2 थेसलोनिकी 3 - राना थारु नयाँ नियम

प्राथनाके ताहीं अनुरोध

¹ अन्तमे हे मेरे बिश्वासी ददाभइयओ, हमर ताहीं प्राथना करे करओ, ताकी हम जल्दीयए हर ठिहामे प्रभु येशू ख्रीष्टके बारेमे सन्देशके फैलाए पामएं और आदमी जामे उइसी बिश्वास करएं जैसे तुम करे हओ।

² और प्रार्थना करओ, कि परमेश्वर हमके बचाबए ताकी जे अन्धकारके दुष्ट आदमी हमके नुक्सान नाए करपामएं। काहेकी बहुत आदमी, जो प्रभु येशूके बारेमे सन्देशके सुनत हएं, जामे बिश्वास नाए करत हएं।

³ पर तुम परमेश्वरमे भरोसा कर सकत हओ। परमेश्वर तुमके आत्मिक रुपसे स्थिर करैगो और तुमके शैतानसे बचाबैगो।

⁴ और हमके प्रभुमे तुमर भरोसा हए, कि हम तुमके जो कुछ करनके कहे हएं, तुम उइसी कर रहेहओ और करतए रहाबैगे।

⁵ हम प्राथना करत हएं, कि प्रभु येशू ख्रीष्ट तुमके जा सम्झनको लायक बनाबए, कि परमेश्वर तुमके कित्नो प्रेम करत हए। और तुम अइसे सहाओ, जैसे येशू ख्रीष्ट सही।

अल्छीके चेतावनी

⁶ हे मेरे बिश्वासी ददाभइया, हम तुमके बहे अधिकारसे आज्ञा देत हएं जो येशू ख्रीष्ट हमके दइ, कि अइसे कोइ फिर भइया या बहिनियासे मेलमिलाप मत् करओ, जो अल्छी हएं, और जो हम तुमके सिखाए बे आदेशको पालन नाए करत हएं।

⁷ काहेकी तुम अपनए बहुत अच्छेसे जानत हओ, कि तुमके अइसियए जीइनके पणो जैसे हम जीइत रहएं; काहेकी जब हम तुमर बीचमे रहात रहएं, तओ हम अल्छी नाए रहएं, बल्कि काम करत रहएं।

⁸ हम कोइकी रोटी सेतएमे नाए खाए। पर मेहेनत और कष्टसे रातदिन काम धन्धा करत रहएं, ताकी हमके जो चीजको जरुरत होए, बोके पुरा करनके ताहीं तुम मैसे कोइमे निर्भर नाए पणएं।

⁹ हम बहुत मेहेनत जाकेमारे नाए करे, कि हमर ठिन मदत माँगनके अधिकार नाए रहए। पर हम जा कारणसे मेहेनत करे, जोसे हम तुम्रे ताहीं नमुना बनपामएं, ताकी तुम हम्रीए कता ब्यबहार कर्पाबओ।

¹⁰ और जब हम तुमरसँग रहएं, तओ हम तुमके घरी-घरी कहात रहएं: “अगर कोइ फिर काम करनसे मनाही करत हए, तओ बो आदमीके खानु खानके मतदेओ।”

¹¹ हम सुनत हएं, कि कित्नो आदमी तुमर बीचमे अल्छी चाल चलत हएं, और कुछ काम नाए करत हएं, पर बे लगातार दुस्रे आदमीको काममे बाधा लाए करत हएं।

¹² अइसे आदमीनके प्रभु येशू ख्रीष्टमे हम अधिकार दइके कहात हएं, कि बे धिरजसे अपनए काम करएं और अपने जीबन चलानके ताहीं रुपैया कमामएं।

¹³ और हे मेरे बिश्वासी ददाभइया, काहेकी तुम थकगए हओ तभीमारे जो सही हए बो करनके बन्द मत् करओ।

¹⁴ अगर कोइ हमर जा चिट्ठीको सन्देशके नाए मानए, तओ बे आदमीनके चिने रहाबओ और बिनसे मेलमिलाप मत् करओ, ताकी बो शरमको महसुस करए।

¹⁵ तहुँफिर बोके उपर अइसो काम मत् करओ जैसे तुम एक दुस्मनके उपर करत हओ। पर एक सँगी बिश्वासीके बराबर बोके चेतावनी देओ, कि जो बो करीहए अबसे उइसो नाए करए।

अन्तिम अभिबादन

¹⁶ मए प्राथना करत हओं, कि प्रभु जो शान्तिको स्रोत हए बा हर तरिकासे तुमके लगातार शान्ति देत रहाबए, और प्रभु तुम सबके सँग लगातार रहाबए।

¹⁷ मए पावल, तुमके नमस्कार करनके ताहीं चिट्ठीको जा हिस्साके अपने लिखावटमे लिखरहो हओं। मए अपने सब चिट्ठीको अन्त अइसे करके लिखत हओं ताकी सबके पता चलजाबए, कि जा चिट्ठी मेरे घेनसे हए।

¹⁸ मए प्राथना करत हओं, कि हमर प्रभु येशू ख्रीष्टको अनुग्रह तुमरसँग रहातए रहाबए।