।

⁸ जहेमारे अइसे आदमीके स्वागत करन चाहो, ताकी हम सत्यके ताहीं उनके काममे सामिल हुइपामएं।

डियोत्रिफस और डेमेत्रियस

⁹ मए पहिले फिर तुमर मण्डलीके बिश्वासीनके एक चिट्ठी लिखो रहओं, पर डियोत्रिफस मिर आदेश स्वीकार नाए करत हए, काहेकी बो सदिमान अपनए मण्डलीको अगुवा बनन चाँहत हए।

¹⁰ जहेमारे अगर मए आमंगो, तओ तुमर अग्गु बोके द्वारा करेगए सब कामके स्पष्ट करदेमंगो, अर्थात् खराब-खराब शब्दके प्रयोग करत हमर उपर लगाएगए सब दोषके; इत्कए इकल्लो नाए, बे आएभए बिश्वासी ददाभइयनके स्वागत नाए करत हएं, और बिश्वासीनके स्वागत करनके रोकत हएं, और हियाँतककी बे उनके मण्डली मैसे बाहिर निकार देत हएं।

¹¹ हे मेरो प्यारो सँगी, बे आदमीनको देखासेखी मत् कर, जो खराब काम करत हएं, पर बे आदमीके देखासेखी कर, जो भलो काम करत हएं। अगर कोइ भलो काम करत हए, तओ जा दिखात हए, कि बो परमेश्वरको सन्तान हए। अगर कोइ खराब काम करत हए, तओ जा दिखात हए, कि बो परमेश्वरके नाए जानत हए।

¹² मण्डलीमे हर कोइ कहात हए, कि डेमेत्रियस एक अच्छो आदमी हए, काहेकी बो परमेश्वरको सत्य बचन अनुसार जीइत हए, और हम जा फिर कहात हएं, कि बो एक अच्छो आदमी हए, और तुम जानत हओ, कि हमर गवाही सत्य हए।

अन्तिम शुभकामना

¹³ बहुत बात हएं, जो मए तोके बतान चाँहत हओं, पर मए जा चिट्ठीमे अइसे लिखन नाए चाँहत हओं।

¹⁴ पर आसरा हए, कि मए तिर ठिन जल्दी आओं, और तोसे भेँटके बात करओं।

¹⁵ मए प्राथना करत हओं, कि परमेश्वर तोके शान्ति देबए। हियाँके बिश्वासी सँगी तोके अभिबादन पठाइ हएं, हुवाँके सब सँगीके अभिबादन कहीदिए।