1 तिमोथी 5 - राना थारु नयाँ नियममण्डलीनके सदस्यनसे करन बारो ब्यबहार 1 अपनेसे जद्धा उमर भए आदमीनके मत् डँटीए; पर बोके आदरसे सल्लाह दिए, जैसेकी बो तेरो अपनो दौवा हए, और बे लोग जो तोसे छोटे हएं, उनके अपने भइया हानी ब्यबहार करिए। 2 तोके बुढी बैयरनके सँग अइसो ब्यबहार करन चाहो, जैसेकी बे तेरी अपनी अइया हएं, और अपनेसे छोटी उमेरके बैयरनसे उइसी ब्यबहार करन चाहो, जैसेकी बे तेरी अपने बहिनीया हएं। और अइसे शुद्ध मनसे करिए। बिधुवनके आदर 3 जो नेहात्तओ बिधुवा हए बिनके आदर दिखा, जौननके ठिन उनको जरुरत पुरी करनके ताहीं और उनकी रेखदेख करनके ताहीं कोइ नाए हए। 4 और अगर कोइ बिधुवाके लौंणालौंणीया या नतियानतनिया होएं, तओ सबसे पहिले उनके अपने परिवारके सदस्यकी रेखदेख करके ईश्वरीय ब्यबहार करनके सिखएं। और अपने अइयादौवा या दादो-दादीकी रेखदेख करके उनके ताहीं कुछ करएं, काहेकी परमेश्वर जहेसे खुसी होत हए। 5 जौन बिधुवनके ठिन उनको जरुरी पुरा करनके ताहीं और उनको रेखदेख करनके ताहीं कोइ नाए हए, बे परमेश्वरमे इकल्लो अपन आसरा करत हए। और रातदिन बे बिन्ती और प्राथना करके परमेश्वरसे अपने ताहीं मदत मागत हएं। 6 बे बिधुवा जो अपने सारा समय सुख-सुबिधामे बितात हएं, बे एक मरे भए आदमीके हानी हएं। बे शारीरिक रुपसे जिन्दा हएं, पर आत्मिक रुपसे मरे भए हएं। 7 बिश्वासीनके जा निर्देश दे, ताकी कोइ फिर उनके उपर दोष नाए लगाबए। 8 पर अगर कोइ अपनुवए नातेदारनकी, खास करके अपनो परिवारको रेखदेख नाए करत हए कहेसे जासे जा साबित होत हए, कि नेहात्तओक बो ख्रीष्टके बिश्वास नाए करत हए, और बो आदमी गैर-बिश्वासीनसे फिर जद्धा खराब हए। 9 जो कोइ बिधुवाकी उमर साठी बर्षसे जद्धी हए कहेसे तए बोके बिधुवनकी सुचीमे धरन सकत हए। और बोके इकल्लो, जो अपन लोगासे बफादार रहए। 10 और अन्य आदमीके जे बातके पहिचान करन चाहो, कि बो हमेसा अच्छे काम करीहए। उदाहरणके ताहीं, बो अपने बालकनके अच्छेसे पालन पोषण करी, बो यात्रा करन बारे बिश्वासीनके अपने घरमे स्वागत करी, बो दुस्रे बिश्वासीनको सेवा अइसे करके करी, जैसेकी बो एक नोकरानी हानी हए। और बो बेहीं आदमीनको मदत करी, जो परेसानीसे हुइके जात रहएं। बो हर तरिकासे भलो काम करनके ताहीं अपनएके सौँपदइ होए। 11 पर जवान बिधुवनके सुचीमे नाउँ मत् लिख, काहेकी जब उनकी शारीरिक इच्छा, एक बिधुवाके रुपमे ख्रीष्टको सेवा करनको प्रतिज्ञासे जद्धा मजबुत हुइजात हए, तओ बे फिरसे बेहा करन चाँहत हएं। 12 फिरसे बेहा करके बे अपनएके दोषी बनामंगी काहेकी बे फिरसे बेहा नाए करनको प्रतिज्ञा करी रहएं। 13 और जाके सँगए-सँग बे घर-घर घुमके अल्छी होन सिखत हएं, और अल्छी इकल्लो नाए, बल्कि दुस्रेनके बारेमे चुग्ली करत हएं और दुस्रेनके काममे बाधा लात हएं और अइसे बात बत्कात हएं जो बात बिनके नाए कहानके हए। 