2 कोरिन्थी 10 - राना थारु नयाँ नियम

पावलको सेवा

¹ मए पावल, तुमर अग्गु नम्र हओं, पर जब दुर होत हओं तओ तुमर ताहीं सहासी होत हओं! ख्रीष्टको नम्रता और दयामे मए तुमसे बिन्ती करत हओं।

² कुछ आदमीनके, हम जा संसारके आदमीनको तरिकासे काम करत हएं। जब मए तुमर ठिन आमंगो मए आसरा करत हओं, कि मए उनके सँग कठोर होमंगो। मए कठोरता साथ तुमसे जा बिन्ती करत हओं, कि जब मए आमंगो तओ मोके तुमर साथ कठोर ब्यबहार करन नाए पणए।

³ काहेकी हम जा संसारमे बैठत हएं, तहुँफिर जा संसारके आदमीन कता हम अपनो दुस्मनके सँग लडाइ नाए लडत हएं।

⁴ काहेकी हमर युद्धके हतियार शारीरिक हतियार नाए हएं, बल्कि किल्ला नाश करन बारो परमेश्वरको शक्ति बिन्मे हए।

⁵ परमेश्वरको ज्ञानको बिरुद्धमे आन बारे बहस और हर अहंकारपूर्ण बाधाके हम नाश करदेत हएं, और हर एक बिचारके अधिनमे लाएके ख्रीष्टको आज्ञाकारी बनाए देत हएं।

⁶ जब तुम झुठा शिक्षनके इन्कार करैगे, और मोके अगुवा मनके मदत करे कहेसे और मूर्तिपुजा नाए करे कहेसे तुम ख्रीष्टमे पुरा आज्ञाकारी होबैगे। और जब जे बात पुरा होमंगे तओ आज्ञा नाए मानन बारे आदमीके दण्ड दओ जाबैगो।

⁷ तुम बाहिरी रुपसे देखत हओ। कोइ आदमीके जा भरोसा हए कि बो ख्रीष्टको हए कहेसे, अपनएके याद दिलाबए, कि जैसो बो ख्रीष्टको हए, हम फिर ख्रीष्टके हएं।

⁸ काहेकी हमर अधिकारके बारेमे मए कुछ जद्धए घमण्ड करो कहेसे फिर मए शरममे नाए पणंगो, काहेकी जा अधिकार तुमर बिश्वासके नाश करनके नाए हए, बल्कि तुमर सुधारके ताहीं प्रभु दइ हए।

⁹ मए तुमर ताहीं चिट्ठी लिखके तुमके डरपाए नाए रहो हओं।

¹⁰ काहेकी कुछ आदमी कहात हएं, “बोको चिट्ठी खरो और प्रभावशाली होत हएं, पर बो अपनए उपस्थित होत पेती बो कमजोर होत हए और बोको बचन व्यर्थ होत हए।”

¹¹ उइसे आदमीके जा बुझन पणत हए, कि जब मए तुमर सँग रहामंगो, तहुँफिर मए बिरकुल बहे करंगो, जौन बात मए अपन चिट्ठीमे लिखो हओं।

¹² अपनी तारिफ अपनए करन बारे कोइ-कोइ आदमी सँग हम अपनएके एकए दर्जामे धरन नाए चाँहत हएं, और अपनएके बिनके सँग जाँचन हम सहास नाए करत हएं। पर बे अपनए-अपनएके एक-दुस्रे सँग नापके देखत पेती और जाँचत पेती बे मुरख बन्जात हएं।

¹³ परमेश्वरको दओ भओ कामको सिमासे बाहिरको काममे हम गर्ब नाए करत हएं, पर तुमरुयए तक पुगनके ताहीं परमेश्वर हमके तोक दओ भओ सिमा भितरए रहामंगे।

¹⁴ तुमके ख्रीष्टको अच्छो समाचार सुनानके ताहीं कोरिन्थ सहर तक यात्रा करन बारे सुरुके आदमी हमै रहएं। तभीमारे तुममे गर्ब करनमे हम अपन सिमा नाए नाँघरहे हएं।

¹⁵ हम सिमा नाँघके दुस्रेनको मेहेनतमे गर्ब नाए करत हएं, पर हमर आसरा जा हए, कि तुमर बिश्वास बढतए जात पेती तुमर बीचमे हमर काम और जद्धा बढतए जाबैगो।

¹⁶ ताकी हम दुर-दुरको क्षेत्रमे अग्गुवए भओ काममे घमण्ड नाए करके तुमसे बाहिरके ठाउँमे अच्छो समाचार परचार करपामएं।

¹⁷ जैसे पबित्र-शास्त्र कहात हए, “घमण्ड करन बारो परमप्रभुमे घमण्ड करए।”

¹⁸ काहेकी अपनो तारिफ अपनए करन बारो आदमी स्वीकार नाए करोजात हए, पर जौनको तारिफ प्रभु करत हए, बो प्रभुको नजरमे असल होतहए।