2 पतरस 3 - राना थारु नयाँ नियम

प्रभुको दिन

¹ हे मेरे प्यारे सँगीउ, मए जे दुनौ चिठ्ठी तुमर ताहीं लिखो हओं, ताकी मए तुमके पहिले सिखाइ भइ बातके याद करबाए पामओं, और तुमर मनमे सफा बिचार जगाए पामओं।

² मए अइसे करत हओं, काहेकी अगमबक्ता बहुत समय पहिले बोलो भओ बचन और हमर प्रभु येशू ख्रीष्ट, हाम्रो मुक्तिदाताको शिक्षाके तुम याद करओ कहिके मए चाँहत हओं, जौन तुमर ठिन आएके चुनेभए चेला तुमके सिखाइ रहएं।

³ सबसे जरुरी बात, तुमके जानन हए कि अन्तिम दिनमे ख्रीष्ट दुबारा लौटके आनसे पहिले कुछ आदमी तुमके गिल्ला करंगे, काहेकी तुम बिश्वास करत हओ, कि ख्रीष्ट लौटके आबैगो। बे अपनो बानीके कारणसे गलत काम करंगे, जौन बिनके खुसी बनातहए।

⁴ और बे कहामंगे, “बा दुबारा लौटके आन प्रतिज्ञा करीहए, पर बा नाए आओ हए।” काहेकी हमर पहिलेके अगुवा सब मरिगए, पर अभौफिर कुछु परिबर्तन नाए भओ हए। संसारको सृष्टिसे चलो आओ कता आज फिर चलरहो हए।

⁵ बे जा कहामंगे काहेकी बे जा भुलनके चाँहत हएं, कि बहुत समय पहिले परमेश्वर अपनो बचनसे बादर और पृथ्वी बनाइ। बाको बचनसे बा पृथ्वीके पानीसे अलग करी और सुक्खा जमिनके पानीसे अलग करी।

⁶ बहे पानी द्वारा बा संसारके नष्ट करी, जौनको बो बेरा अस्तित्व रहए। बा बडो पानी पठाइ और जा पृथ्वीमे बहिया आइ और सब जीवित प्राणी नष्ट भए।

⁷ पर परमेश्वर बहे बचनसे बादर और पृथ्वी अभौफिर अस्तित्वमे धरे हए, ताकी बिनके आगीमे नष्ट करपाबए। बाको आज्ञा नाए मानन बारे आदमीनके बा न्याय और नष्ट करन बारो दिनके ताहीं बचाए पणे हए।

⁸ पर प्रिय हो, मए अभए कहानके जाए रहो बातके बेवास्ता मत् करओ: प्रभु एक दिनके ताहीं छोटो समयके रुपमे, और एक हजार बर्ष लम्बो समयके रुपमे नाए देखत हए। बा जे दुनौ एकए कता देखत हए।

⁹ कोइ आदमी सोँचत हएं, कि प्रभु अपनो दुबारा लौटके आन बारो प्रतिज्ञा पुरा करनके देर करनडटो हए। पर प्रभु बो किसिमसे देर नाए करनडटो हए। बरु बा तुमके धैर्य दिखाए रहो हए। काहेकी बा कोइके नाश करनके नाए चाँहत हए। पर सबए जनै अपनो मन बदलो और पाप करन छोडके परमेश्वर घेन घुमओ कहिके बा चाँहत हए, और जा परमेश्वरएसे आत हए।

¹⁰ पर ख्रीष्ट नेहात्तओ दुबरा लौटके आबैगो। बा चोर कता, नाए सोँचो भओ समयमे लौटके आबैगो। बो बेला बादरमे बडो अबाज होबैगो और बादर हराए जाबैगो। बादरमे भओ सूर्य, जोनी और तारा आगीसे पुरा रुपमे नष्ट होबैगो। बो दिन, आदमी पृथ्वीमे करोभओ सब कामके न्याय करनके ताहीं परमेश्वर प्रकट करैगो।

¹¹ जबकी परमेश्वर नेहात्तओ जे सब चिजनके नाश करदेबैगो, जैसेकी मए अभौफिर कहो हओं, जहेमारे तुमके नेहात्तओ ईश्वरीय तरिकासे ब्यबहार करन चाहो।

¹² तुम बो दिनको प्रतिक्षा करत पेती, जब परमेश्वर संसारको न्याय करन आबैगो, तओ बो दिन जल्दी आबए करके सबसे अच्छो काम करओ। बो दिन आगी जलैगो और बादर नष्ट होबैगो, और आगिकी आँच पृथ्वीमे भए सब चीजके पिघ्लाए देबैगो।

¹³ पर हम परमेश्वरको प्रतिज्ञा अनुसार नयाँ बादर और नयाँ पृथ्वीको आसरा करत हएं। हुना धर्मी आदमी इकल्ले रहामंगे।

¹⁴ जहेमारे प्रिय हो, परमेश्वर संसारको न्याय करन बारो दिनको तुम प्रतिक्षा करत पेती तुम पबित्र और खोट नाए भओ होन और बाके सँग शान्तिमे बैठनके सबसे अच्छो कम करन पणत हए।

¹⁵ हमर प्रभुके धैर्य होनको कारण जानओ, काहेकी बा आदमीनके पक्षताप करनको समय देन चाँहत हए, ताकी बा उनके बचाए पाबए। जब हम प्रेम करन बारो, हमर सँगी बिश्वासी पावलके परमेश्वर जो बुद्धि दइ हए, बहे बुद्धिके इस्तमाल करके तुमके जो चिट्ठी लिखी रहए, बो फिर जे बात कही जो मए तुमके कहो रहओं।

¹⁶ बा बिश्वासीनके ताहीं लिखो भओ अपनो सबए चिट्ठीनमे, बो बहे बात लिखी जौन बात मए तुमके लिखो रहओं। पर बो अपनो चिट्ठीनमे लिखेभए कोइ-कोइ बात बुझन अग्ठे हएं। जो आदमी अच्छेसे नाए सिखे हएं, और जो बिश्वासमे पक्को नाए हएं, बे पबित्र-शास्त्रमे भए दुस्रे खण्डके गलत तरिकासे ब्याख्या करे कता, बे जे अग्ठे बातनके ब्याख्या गलत तरिकासे करत हएं। अइसो करके बे अपनए परमेश्वरसे नष्ट हुइहएं।

¹⁷ जहेमारे प्रिय हो, तुमके पहिलीए पता हए, कि जे बात होमंगे। जहेमारे होसियार रहाओ ताकी नियम कानुन नाए मानन बारे आदमी तुमके झुट बोलके नाए बहकामएं। अगर तुम बिनको देखासेखी करे कहेसे, तुम सच्चो बातमे बिश्वास करनके बन्द करदेबैगे।

¹⁸ पर तुम लगातार हमर प्रभु और मुक्तिदाता येशू ख्रीष्टको अनुग्रहके बहुतसे बहुत अनुभव करे रहान पणत हए, और बाके बारेमे तुमर सम्झना बढन जरुरी हए। बाके अभए और सदासर्वदा प्रसंसा होए। आमेन।