14 जहेमारे मए जा चाँहत हओं, कि जवान बिधुवा बेहा करएं; और बालका जन्मामएं और घरबार सम्हारएं, और कोइ बिरोधीके बदनाम करनको मौका नाए देएं। 15 मए अइसो जाकेमारे कहिरहो हओं, काहेकी कुछ बिधुवा पहिलीएसे परमेश्वरको आज्ञाके पालन नाए करिहएं, और बोके कारण बे शैतानको अनुसरण करन सुरु करदइ हएं। 16 अगर कोइ बिश्वासी बैयर घरमे बिधुवा होएं कहेसे उनको मदत बो अपनए करए। ताकी बोको बोझ मण्डलीमे नाए पणए, और मण्डली बे बिधुवानके मदत कर करपामएं, जौन बिधुवनके नेहात्तओकमे जरुरी हए। बचन सिखान बारे अगुवनके सम्मान 17 कोइ फिर मण्डलीके अगुवनके ठिक सम्मान देन पणत हए, जौन अपन कामके अच्छेसे करत हएं। और खास करके उनके, जो परमेश्वरको सन्देशके सिखानके ताहीं और परचार करनके ताहीं कर्रो मेहेनत करत हएं। 18 काहेकी पबित्र-शास्त्रमे जा लिखो हए, “बर्धाके मुँहुँमे मोखरा मत् लगैयओ, काहेकी बहे बालिके गांहत हए,” और दुस्रो ठिहामे पबित्र-शास्त्रमे जा लिखो हए, “एक कमैयाके फिर काम लागन बारोसे देहाणी लेनके ताहीं अधिकार हए।” 19 एक मण्डलीको अगुवाके बिरुद्ध पाप करनको दोषके तबतक मत् सुन, जब तक दुई या तीन आदमी एकए बातके ताहीं बोमे दोष नाए लगामएं। 20 जो आदमी पाप करत हएं, तोके बे आदमीनके सब बिश्वासीनके अग्गु डाँटनके चाहो, ताकी औ बिश्वासी फिर डरामएं। 21 मए तोके परमेश्वर, और येशू ख्रीष्ट, और चुनेभए स्वर्गदूतन्के अग्गु मए तोके जा आदेश देत हओं, कि तए कोइके फिर जल्दीयए न्याय मत् करीए। कोइ फिर आदमीनके और कोइ फिर काममे कोइ मिर भेदभाब या पक्षपात नाए करे तए जे सब नियम पालन कर। 22 कोइके उपर हात धरके, बोके एक मण्डलीके रेखदेख करन बारो सेवकके रुपमे मत् छान। जब तक बे अपनएके ख्रीष्टमे बिश्वासयोग्य साबित नाए करदेएं। अगर तए अइसो करैगो कहेसे बोको पापके ताहीं तए फिर जिम्मेबार होबैगो; अनैतिक बातसे अपनएके दुर धर। 23 अबसे पानी इकल्लो मत् पिइबए, पर अपने पेटके ताहीं और घरी-घरी बिमार होनके कारण तए थोरी-थोरी अंगुरको रसा पिइलिए। 24 मए तोसे कहात हओं, कि मण्डलीके रेखदेख करन बारो सेवकके चुननके हतार मत् करीए, काहेकी कुछ आदमी खुल्लम-खुल्ला पाप करत हएं। हियाँतककी न्याय होनसे अग्गुवए, बे बिश्वासीनके अग्गु स्पष्ट रुपसे दोषी हएं। दुस्रे आदमीनको पाप उतना स्पष्ट नाए होत हएं, और सिरफ पच्छुजाएके इकल्लो देखा पणत हएं। 25 उइसीयए, जब आदमी अच्छे काम करत हएं, तओ दुस्रे बिश्वासीनके जे स्पष्ट रुपसे देखा पणत हएं। और अगर दुस्रे बिश्वासी उनको काम स्पष्ट रुपसे नाए देखेसे फिर पच्छुजाएके बे उनको कामके पता पाए डारंगे। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation