2 तिमोथी 3 - राना थारु नयाँ नियम

अन्तिम दिनको चेतावनी

¹ तिमोथी, मए चाँहत हओं कि तए जा जानए, कि ख्रीष्टके लौटके आनसे पहिले अन्तिम दिनमे दुखके समय आमंगे।

² काहेकी आदमी सिरफ अपनएके माया करंगे, धनको लोभ करंगे, अपनएके बडे सम्झंगे, घमण्डी होमंगे, औरेन्के बदनाम करन बारो शब्द मस्कंगे, अइयादौवाको आज्ञा नाए मानंगे, धन्यबाद नाए देन बारे, अपबित्र होमंगे,

³ कोइके प्रेम नाए करन बारे, दुस्रेके माफी नाए देन बारे, दोष लगान बारे, अपन इच्छाके नियत्रण नाए करन बारे, हिंसा करन बारे, जो अच्छे हएं उनके हेल्हा करन बारे,

⁴ औरेन्के धोखा देन बारे, मनपरी करतए घमण्डसे फुलन बारे, अभिमानी और परमेश्वरको आराधना करन बारे नाए बल्कि मोज-मजाके प्रेम करन बारे होमंगे।

⁵ बे अइसे ब्यबहार करंगे जैसे बे नेहात्तओ परमेश्वरके सम्मान करत हएं, पर बे परमेश्वरकी शक्तिके उनको खराब जीबनके बदलनसे इन्कार करंगे; बे आदमीनसे बच।

⁶ जे मैसे कुछ आदमी पुरे परिवारके धोखा देत हएं और मुरख स्त्रीनमे नियन्त्रण करनके पाए जात हएं, जौनको दिल पापमे हए और सब मेलके चाहानाके अधिनमे हएं।

⁷ बे हमेसा नयाँ चीज सिखत रहात हएं, पर बे ख्रीष्टके बारेमे साच्ची शिक्षाके कभी नाए समझ पातहएं।

⁸ जे झुठे गुरु ख्रीष्टके बारेमे सच्चो सन्देशके घोषणा करनसे रोकनको कोसिस करत हएं, जैसे यान्नेस और याम्ब्रेस मोशाकी बिरोध करी रहएं। उनकी दिमाग भ्रष्ट हएं और बे नेहात्तओ ख्रीष्टमे भरोसा नाए करत हएं।

⁹ पर बे बहुत लम्बी समय तक आदमीनके धोखा नाए दइ पामंगे। काहेकी जैसे आदमी चिनलइ हएं, कि यान्नेस और याम्ब्रेस मुरख रहएं, अइसियए हरकोइ चिनलेबैगो, कि बे मुरख हएं।

तिमोथीके पावलको आदेश

¹⁰ पर हे तिमोथी, तए नेहात्तओ जानत हए, कि मए का सिखात हओं, और कैसे जीइत हओं, जीबनमे मिर योजना का हए और मए काहे बिश्वास करत हओं। तए जानत हएं, कि मए धिरज करत हओं, और सब आदमीमे प्रेम करत हओं, मए कठिनाइके सहो,

¹¹ आदमी मोके सताइं, जौनको कारण मए बहुत पिर सहो, और तए अइसे भयानक चीजके बारेमे जानत हए, जो आदमी मेरे सँग पिसिदिया परदेशको एन्टिओखिया सहरमे, आइकोनियन सहरमे और लुस्त्रा सहरमे सताइं और कैसे मए हुवाँ सतावटके सहो, और बे सबसे प्रभु मोके बचाइ।

¹² तए अच्छेसे जान्त हए, कि आदमी बे सब जनैके सतामंगे जो ख्रीष्ट येशूके अनुयायीके रुपमे जीबन जीइन चाँहत हएं।

¹³ पर दुष्ट आदमी और बे धोखेबाज आदमी औ जद्धा दुष्ट काम करंगे। बे आदमी प्रभुके धोखा देमंगे और बे अपनए दुस्रेके द्वारा धोखा खामंगे।

¹⁴ पर हे तिमोथी, तोके बोमे बिश्वास करतए रहान पणो, जो हम तोके सिखाए हएं, और तए बिश्वास करत हए काहेकी तए जानत हए और हमर उपर भरोसा करत हए। काहेकी तए जानत हए, कि तोके जे सच्चाई कौन सिखाइ हए।

¹⁵ और बच्चएसे तए पबित्र-शास्त्रके सिखो हए, जो तोके जा सम्झनमे मदत करत हए, कि जब तए येशू ख्रीष्टमे बिश्वास करत हए तओ परमेश्वर तोके बचात हए।

¹⁶ सब पबित्र-शास्त्र परमेश्वरके घेनसे हए, हमके जे सब बातको इस्तमाल, आदमीनके सच्चो शिक्षा सिखानके, गल्ती करन बारे आदमीनके डाँटनके, आदमीनके उनको गलत बानी सुधारनके और आदमीनके कैसे अच्छो जीबन बितानके हए कहिके कर सकत हएं।

¹⁷ ताकी परमेश्वरको सेवा करन बारो आदमी सब मेलके भले काम करनके ताहीं तयार और सक्षम होबए जैसेकी पबित्र-शास्त्रमे लिखो हए।