1 कोरिन्थी 7 - राना थारु नयाँ नियम

बेहाके बारेमे

¹ अब बे सवालके बारेमे जो तुम अपनो चिट्ठीमे पुँछे रहओ, “का हमरे ताहीं जा अच्छो हुइहए, कि बेहा नाए करएं?”

² पर व्यभिचारके परीक्षामे पणके अनैतिक कामनके करन बहुत सजिलो बात हए। मए जा सल्लाहा देत हओं, कि हर लोग बेहा करलेमएं और अपनी बैयरके साथ इमान्दार रहाएं।

³ लोगा अपनी बैयरको बेहाको हक पुरा करए; और उइसीयए बैयर फिर अपनो लोगाको बेहाको हक पुरा करए।

⁴ बैयरको अपनी शरीरमे अधिकार नाए हए, पर बोको लोगाको अधिकार हए; उइसीयए लोगाके फिर अपनी शरीरमे अधिकार नाए हए; बल्कि बैयरकी अधिकार हए।

⁵ तुम एकदुस्रेसे अलग मत् रहाओ, पर कुछ समय तक सल्लाहा करके प्राथना करन अलग बैठेसे फिर लोगा और बैयर कता तुम दुबारा एक साथ रहाओ; ताकी शैतान अनैतिक जीबन जीइनके ताहीं तुमरी परीक्षा नाए करए। काहेकी नत तुम अपनी इच्छन्के अधिनमे नाए करपाबैगे।

⁶ पर मए जो जा कहात हओं, बो आज्ञा नाए हए बल्कि मिर सुझाब हए।

⁷ मए जा चाँहत हओं, जैसेकी मए अबिबाहित हओं, उइसीयए सब आदमी होएं; पर हरेक आदमीके परमेश्वरसे खास बरदान मिलो हए; परमेश्वर कुछ आदमीनके बेहा करनको बरदान देतहए और कोइ आदमीनके बेहा नाए करनको बरदान देतहए।

बेहा नाए करेभए मनैनके ताहीं सल्लाहा

⁸ अब बेहा नाए करेभए मनै और बिधुवानके ताहीं मिर सल्लाहा जा हए, कि मेरे कता अबिबाहित रहान अच्छो हए।

⁹ पर अगर बे अपनएके अधिनमे नाए कर्पएहएं, तओ बेहा करएं; काहेकी बेहा करनो असन्तुष्ट इच्छा करनेसे अच्छो हए।

बेहा करेभए मनैनके ताहीं सल्लाहा

¹⁰ जौनको बेहा हुइगओ हए, उनके मए नाए, बल्कि प्रभु येशू आज्ञा देतहए, कि बैयर अपनो लोगाके छुट-पत्र नाए देए।

¹¹ बैयर छोड दइ हए कहेसे, कि त बेहा नाए करके बैठए कि फिरसे अपनो लोगाके सँग मिल्के बैठए। और लोगा अपनी बैयरके फिर छुट-पत्र नाए देए।

¹² अब मए बाँकी बिश्वासीनसे बात कररहो हओं, जो आदमी अइसे आदमीनसे बेहा करी हएं जो बिश्वासी नाए हएं (जा प्रभुको आज्ञा नाए हए), अगर कोइ बिश्वासीको बैयर प्रभुमे बिश्वास नाए करत होए, और बैयर बो लोगाके सँग लगातार जीइनके ताहीं इच्छुक हए कहेसे लोग आदमी बैयरके छुट-पत्र नाए देए।

¹³ और अगर कोइ बिश्वासीनको लोगा प्रभुमे बिश्वास नाए करत होए, और बैयर बो लोगके सँग रहानके ताहीं इच्छुक हए कहेसे स्त्री पुरुषके छुट-पत्र नाए देए।

¹⁴ काहेकी अगर तुम एक बिश्वासी बैयर हओ जो गैर-बिश्वासी लोगाके सँग रहात हओ, तओ तुमर लोगा फिर तुमर बिश्वासके कारण प्रभुको हए। और अगर तुम एक अइसे बिश्वासी पुरुष हओ जो गैर-बिश्वासी बैयरके सँग रहात हओ, तओ तुमरी बैयर फिर तुमर बिश्वासको कारण प्रभुकी हए। अगर जा सच्चो नाए हुइतो, कि तुमरी गैर-बिश्वासी बैयर या लोगा परमेश्वरके हएं। तओ तुमर बच्चा फिर अशुद्ध हुइते। पर अब तुमर बच्चा फिर परमेश्वरके हएं।

¹⁵ पर जो लोग बिश्वास नाए करत हए, अगर बो छुट-पत्र देन चाँहत हए, तओ देन देबओ। जब गैर-बिश्वासी लोगा या बैयर छुट-पत्र देन चाँहत हए, तओ बिश्वासीके बिबाहित रहानको जरुरी नाए हए; काहेकी परमेश्वर त हमके मेलमिलापके ताहीं बुलाइ हए।

¹⁶ हे स्त्री मनै, तुमके याद करन चाहो, कि तुमर कारण तुमर लोगा फिर बच जाएं। और हे लोग मनै, तुमके फिर याद करन चाहो, कि तुमर कारण तुम्री बैयर फिर बच जामएं।

परमेश्वरको बुलावटके अनुसार चल्नो

¹⁷ जो मए कहिरहो हओं बोको मतलब जा हए: परमेश्वरए तुमके छानी हए, और बहे तुमके बरदान दइ हए। और तुम सबके बहे अनुसार जीइन पणैगो। मए सबए मण्डलीनके सिखाओ भओ शिक्षा फिर जहेहए।

¹⁸ उदाहरणके ताहीं, जब एक यहूदी प्रभु येशूमे अपनए बिश्वास करत हए, तओ बोके अपनो यहूदी होनोके कारण त्याग देन जरुरत नाए हए। और अइसियए जा फिर, कि अगर कोइ आदमी जो गैर-यहूदी हए, प्रभुमे बिश्वास करत हए, तओ बोके यहूदी बननके ताहीं खतना करनको जरुरी नाए हए।

¹⁹ कोइको खतना भओ हए या नाए भओ हए, जासे कोइ फरक नाए पणत हए, पर परमेश्वरको आज्ञानके मानन बहुत जरुरी हए।

²⁰ परमेश्वरए तुमके बाके आदमी होनके ताहीं बुलाइ हए। और तुम सबके बहे अनुसार जीइन पणैगो।

²¹ अगर तुम कमैयाके ताहीं बुलाए गए हओ तओ तुमके जा बातमे चिन्ता नाए करन चाहो; पर अगर तुमर मालिक अपन इच्छासे तुमके, तुम स्वतन्त्र हुइके जाए सकत हओ कहिके कएहए कहेसे तुम स्वतन्त्र हुइके जाए सकत हओ।

²² काहेकी जो कोइ कमैया हए, बो प्रभुमे बुलाओ गओ हए। बो एक स्वतन्त्र आदमी कता हए, काहेकी प्रभु येशू बोके बोको पापके शक्तिसे मुक्त करीहए और उइसीयए जो स्वतन्त्रके ताहीं बुलाओ गओ हए, बो ख्रीष्टके गुलाम बनत हए।

²³ परमेश्वर तुमके किमतके रुपमे अपनो जीबन दइके तुमके छुटकारा करीहए, जहेमारे आदमीनको कमैया मतबनओ, बल्कि परमेश्वरके कमैया बनओ।

²⁴ तहिमारे हे मेरे बिश्वासी ददाभइयओ, जो कोइ जौन अवस्थामे बुलाए गए हओ, बो आदमी बहे अवस्थामे परमेश्वरके सँग रहाए।

बेहा बारेमे बचे भए प्रश्नको जबाफ

²⁵ बेहा नाए करे बारेनके बारेमे प्रभुकी कोइ आज्ञा मोके नाए मिलो, पर परमेश्वर अपनी दयाके अनुसार मोके ज्ञान दइ हए जोमे भरोसा करोजाए सकत हए और मए बहेके अनुसार सल्लाहा देत हओं।

²⁶ काहेकी जे दिननमे हर ठिहा अबिबाहित बिश्वासीनके मए जा सल्लहा देत हओं, कि बे अबिबाहित रहामएं, मोए लगत हए कि तुमर ताहीं अइसो करन अच्छो हए।

²⁷ अगर तुम बिबाहित हओ तओ बैयरके मत् छोडओ, अगर अबिबाहित हओ तओ बैयर ढुणनको कोसिस मत् करओ।

²⁸ पर अगर तुमर बेहा हुइ फिर जएहए तओ पाप नाए हए; और बेहा नाए करेभए बैयर बेहा करहएं तहुँफिर कोइ पाप नाए हए; पर बिबाहित आदमी जा संसारमे अपने जीबनमे अप्रिय चिजनको अनुभव करंगे और मए चाहंगो, कि तुम अइसे परेसानीनसे मुक्त रहाओ।

