2 कोरिन्थी 8 - राना थारु नयाँ नियम

दान कैसे देन पणत हए

¹ हे मेरे बिश्वासी ददाभइयओ, परमेश्वर माकेडोनिया परदेशके मण्डलीके बिश्वासीनके करोभओ अनुग्रहके बारेमे हम तुमके कहान चाँहत हएं।

² जब बे बहुत कष्ट द्वारा परीक्षामे पणे, तओ बे बहुत आनन्दित भए और बे बहुतए गरीब होएसे फिर बे दुस्रे बिश्वासीनके मन खोलके मदत करन दान दइं।

³ काहेकी मए गवाही देत हओं, कि बे अपनो औकात अनुसार और अपनो औकातसे जद्धी फिर अपनुवए राजीखुसीसे दइं।

⁴ बे यरूशलेम सहरमे भए सन्तके मदतके ताहीं सहभागी होन मौका पामओं कहिके हमके बिन्ती करीं।

⁵ और हम सोँचे नाए रहएं, कि बे अइसे दइपए हएं। पर बे पहिले अपनएके प्रभुके ताहीं और पच्छु हमर ताहीं सौप दइं, जैसे परमेश्वर बिनके द्वारा करो चाँहत रहए।

⁶ जहेमारे तीतस अग्गुवएसे तुमर बीचमे जा दान उठानको काम सुरु करेके कारणसे बोके पुरा फिर करएं कहिके हम बोके बिन्ती करे।

⁷ पर जैसी सब बातमे तुम बढके गए हओ, अर्थात् बिश्वासमे, परचार करन या शिक्षा देनमे, ज्ञानमे, सबए जोसमे और हमर घेनको तुमर प्रेममे, उइसीयए गरीब बिश्वासीनके दान देनो जा काममे फिर बढतए जाओ।

⁸ जा मए तुमर ताहीं आज्ञा नाए बनाओ हओं, बल्कि औरे आदमी मदत करनके कित्नो इच्छुक हएं, और औरेनको जोससे तुलना करके तुमर प्रेम फिर सच्चो हए कहिके साबित करनके ताहीं मए जा कहो हओं।

⁹ तुम हमर प्रभु येशू ख्रीष्टको अनुग्रह जानत हओ, कि बा धनी हुइके फिर तुमर ताहीं कंगाल बनिगओ ताकी बाके कंगाल हुइजानसे तुम धनी हुइजाबओ।

¹⁰ पोर साल तुम दान देनो कामसे सबसे अग्गु इकल्लो नाए, बल्कि अइसो काम करनको इच्छामे फिर तुम सबसे अग्गु रहओ। जाके बारेमे तुमर ताहीं मिर उत्तम सल्लाह जहेहए;

¹¹ अब तुम जो काम सुरु करेहओ बोके पुरा करओ। तुम बो कामके सुरु करनके उत्सुक भओ कता जाके पुरा करनमे फिर उत्सुक होन पणैगो।

¹² काहेकी अगर तुम औरे आदमीनके दान देन चाँहत हओ कहेसे तुमर सँग भए अनुसारको दान ग्रहणयोग्य हुइहए, पर तुमर सँग नाए भओ बात बा नाए चाँहत हए।

¹³ औरे आदमीनको जीबन सजिलो बनान, तुमर जीबन अग्ठो होए कहिके मए नाए चाँहत हओं। पर सबके जा बरोबर होन पणत हए।

¹⁴ पर समानताके हिसाबसे जा बर्तमान समयमे तुमर प्रसस्ततासे बिनको कमी पुरो होबए, ताकी भबिष्यमे बिनको प्रसस्ततासे तुमर कमी पुरा करदेबए। अइसियए सबएमे समानता होबए,

¹⁵ जैसो पबित्र-शास्त्रमे लिखो हए, “बेढम बटोरन बारे सँग जद्धी कुछु नाए रहो, और कम बटोरन बारेनके कमी नाए भओ।”

तीतस कोरिन्थ सहरमे

¹⁶ मए परमेश्वरके धन्यबाद देत हओं, जौन तीतसको हृदयमे तुमर ताहीं बहे चिन्ता डारदइ, जैसे मए तुमर ताहीं करेकर्त हओं।

¹⁷ काहेकी हम तुमर ठिन जानके अनुरोध करत पेती तीतस हमर अनुरोधके सम्मान इकल्लो नाए, बल्कि अपनए फिर बहुतए उत्साहित हुइके अपनुवए इच्छासे तुमर ठिन आनडटो हए।

¹⁸ और हम तीतसके सँग दुस्रो बिश्वासी भइया पठाए रहे हएं, जो अच्छो समाचार घोषणा करनमे सबए मण्डलीके बिश्वासीनमे परिचित हए।

¹⁹ और इत्कए इकल्लो नाए, बल्कि प्रभुके महिमाके ताहीं और यरूशलेम सहरके बिश्वासीनके हम मदत करनके उत्सुक हएं कहिके दिखानके हम जो कर रहे हएं बो असल काममे हमर सँग यात्रा करनके मण्डली द्वारा बो बिश्वासी भइया नियुक्त भओ हए।

²⁰ राजीखुसीसे दओ भओ जा दान प्रयोग करत पेती बोके बारेमे कोइ हमके दोष नाए लगाए कहिके हम तीतसके सँग बो बिश्वासी भइया पठाए रहे हएं।

²¹ काहेकी हम प्रभुको दृष्टिमे इकल्लो नाए, पर आदमीके दृष्टिमे फिर बो कामके असल तरिकासे करनके ताहीं अपनो ध्यान देत हएं।

²² और तीतसके सँग हम दुस्रो बिश्वासी भइयाके पठाए रहे हएं, जौनके हम बहुत चोटी जाँचके बहुत बातमे जोसिलो पाए हएं। तुमर घेन भओ बोको बडो भरोसाके कारण बो औ जद्धा जोसिलो भओ हए।

²³ तीतस मिर सहभागी और तुमर सेवाके ताहीं मिर सहकर्मी हए, और बिश्वासी ददाभइया मण्डलीनके दूत हएं और बे ख्रीष्टके ताहीं सम्मान लात हएं।

²⁴ जहेमारे तुम बिनके अपनो प्रेम दिखाओ, और मण्डलीके सब बिश्वासीनके साबित करओ कि हम तुमर बारेमे करो भओ गर्व सत्य हए।