1 तिमोथी 1 - राना थारु नयाँ नियम

शुभकामना

¹ मए, पावल जा चिट्ठीके लिखरहो हओं। हमर मुक्तिदाता परमेश्वर और जौनमे हम आसरा करत हएं बहे येशू ख्रीष्टको अधिकारसे बाको मए एक चुनो भओ चेला हओं।

² मए जा चिट्ठी तिमोथीके लिखरहो हओं: तए मिर अपनो लौंणा जैसो हए, काहेकी तए ख्रीष्टमे बिश्वास करत हए। मए प्राथना करत हओं, कि हमर दौवा परमेश्वरसे और हमर प्रभु येशू ख्रीष्टसे तोके अनुग्रह, दया और शान्ति मिलतए रहाबए।

झुठे गुरुनके बिरोधमे चेतावनी

^3-4 हे तिमोथी, जैसे तए जानत हए, कि एफिसस सहरमे कुछ अइसे आदमी हएं जो गलत सन्देश देत हएं। बे झुठो कहानी और पुर्खनको लम्बी सुची सिखानमे ध्यान देनके बन्द करएं। जब मए एफिसस सहर छोडके माकेडोनिया परदेशमे जानके ताहीं तयार रहओं। तओ मए तोके एफिसस सहरएमे रहानके ताहीं कहो रहओं और बे आदमीके जा बतानके ताहीं कहो, कि बे झुठी सन्देश देनके बन्द करएं। जब बे अइसियए बात सिखात हएं तओ आदमी उनके बारेमे बिबाद करत हएं। जाको परिणाम जा हए, कि बे झुठे गुरु बो कामके नाए कर रहे हएं, जो परमेश्वर उनके दइ रहए, जौनसे बे सिरफ परमेश्वरमे भरोसा करके कर सकत हएं।

⁵ तुमके जा आज्ञा देनको मिर उदेश्य जा हए, कि तुम एकदुस्रेसे सच्चो मनसे प्रेम करओ, और शुद्ध बिबेकसे और सच्चो बिश्वाससे प्रेममे बढओ।

⁶ झुठे गुरु, जे सब चीजके करन बन्द करदइ हएं, और मुरखतासे बात करत हएं।

⁷ और बे नियम कानुन सिखान बारो आदमी कता त होन चाँहत हएं पर सचमे बे जा नाए सम्झत हएं, कि बे झुठे गुरु का सिखानके कोसिस कर रहे हएं, और इतनो पक्को आत्मबिश्वासके सँग का मसक रहे हएं।

⁸ हम जानत हएं, कि मोशाको नियम कानुन अच्छो हए, अगर बोको प्रयोग बो प्रकारसे करोजात हए, जौन प्रकारसे बोको प्रयोग करोजानके रहए।

⁹ हम जा फिर जानत हएं, कि मोशाको नियम कानुन धर्मी आदमीनके ताहीं नाए बल्कि बे आदमी जो परमेश्वरको नियम कानुनके अनदेखी करत हएं, और जाको आज्ञापालन नाए करत हएं। और बे आदमी, जो परमेश्वरके आराधना नाए करत हएं, और जो पापी हएं। और बे आदमी, जो अशुद्ध हएं और अपबित्र हएं बे परमेश्वरको आदर नाए करत हएं। और बे आदमी, जो अपने अइयादौवाको और आदमीनको हत्या करत हएं,

¹⁰ यौन सम्बन्धके रुपसे गलत काम करन बारे, समलिंगी। बे आदमी, जो दुस्रे आदमीके चुराएके उनके गुलामीके रुपमे बेचत हएं, ठगन बारे आदमी। बे आदमी, जो जब फिर ठगत हएं जबकी बे सच्चो मस्कनको वादा करेहोत हएं। बे आदमी, जो सब कुछ करत हएं जोसे सही शिक्षा देनसे हमके मनाही करत हएं।

¹¹ जा सही शिक्षा हमर अदभुत परमेश्वरको महिमाके बारेमे अच्छो समाचारसे सहमत होत हए, जौन मोके परचार करनके जिम्मा दइ हए।

पावलको गवाही

¹² मए हमर प्रभु येशू ख्रीष्टके धन्यबाद देत हओं, जौन मोके शक्ति दइ, कि बा मोएमे भरोसा करके अपनो सेवाको काममे लगाबए।

¹³ मए त बिश्वासी होनसे पहिले ख्रीष्टको बदनाम करत रहओं, और बिश्वासीनके सतात रहओं और बिनको बहुत नुक्सान करो, काहेकी बो समय तक मए ख्रीष्टके बिश्वास नाए करत रहओं, जहेमारे मए बुझ नाएपाओ, काहेकी जो मए करत रहओं बो गलत रहए। जहेमारे ख्रीष्ट मोके दया करी।

¹⁴ हमर प्रभु लगातार मिर उपर बहुत जद्धा अनुग्रह, बिश्वास और प्रेम दइ, काहेकी मए ख्रीष्ट येशूके सँग एकजुटमे रहओं।

¹⁵ जा एक सच्ची कहानी हए, जोके पुरो तरिकासे स्वीकार और बिश्वास करोजान पणो, कि येशू ख्रीष्ट हम जैसे पापीनके बचानके ताहीं जा संसारमे आओ, जौनमे सबसे जद्धा पापी मए हओं।

¹⁶ मए हर कोइ आदमीसे सबसे जद्धा पाप करो हओं, पर येशू ख्रीष्ट मोएमे दया दिखाइ। और परमेश्वर मोके क्षमा करके जहे दिखान चाँहत रहए, कि बा कित्ना सहनशील हए। जा बेहीं आदमीके ताहीं एक उदाहरण होबैगो जो पच्छु बाके उपर बिश्वास करंगे और कभी फिर नाश नाए होन बारो जीबन पामंगे।

¹⁷ अब अनन्तकालको राजा और नाए देखमिलन बारो एकए परमेश्वरके सदासर्वदा आदर और सम्मान होतए रहाबए। आमेन।

तिमोथीको जिम्मेबारी

¹⁸ हे मिर लौंणा तिमोथी, जे बेहीं आदेश हएं जो मए तोके दएरहो हओं; मए तोके बे बातनके याद करनके ताहीं कहात हओं जो बितो भओ समयमे अगमबक्ता कही रहएं, कि जे बात तेरे सँग होमंगे। तोके झुठे गुरुके बिरुद्धमे लडनके ताहीं जे शब्दके एक हथियार हानी प्रयोग करन चाहो।

¹⁹ तोके ख्रीष्टमे बिश्वास करे रहानके पणो और तोएमे एक शुद्ध बिबेक होन पणो। पर कुछ आदमी अपने शुद्ध बिबेकके त्याग दइ हएं, और बे ख्रीष्टमे बिश्वास करनके अपनी योग्यताके नाश करदइ हएं, ठिक उइसीयए जैसे एक जहाजको ठक्कर होनमे पुरा जहाजके नाश करदेत हए।

²⁰ उन्हीं मैसे हुमेनियस और अलेक्जेन्डर हएं, जौनके मए मण्डली मैसे बाहिर करदओ हओं। और उनके शैतानके शक्तिके हातमे सौँप दओ हओं। ताकी बे सिखएं कि परमेश्वरके बारेमे बदनाम नाए करन पणत हए।