2 कोरिन्थी 3 - राना थारु नयाँ नियम1 का फिरसे हम अपनो तारिफ करन लागे हएं? का कोइ-कोइके चाहो कता हम तुमके और तुमसे दुस्रेके सिफारिसको चिट्ठी देखा पणैगो? 2 तुम अपनए हमर ताहीं सिफारिस देन बारे चिट्ठी जैसे हओ, जो तुमर हृदयमे लिखो हए, और हम तुमर बीचमे करोभओ कामके कारण तुमर जीबन परिबर्तन भओ हए और जा परिबर्तनको जीबन एक चिट्ठी जैसो हए, जा सब आदमी चिनन और पढन सिकत हएं। 3 तुमहीं दिखातहओ, कि तुमर परिबर्तित जीबन ख्रीष्टको लिखो भओ चिट्ठी जैसो हए। जा चिट्ठी बा हाम्रो सेवाको माध्यमसे लिखी रहए, जो जीवित परमेश्वरको आत्मा लिखी रहए। जा मसीसे पत्थरको पाटिमे नाए, बल्कि परमेश्वरको आत्मा, आदमीनको हृदयको पाटिमे लिखी हए। पावलको क्षमता 4 ख्रीष्टद्वारा हमर भरोसा परमेश्वरमे भओके कारण हम अइसो बात कहात हएं। 5 कोइ फिर काम करनको खुबी हमरमे हए कहेसे हम नाए कहात हएं, पर परमेश्वर हमके जा खुबी देतहए। 6 नयाँ करारको सेवक होन बा हमके खुबी दइ, जा पबित्र आत्माको करार हए, नियम कानुनको जुणो भओ करार नाए हए। काहेकी लिखो भओ बातके नाए माननको परिणाम मृत्यु हए पर पबित्र आत्मा अनन्त जीबन देतहए। नयाँ करारको महिमा 7 जब मोशाको नियम कानुन पत्थरको पेटिनमे लिखो भओ रहए, बहे बेला परमेश्वरको महिमामय ज्योति दिखाइ पणो। इस्राएल देशके आदमी बहुत समय तक मोशाको अनुहार देख नाए पाइं, काहेकी जा चमकन डटो रहए। जबकी जा चमक लम्बो समय तक नाए रहो। बहेमारे अगर मोशाको नियम कानुनमे आधारित सेवा मृत्यु लात हए, जोमे उइसो महिमा रहए कहेसे, 8 पबित्र आत्माको सेवा औ जद्धा महिमामय होबैगो। 9 काहेकी दोषी ठहिरान बारो नियम कानुन महिमामय रहए कहेसे, आदमीनके परमेश्वरके अग्गु धर्मी ठहिरान बारो नयाँ करार औ जद्धा महिमामय होबैगो। 10 नयाँ करारमे आओ भओ महिमाके मारे मोशाको नियम कानुन सँग आओ भओ महिमामे अब कोइ महिमा नाए दिखात हए। 11 काहेकी अगर नियम कानुनमे कुछ समयके ताहीं महिमा रहए कहेसे, सदाके ताहीं रहिरहान बारो नयाँ करारमे झन कित्नो बडो बहिमा होबैगो। 12 जहेमारे हमर अइसो आसरा भओ, तभीमारे हम बेढम सहासी भए हएं। 13 हम मोशा जैसे नाए हएं, जो अपनो अनुग्रहसे घटतए जानो और अन्तमे हरान बारो परमेश्वरको महिमा इस्राएल देशके आदमी नाए देखएं कहिके अपनो अनुहारमे घुँघट डारे रहए। 14 और उनको मन कठोर हुइगओ रहए, काहेकी आजको दिनतक पुरानो करार पढत पेती बो घुँघट रहिरहाबैगो। बो घुँघट ख्रीष्टमे बिश्वास करनके द्वारा इकल्लो हटत हएं। 15 हाँ, आजतक फिर मोशाको नियम कानुन पढत पेती उनको हृदयमे घुँघट डरो होत हए, बहेमारे बे जाके पुरा रुपमे नाए बुझ पात हएं। 16 पर जब कोइ आदमी फिरसे प्रभु येशूमे बिश्वास करत हए, तओ बो घुँघट हटाओ जाबैगो। 17 अब प्रभु आत्मा हए, और जाहाँ प्रभुको आत्मा हए, हुवाँ नियम कानुनसे स्वतन्त्र होत हए। 18 हम सब दर्पन जेसो घुँघट नाए भओ अनुहारमे प्रभुको महिमा दिखात हएं। परमेश्वर हमके बहुतए-बहुत बडो महिमामे अपनुवए कता बनाए रहो हए। जा प्रभुको काम हए, जौन पबित्र आत्मा हए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation