2 तिमोथी 4 - राना थारु नयाँ नियमपरमेश्वरको बचनके परचार कर 1 जब येशू ख्रीष्ट राजाके रुपममे राज्य करन आबैगो, तओ बा जिन्दा और मरेभइनके न्याय करैगो। तभीमारे, परमेश्वर और येशू ख्रीष्टको साक्षीके रुपमे मए तोके अनुग्रह करत हओं, 2 कि तए परमेश्वरको बचनको परचार कर; चहुँ परिस्थिति अच्छो होए या खराब होए, सब परिस्थितिमे परमेश्वरको परचार करन मत् छोड। तोके बे आदमीको करोभओ गलत कामके दिखान पणैगो और डाँटन पणैगो। बिनके शिक्षा देत पेती शान्तिसे सम्झैए और हौसला दिए। 3 काहेकी अइसो समय आबैगो, कि आदमी सच्चो सन्देश स्वीकार करन नाए चाहंगे, पर बे अपनुयए इच्छाके इकल्लो पुरा करंगे। और बे अइसे गुरुके खोजमे हुइहएं, जौन बिनसे बहे बातके इकल्लो कहामंगे, जो बात बे सुनन चाहंगे। 4 और बे सच्चो कहानीके नाए सुनंगे, पर झुठी कहानीके सुनन चाहंगे। 5 जैसो फिर कठिनाइ आएसे फिर तोके शान्त रहान पणैगो और दुख उठान पणैगो, अच्छो समाचार परचार करनके ताहीं तोके कडी मेहेनत करन पणैगो, और जो परमेश्वर तोके दइ हए, बो कामके पुरा करन पणैगो। 6 मए तोके जे सब आज्ञा देत हओं, काहेकी मिर जीबन और मिर जीबनको बलिदान मैसे भओ परमेश्वरको काम दुनौ निभटन लागे हएं। और मए जानत हओं, कि जल्दीयए मए मरजामंगो। 7 जैसे एक अच्छो सिपाही युद्धमे कभी फिर हार नाए मानत हए उइसीयए मए फिर ख्रीष्टके ताहीं कर्रो मेहेनत करनके कभु नाए छोडो, मए सब काम पुरा करडारो हओं जौन काम करनके ताहीं येशू ख्रीष्ट मोके दइ रहए। ख्रीष्ट उपरको मिर बिश्वास कभु फिर नाए बदलैगो। 8 अब, परमेश्वर स्वर्गमे मेरे ताहीं एक मुकुट धरेपणे हए, काहेकी मए अपनो जीबनमे बाके खुसी करन बारो जीबन जिइयो हओं। हमर प्रभु येशू ख्रीष्ट जो धार्मिकताको न्यायधीश हए, जब बा लौटके आबैगो मोके बा मुकुट देबैगो। जो मुकुट बा मोके देबैगो बो मेरे ताहीं इकल्लो नाए हुइहए, बल्कि सबके ताहीं जो बाको लौटनको आसरा कर रहे हएं। ब्यक्तिगत बात 9 मेरे ठिन जल्दी आनके कोसिस कर। 10 काहेकी डेमास जा संसारमे भए चीजके प्रेम करत हए और थेसलोनिके सहरमे चलोगओ, और क्रेसेन्स भइया गलातिया परदेशमे गओ और तीतस दलमातिया परदेशमे चलोगओ हए। 11 लूका इकल्लो मेरे सँग हए जब तए आबैगो तओ मर्कूसके फिर अपने सँग लैके अइए; काहेकी बोके हियाँ मेरे काममे मदत करन पणैगो। 12 तुखिकसके मए एफिसस सहरमे पठाओ हओं। 13 जब तए आबैगो, तओ मिर कोट लैके अइए, जो मए त्रोआस सहरमे कार्पसके घरमे छोडो रहओं। और मेरे किताबनके लैके अइए, खास करके बे, जो भेंणाको खलरीमे लिखेहएं। 14 अलेक्जेन्डर जो लोहोरा रहए बो मोके बहुत तरिकासे मोके चोट पुगाइ हए। प्रभु बोके बोको दुष्ट कामके अनुसार बदला देबैगो। 15 तोके अलेक्जेन्डरसे अपनएके बचान पणैगो, काहेकी अलेक्जेन्डर ख्रीष्टको बारेमे हमर शिक्षाके बहुत बिरोध करी। 16 मोके पहिलो चोटी रोम सहरको न्यायधिसके अग्गु ठाणन पणो, काहेकी मोके दोष देन बारोके जबाफ देनके कोइ फिर मेरे पक्षमे साक्षी देनके नाए आए। बल्कि, बे सब मोके छोडदइं। मए प्राथना करत हओं, कि मोके छोडके जानमे परमेश्वर उनके क्षमा करैगो। 17 पर प्रभु मिर सँगमे रहो, और मोके शक्ति दइ; ताकी मए येशू ख्रीष्टके बारेमे स्पष्टसे अच्छो समाचारके परचार करके बे सब अन्यजाति सुनलेमएं; और जैसे आदमी एक भुखानो भओ बघटासे बच जातहए उइसी परमेश्वर मोके मरनसे बचाइ। 18 और प्रभु मोके हर एक खराबीसे बचाबैगो, और परमेश्वर मोके स्वर्गमे लैजाबैगो जहाँ बा राजाके रुपमे राज्य करत हए और बाको महिमा सदादिन होतए रहाबए। आमेन। अन्तिम अभिबादन 19 प्रिस्किला और अकिलासके और ओनेसिफरसके परिवारके मिर अभिबादन हए। 20 इरास्तस अभएतक कोरिन्थ सहरमे हए, और त्रोफिमसके मए मिलेटस सहरमे छोडो, काहेकी बो बिमारी रहए। 21 जाडोको मौसम आनसे पहिले आनके कोसिस कर। और हियाँ भए सब बिश्वासी भइया तोके अभिबादन पठाइ हएं। और युबुलस, पुडेस, लिनस, और क्लौडिया जे फिर तोके अभिबादन पठाइ हएं। 22 मए प्राथना करत हओं, कि प्रभु तेरे सँग रहाबए और बाको अनुग्रह फिर तेरे सँग रहाबए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation