1 पतरस 3 - राना थारु नयाँ नियम

लोगा और बैयर

^1-2 हे बैयर आदमी, तुम फिर अपने लोगाके अधिनमे रहाओ, ताकी अगर बिन मैसे कोइ लोग परमेश्वरको बचनमे बिश्वास करनसे इन्कार करत हए कहेसे, तुमर ब्यबहार बिनके, कुछु नाए कहिके फिर बिश्वास करन बारो बनाबैगो। जब बे तुमर भक्ति और शुद्ध ब्यबहार देखंगे तओ अपनए बे ख्रीष्टमे बिश्वास करंगे।

³ बिश्वासी बैयर अपनो बारके सिंगार करके बोसे अपने घेन आकर्षित नाए करएं, और नए सोनो मोती और महिंगो लत्तासे आकर्षित करएं। पर बैयर अइसे लत्ता लगामएं, कि जो तारिफको लायक हए और जो स्वीकारको लायक हए।

⁴ तुमर हृदयमे भए बात तुमके सुन्दर बनात हए। जहे नम्र और शान्त ब्यबहार हए, जो परमेश्वरके ताहीं बहुत मुल्यवान हए।

⁵ काहेकी अइसियए ब्यबहार बहुत अग्गुके बैयर आदमीनमे रहए, जौनको जीबन पबित्र रहए और जो परमेश्वरमे आसरा करत रहएं। बे बैयर सुन्दर भइं, काहेकी बे अपनो लोगाके अधिनमे बैठीं।

⁶ सारा कता, जौन अब्राहामके स्वामी कहिके बोको आज्ञापालन करत रहए, बो कहोक जा हए, कि अगर तुम औ आदमीनके ताहीं ठिक काम करे और चिन्ता और डर नाएहए कहेसे, तओ तुम साराके लौंणीया कता होबैगे।

⁷ लोग आदमी, उइसी करके अपनी बैयर सँग मिल्के बैठओ, और कैसे बिनके मदत करएं कहिके बिचार करओ। और तुमके जा याद करन पणैगो, कि बे तुमसे जद्धा कमजोर हएं, जहेमारे तुमए बैयरनको सम्मान करन पणत हए। काहेकी परमेश्वर जो तुम दुनएके अनुग्रहसे दइ हए बो बरदानमे साझेहकदार हओ, जो अनन्त जीबन हए। अइसे करओ ताकी जब तुम परमेश्वरसे प्राथना करओ परमेश्वर बो प्राथनाके सुनपाबए।

अच्छो काम करत आन बारो दु:ख

⁸ अन्तमे, मए तुमके जा कहान चाँहत हओं, कि बिश्वासी ददाभइयन सँग एकजुटमे बैठओ, एकदुस्रेके ताहीं सोँचे करओ, एकए परिवारको सदस्य कता एकदुस्रेनके प्रेम करओ। एकदुस्रेनके ताहीं दयालु होबओ और एकदुस्रेन सँग नम्र होबओ।

⁹ खराबीको बदला खराबी, और अपमानको बदला अपमान नाए मत् करओ। बल्कि, बोको बदलामे आशिष देनके ताहीं परमेश्वर तुमके बुलाइ हए। अगर तुम अइसे करे कहेसे, परमेश्वर तुमके फिर आशिष देबैगो।

¹⁰ काहेकी पबित्र शास्त्रमे लिखो हए, “अगर एक आदमी अपनो जीबनको आनन्द लेन चाँहत हए, और अच्छे दिन देखनके चाँहत हए कहेसे, बोके खराब बात करनसे होसियार होन पणैगो और बोके बे बात मस्कनके छोडन पणैगो जो सच्चे नाए हएं।

¹¹ बोके खराब काम करन छोडन पणैगो। बरु बोके जो असल हए बहेके करन पणैगो, औरेन्के सँग शान्तिमे रहानके ताहीं कडा मेहेनत करओ।

¹² काहेकी परमेश्वर असल काम करन बारे आदमीनके देखत हए, और बा उनको प्राथना सुननके ताहीं रोजए तयार हए, पर परमेश्वर खराब काम करन बारेनके बिरुद्धमे काम करत हए।”

¹³ अगर तुम रोजए अच्छो काम करनके ताहीं कोसिस करैगे कहेसे, तओ नेहात्तओ कोइ फिर तुमके चोट नाए पुगाए पाबैगो।

¹⁴ पर अगर तुम अच्छो काम करोके कारणसे कोइ दुख उठान पणो हए कहेसे, परमेश्वर तुमके आशिष देबैगो। अगमबक्ता, यशैयासे लिखो भओ कता करओ: “तुमके धमकी देन बारे आदमीनसे मतडराओ और आदमी का करंगे कहिके बातमे चिन्ता मत् करओ।”

¹⁵ बरु तुम ख्रीष्टके अपनो जीबनको प्रभुके रुपमे आराधना करओ। और हम सबए बिश्वासी साझेदार होन आसराके बारेमे कोइ पुछीं कहेसे, बोके व्याख्या करनके रोजए तयार रहाओ।

¹⁶ पर जाके नम्र और आदरसे करओ। सदादिन जो ठिक हए बहे करओ। जब तुमर बिरुद्धमे सब खराब करन बारे आदमी तुमर ख्रीष्ट सँगको सम्बन्धके कारण तुमर असल ब्यबहार देखंगे, तओ बे सरममे पणजामंगे।

¹⁷ अगर हमर अच्छो कामके कारण हम दुख उठात हएं और जा हमर ताहीं परमेश्वरको इच्छा हए कहेसे जा ठिक हए। बो हमर खराब कामके कारणसे दुख पानसे अच्छो हए।

¹⁸ मए अइसे कहात हओं काहेकी हमर पापके कारण ख्रीष्ट फिर दुख भोगी और मरो। बा एकए चोटी इकल्लो मरो और जाके दुस्रो चोटी करनके जरुरी नैयाँ। बा एक धर्मी आदमी रहए, जो पापी आदमीनके ताहीं मरो। ताकी बा हमके परमेश्वरके जौँणे लाए पाबए। बे बाको शरीरके मारीं, पर बाको आत्मा जिन्दा हए।

¹⁹ तओ बाको आत्मा गओ और परमेश्वरद्वारा जेलमे पणेभए आत्मनके अच्छो समाचार परचार करी, जहाँ मरे आदमीनको आत्मा हएं।

²⁰ जे बो आत्मा रहएं, जौन बहुत समय पहिले परमेश्वरको आज्ञापालन नाए करीं। जब नोआ अपनो जहाज बनात रहए, तओ आदमी पाप करन छोडके परमेश्वर घेन घुमंगे कि कहिके परमेश्वर धैर्यतासे रुको रहए। पर आठ जनै इकल्ले बो डर लागन बारो बहाडसे बचाएगए।

²¹ पुरानो समयमे बिनको मुक्ति हबए हमर मुक्तिको उदाहरण हए, जब हम बप्तिस्मा लेत हएं। बप्तिस्मा लेन बारो पानीसे हमर शरीरसे फोहर नाए हटात हए, पर जा संकेत हए, कि हम परमेश्वरसे माफी मागे हएं ताकी हमर मन अब परेसान नाए होबए। हम क्षमा पामंगे काहेकी येशू ख्रीष्ट अपनो मृत्युसे फिरसे जिन्दा भओ हए।

²² और अब बा स्वर्गमे जाएके परमेश्वरको दाहिना हात घेन सबसे उच्च ठाउँमे बैठो हए, और बा सबए स्वर्गदूत और सबए अधिकारी और शक्तिनके उपर शासन करत हए।