2 तिमोथी 2 - राना थारु नयाँ नियम

उत्तम योद्धा

¹ अन्तमे, मिर लौंणा तिमोथी, अपनएके हौसला दे, जा जानके, कि परमेश्वर तोके बहे अनुग्रह दइ हए, जो सिरफ येशू ख्रीष्टसे आत हए।

² तए मोके बहुत आदमीनके अग्गु ख्रीष्टके बारेमे सन्देशके सिखात सुनो हए। जहेमारे मए चाँहत हओं, कि तए फिर अन्य बिश्वासीनके सन्देश सिखाए, जोके उपर तए भरोसा करत हए, और बे दुस्रेनके फिर जा सन्देश सिखानके योग्यके होमंगे।

³ जैसे एक सिपाही धिरज हुइके युद्धको मैदानमे कठिनाइसे सहे करत हए, उइसी तोके फिर कठिनाइसे सहान पणैगो, जैसे हम ख्रीष्ट येशूके ताहीं दुख सहात हएं।

⁴ एक सिपाही जो सेना हुइके काम करत हए, बो एकए समयमे कोइ और काम नाए करत हए, काहेकी बो अपनो सेनापतिके खुसी करनके चाँहत हए।

⁵ अइसियए जब एक आदमी दुस्रेके बिरुद्ध दौडमे भाग लेतहए, तओ अगर बो दौडको नियमके पालन नाए करत हए, तओ कोइ फिर बोके इनाम नाए देबैगो।

⁶ जो किसानदार मेहेनत करत हए, बो आदमी बालीको हिस्सा पानके हकदार हए।

⁷ जाके बारेमे सोँचओ, कि जा उदाहरण का सिखात हए, और प्रभु तुमके जे सब बातके सम्झनमे मदत करैगो।

⁸ लगातार येशू ख्रीष्टके बारेमे सम्झत रहाओ, जो राजा दाऊदको बंशको हए। और परमेश्वर बाके मरो भओ मैसे जिन्दा करी; और जा बहे अच्छो समाचार हए, जो मए आदमीनके बीचमे परचार करत हओं।

⁹ मए जेलमे एक अपराधी कता दुख सहिरहो हओं, काहेकी मए अच्छो समाचारको परचार करत हओं। पर कोइ फिर आदमी परमेश्वरको बचन परचार करनसे रोक नाए पाबैगो।

¹⁰ जहेमारे मए बे आदमीके फाइदाके ताहीं सब दुख सहात हओं, जौननके परमेश्वर चुनी हए, ताकी बे फिर येशू ख्रीष्ट उपर बिश्वास करएं, और बच पामाएं, और बहे महिमा प्राप्त करएं, जो हमेसा रहात हए।

¹¹ जा एक साच्ची कहानी हए, कि अगर हम ख्रीष्टके सँग मरे गए हएं, तओ बाके सँग जिन्दा फिर होमंगे।

¹² अगर हम ख्रीष्टके ताहीं दुख सहात हएं, तओ हम बाके सँग राजा कता राज्य फिर करंगे; पर अगर हम बाके जाननसे इन्कार करंगे कहेसे ख्रीष्ट फिर हमके इन्कार करैगो।

¹³ अगर हम ख्रीष्टमे बिश्वासयोग्य नाए हएं कहेसे तहुँफिर ख्रीष्ट हमरे ताहीं बिश्वासयोग्य हए, काहेकी ख्रीष्ट जो बोलत हए बहे करत हए।

परमेश्वरद्वारा चुनो भओ कामदार

¹⁴ जे बातके अपने बिश्वासीनके घरी-घरी सिखा, जो मए तोके बताओ हओं। और परमेश्वरके एक साक्षीके रुपमे धरतए तोके उनके चेतावनी देन चाहो, कि बे शब्दके अर्थके बारेमे बिबाद नाए करएं। जे प्रकारके बिबाद कोइके मदत नाए करत हए। बल्कि जा बेहीं आदमीनको बिश्वासके नुक्सान पुगात हए, जो जाके सुन्तहएं।

¹⁵ कडी मेहेनत कर, ताकी तए अपनएके परमेश्वरके अग्गु अइसो आदमीके रुपमे दिखाए पाबए, जोसे बे ग्रहण करपामएं। एक अइसो कामदार हानी बन, जो अच्छेसे काम करत हए, और जोके अपनो कामके कारण सर्मान नाए पणत हए, और जो सत्यको बचनके सही रितिसे काममे लात हए।

