1 पतरस 4 - राना थारु नयाँ नियम

¹ जहेमारे ख्रीष्ट अपनो शरीरमे रहातए दुख भोगी, और तुम फिर बहे कता बिचार करके दुख उठान तयार होन पणत हए। काहेकी अगर तुम ख्रीष्टके ताहीं दुख उठान इच्छा करत हओ कहेसे, तुम पाप करन छोडनको फैसला करे हओ।

² परिणामके रुपमे बो आदमी जा पृथ्वीमे अपनो बाँकी जीबन अपनुवए पापी मानब इच्छा पुरा करके नाए जिइबैगो, पर बो परमेश्वरके चाहो भओ बात करैगो।

³ गएभए समयमे तुम गैर-बिश्वासीनके मन पणन बारो काम करके बहुत समय बर्बाद करे। तुमर जीबन अन्यजाति कता व्यभिचार, कुबासना, दारुके नसामे, मोजमजा, पियक्कडपन और घृणित मूर्तिपुजामे बितो, जोके परमेश्वर घृणा करत हए।

⁴ जहेमारे तुमर पुराने सँगी अचम्मो मानत हएं, जब तुम बिनके करन बारो दुष्ट कामनमे सामिल नाए होत हओ। बहेमारे बे तुमर बारेमे खराब बात मस्कत हएं।

⁵ पर एक दिन बिनके नेहात्तओ परमेश्वरके अग्गु न्यायके ताहीं ठाणन पणैगो, और परमेश्वर बे सबसे पृथ्वीमे करोभओ कामके बारेमे पुँछैगो। परमेश्वर जिन्दनके और मेरे भएन्को न्याय करैगो।

⁶ जहेमारे मरे भए आदमी फिर ख्रीष्टको बारेमे अच्छो समाचारको परचार सुनीं। उनको शरीर, औ सब आदमीन कता मरन पणो, पर अब बे सदासर्वदा परमेश्वरसँग आत्मामे जिइरहे हएं।

⁷ सबए बातको अन्त ढिँगै आइगओ हए। जहेमारे तुम स्पष्ट रुपमे सोँचओ और अपनएके अधिनमे धरओ, ताकी तुम प्राथना करपाबओ।

⁸ सबसे खास बात जा हए, कि एकदुस्रेनसे गहिरो प्रेम करओ। काहेकी अगर तुम आदमीनके प्रेम करे कहेसे, तुम रोज उनको करोभओ कोइ फिर गलत कामके क्षमा देन तयार रहाबैगे।

⁹ आदमीनके तुमर घरमे स्वागत करओ और कोइ गुनासो नाए करके अइसे करे करओ।

¹⁰ हर आदमी परमेश्वरसे बरदान पाइहए और बे बो बरदान औरेनके मदत करन प्रयोग करन पणत हए। बे अपनो बरदानके परमेश्वरके दास कता अच्छेसे प्रयोग करन पणत हए।

¹¹ उदाहरणके ताहीं, अगर तुमर सँग परचार करनको बरदान हए कहेसे, तुमके परमेश्वरको बचन परचार करन पणत हए। अगर तुमर सँग औरे आदमीनके मदत करनको बरदान हए कहेसे, बो तुम परमेश्वरके माध्यामसे दओगओ शक्तिसे करओ। तओ बोसे येशू ख्रीष्टद्वारा परमेश्वरके महिमा मिलैगो। सबए महिमा और शक्ति हरदम बहेको हए! आमेन।

दुखमे आनन्द

¹² प्रिय हो, तुम जो भोग रहेहओ बो दुख लगान बारो बातमे अचम्मो मत् मानओ, काहेकी तुम ख्रीष्टके हओ। पार जे बात जा दिखानके ताहीं हुइ रहो हए, कि तुम सचमे परमेश्वरमे बिश्वास करत हओ या नाए करत हओ। बहेमारे, जा मत् सोँचओ, कि तुमर सँग कुछ अचम्मो हुइ रहो हए।

¹³ जाके बारेमे खुसी होबओ, काहेकी तुम ख्रीष्टको भोगो भओ कष्टमे सहभागी भए हओ। बहेमारे जब ख्रीष्ट सबए आदमीनके अपनो महिमा प्रकट करनके फिरसे आबैगो, तओ नेहात्तओ तुमर आनन्द बहुत होबैगो।

¹⁴ अगर ख्रीष्टके नाउँमे तुमर बेइज्जत हुइगओ कहेसे तुम धन्यके हओ। काहेकी महिमाको परमेश्वरको आत्मा तुममे बास करीहए।

¹⁵ पर तुम मैसे कोइ फिर हत्यारा, चोर, खराबी करन बारे, दुस्रेन्के बातमे हात डरन बारे कता दुख मतउठाओ।

¹⁶ पर कोइ ख्रीष्टियन भओके कारण दुख उठात हए कहेसे बो नाए सर्माबए, पर ख्रीष्टियन भओके कारण बो परमेश्वरके धन्यबाद देबए।

¹⁷ काहेकी परमेश्वरको अपनुवए परिवारसे न्याय सुरु होनको समय आएचीको हए। काहेकी बा पहिले हम बिश्वास करन बारेनको न्याय करैगो और परमेश्वरसे आओ भओ अच्छो समाचारके नाए मानन बारेनके झन् कैसो होबैगो, बोके बारेमे सोँचओ।

¹⁸ जैसे पबित्र-शास्त्रमे लिखो हए, “अगर एक अच्छो आदमीके मुक्ति पान बहुतए अग्ठो हए कहेसे झन् खराब आदमी और पापीनको का हाल होबैगो!”

¹⁹ जहेमारे परमेश्वरको इच्छा अनुसार जब कोइ दुख भोगत हए, और जीबन देन बारो परमेश्वरमे भरोसा करे रहात हए। तओ बोके ताहीं परमेश्वर हरदम अपन प्रतिज्ञा करोभओ बात पुरा करत हए। तभीमारे तुम अच्छो काम करतए रहाओ।