1 कोरिन्थी 8 - राना थारु नयाँ नियम

मूर्तिके चढाओ भओ खान बारो चीज

¹ अब बो प्रश्नके बारेमे, जौन बात तुम अपन चिट्ठीमे लिखे रहओ: का मूर्तिनके अग्गु बलि चढाओ भओ खानु बारी चीजके खान सही हए? हम जान्त हएं, कि हम सबके ठिन ज्ञान हए: ज्ञानसे घमण्ड आत हए, पर प्रेमसे उन्नति होत हए।

² अगर कोइ सम्झत हए, कि बो कुछ जानत हए, तओ बो अबतक जा नाए जानत हए, कि कौन तरिकासे जाननके हए।

³ पर कोइ परमेश्वरके प्रेम करत हए कहेसे परमेश्वर बोके जानत हए।

⁴ अइसो हए कहेसे, मए खानके बारेमे सबालको जबाफ देन चाहंगो, कि मूर्तिनके अग्गु बलि चढाओ भओ खानुके बारेमे हम सब जानत हएं, कि मूर्ति पुरी संसारको सच्चो ईश्वर नाए हएं। पर केबल एकए सच्चो परमेश्वर हए।

⁵ स्वर्गमे और पृथ्वीमे बहुतसे अइसे हएं जौननके आदमी ईश्वर और प्रभु कहात हएं, नेहात्तओ अइसियए गजब देवता और प्रभु हएं।

⁶ पर हमर ताहीं केबल एकए परमेश्वर हए: अर्थात् दौवा, जौनके घेनसे सब चीज हएं, और हम परमेश्वरके ताहीं हएं, और एकए प्रभु हए, अर्थात् येशू ख्रीष्ट जौनके द्वारा सब चीज भए, और जौनके द्वारा हमके जीबन दओगओ हए।

⁷ पर हमरे कुछ बिश्वासी अभएतक नाए जानत हएं, कि मूर्तिनके ठिन कोइ शक्ति नाए हए; काहेकी बे पहिले मूर्तिनके पुजा करत रहएं, अब बे बेहीं मूर्तिनके बलि चढाओ भओ खानु खात हएं। बे गल्तीसे सोँचत हएं, कि बे अभौफिर मूर्तिनको पुजामे सामिल हएं। और बे जा सोँचके परेसान होत हएं, कि अगर बे मूर्तिनके चढाओ भए खानु खात हएं तओ बे पाप करडारी हएं।

⁸ जा सच हए, कि जो खानु हम खात हएं बहेसे हमके परमेश्वरको सहमति नाए मिलसकत हए। अगर हम बोके नाए फिर खएहएं तहुँ हम कुछ नाए खोत हएं। और अगर खामंगे तहुँफिर हम कछु नाए पामंगे

⁹ पर होसियार होबओ, अइसो नाए होए, कि तुमर जा स्वतन्त्रता कहुँ कमजोर बिश्वास बारेनके ताहीं बिश्वासके छोडनको कारण नाए बनए।

¹⁰ तुम जानत हओ, कि मूर्ति बास्तबमे परमेश्वर नाए हएं। जहेमारे तुम मूर्तिके मन्दिरमे खानु खाए सकत हओ। पर जो कोइ बिश्वासमे कमजोर हए बो तुमके हुवाँ खानु खात देखत हए, तओ बो मूर्तिनके बलि चढाओ भओ बुट्टी खानके ताहीं प्रोत्साहित होतहए। जबकी बो सोँचत हए, कि अइसो करन गलत हए।

¹¹ जहे रितिसे तुमर ज्ञानके कारण जौन बिश्वासीको बिश्वास कमजोर हए बो ख्रीष्टमे बिश्वास करन बन्द करदेबैगो, जोके ताहीं ख्रीष्ट येशू अपनो प्राण दइ।

¹² जब तुम दुस्रे बिश्वासी ददाभइया और बहिनियाके अइसो काम करनके ताहीं प्रोत्साहित करके पाप करत हओ, जासे बे जानत हएं कि बो गलत हए तओ तुम ख्रीष्टके बिरुद्धमे पाप कर रहेहओ।

¹³ जहेमारे, अगर मूर्तिनके चढाओ भओ खानु खानसे दुस्रो बिश्वासी भइयाको बिश्वास बन्द होनको कारण बनातहए, तओ मए उइसो खानु नाए खामंगो, ताकी मए दुस्रे बिश्वासीनको बिश्वास बन्द होनको कारण नाए बनओं।