¹⁶ पर अधर्मी और फाल्तु बात करनसे बचो रहो; काहेकी व्यर्थ बातके मत् सुन, जो परमेश्वरसे कोइ सम्मान नाए देतहए। अइसे मेलके बात आदमीनके परमेश्वरसे और जद्धा दुर जानको कारण बानत हए।

¹⁷ उनके बात फैल जामंगे और अन्तमे बे आदमीनको बिश्वासके नाश करदेमंगे, जैसे एक खुल्ला रुपमे रहो भओ दुखौनो फैलत हए, और दुस्रो आदमीके संक्रमण करत हए। उन मैसे हुमेनियस और फिलेतस उइसियए हएं।

¹⁸ बे सच्चाईमे बिश्वास करन बन्द करदइ हएं। बे कहात हएं, कि परमेश्वर पहिलीयएसे मरे भए बिश्वासीनके अनन्त जीबनके ताहीं मरके जिन्दा हुइगओ हए। परिमाण स्वरुप, बे कुछ बिश्वासीनके ख्रीष्टको शिक्षामे बिश्वास करनसे रोक रहे हएं।

¹⁹ तहुँफिर परमेश्वरके आदमी एक जग हानी हएं, जो हमेसा बिश्वासमे बने रहात हएं। जा जगमे जे मेलको शब्द लिखे रहात हएं: “प्रभु जानत हए, कि बाके आदमी कौन हएं” और जा फिर कि “जो कोइ फिर परमेश्वरको आराधना करत हए, बोके खराब काम करनके बन्द करदेन पणो।”

²⁰ कोइ फिर बडो घरमे मेल-मेलके बर्तन होत हएं। हुवाँ सोनो और चाँदीके बर्तन इकल्लो नाए होत हएं, बल्कि कट्ठा और मट्टीके बर्तन फिर होत हएं। कुछ बर्तनको इस्तामल खास अबसरके ताहीं करोजात हए और अन्य बर्तनको इस्तामल साधारण उदेश्यके ताहीं करोजात हए।

²¹ अइसियए, जो बिश्वासी अपनएके बे सब खराब कामके अलग करैगो, तओ बाको जीबन पबित्र रहबैगो और बो मूल्यवान भाणा-बर्तन कता होबैगो जो खास अबसरके ताहीं इस्तमाल करोजात हए, और जहेमारे बो अपनो मालिकके ताहीं उपयोगी होबैगो।

²² जहेमारे, बे पापी इच्छनसे बच, जो जवान आदमीनके आकर्षित करत हए और जो शुद्ध मनसे प्रभुको नाउँ लेतहए, और उनके सँग परमेश्वरके अग्गु ठिक ठहिरन बाली बातके, बिश्वासके, प्रेमके, और जो शुद्ध मनसे प्रभुकी आराधना करत हए, उन्हिनके सँग लग।

²³ पर नाए जानन बारो मुरख बातसे दुर रहो; काहेकी तए जानत हए, कि जे बातसे लडाइ होत हएं।

²⁴ और प्रभुके दासके लडाइ करन बारो नाए होनचाहो, पर बोके सबके सँग दयालु होनके चाहो, परमेश्वरको बचनके स्पष्ट रितिसे सिखानमे सक्षम होनके पणो और आदमीनके सँग धिरज करन पणो।

²⁵ बोके नम्रतासे बे आदमीके सही करन पणो, जो बोको बिरुद्धमे हएं, शैतान जे आदमीनके फसाएलै हए और उनसे अपनी आज्ञापालन कर्बात हए। पर साइत परमेश्वर उनके पश्‍चात्ताप करनके और ख्रीष्टके बारेमे सच्चाईके जाननमे मदत करैगो, ताकी बे होसमे आमएं और बोसे दुर हुइजामएं।

²⁶ और जे आदमी फिरसे स्पष्ट रितिसे सोँचनको लायक होमंगे और शैतानको धोखासे बच जामंगे, जोकी एक जार कता हए। शैतान उनके फसाए डारी हए, ताकी उनसे बहे कर्बाबए जो शैतान चाँहत हएं, कि बे करएं।