²⁹ हे मेरे बिश्वासी ददाभइयओ, मए जा कहात हओं, कि जा संसारमे हमरे ठिन जद्धा समय नाए हए, बहेमारे तुमरी बैयर हए या नाए हए, जाके बारेमे जद्धा परेसान मतहोबओ। लेकिन प्रभुको सेवा करनके बारेमे सोँचत रहाओ।

³⁰ जो आदमी रोत हएं या जो आदमी खुस हएं या जो आदमी अपनएके ताहीं चिजनके खरिदत हएं उनके जे सबए चिजनके बारेमे जद्धा चिन्तित नाए होनचाहो। काहेकी जे सब बातनमे तुम प्रभु येशूकी सेवा करनके ताहीं भुल जाबैगे।

³¹ और जा संसारमे जो कुछ फिर हमरे ठिन हएं, हमएं बोके बहुत मोल बारो नाए सम्झन चाहो, काहेकी जा संसारमे सब कुछ खतम हुइ जामंगे।

³² मिर इच्छा हए, कि तुम संसारको जीबनकी अभिलाषासे मुक्त रहाओ। परमेश्वरको सेवा कैसे करएं कहान बारी बातमे अबिबाहित पुरुष चिन्तामे रहात हए, कि प्रभुके कैसे खुसी करएं।

³³ पर बिबाहित पुरुष संसारके बातनको चिन्तामे रहात हए, कि अपनी बैयरके कैसे खुसी करएं।

³⁴ जहेमारे दुई चीज हएं जौनके बारेमे बो सोँचत हए, कि बो परमेश्वरके कैसे खुसी करए और कैसे बो अपनी बैयरके खुसी करए। उइसीयए जौनकी मँगनी हुइगओ हए बो बैयरमे फिर भेद हए: अबिबाहित स्त्री परमेश्वरको सेवा कैसे करएं कहान बारी बातमे चिन्तामे रहात हए, कि बो शरीर और आत्मा दुनौमे प्रभुके खुसी करन बारी बनए। पर बिबाहित जा संसारके चिजनके बातमे चिन्तामे रहात हए, कि कैसे अपनो लोगाके खुसी करए।

³⁵ जा बात तुमर भलाइके ताहीं कहात हओं, नाए कि तुमके फसानके ताहीं। मए तुमके नियमसे नाए बाँधो हओं, पर तुम एक मन हुइके प्रभुको सेवामे लागे रहाओ कहिके मिर कहाइ हए।

³⁶ अगर तुमर बीचमे कोइ आदमी अपनी लौंणीयाके अबिबाहित धरे हए, और अब बो सोँचत हए कि जा अच्छो बिचार नाए हए, और अगर बोकी लौंणीया बेहा करनके ताहीं जल्दीए बुढी हुइजाबैगी, और अब दौवा सोँचत हए कि बोकी लौंणीयाकी बेहा होनचाहो। तओ दौवाके बहे करन चाहो जो बोके लगत हए, कि अच्छो हए। अगर बो अइसियए चाँहत हए। दौवा बोके बेहा करनको अनुमति दइके पाप नाए कर रहो हए। बोके अपनी लौंणीयाकी बेहाको ब्यवस्था करन चाहो।

³⁷ पर अगर जा दौवा अपनो दिमाकमे कडो फैसला करलै हए, कि बोकी लौंणीयाके ताहीं बेहा नाए करन बढिया हए, और कोइ फिर बोके अइसो करनके ताहीं मजबुर नाए करीहए, तओ बोके ठिन उइसिए करनके अधिकार हए जो बो फैसला करीहए। और जहेमारे अगर बो अपनी लौंणीयाके, जैसो बो हए उइसीयए अबिबाहित रखानको फैसला करत हए, तओ बो परमेश्वरको नजरमे अच्छो काम कर रहो हए।

³⁸ जौन मँगनी भओ लौंणीयाके बेहा करत हए, बो आदमी अच्छो करत हए, पर बेहा नाए करैगो कहेसे औ अच्छो हए।

³⁹ जब तक कोइ स्त्रीको लोगा जिन्दा रहात हए, तबतक बोके सँग रहान चाहो, पर जब बोको लोगा मर जाए, तओ जोके चाँहए बहेसे बेहा कर सकत हए। पर केबल बहेसे, जो प्रभुमे बिश्वासी हए।

⁴⁰ पर अगर बो अबिबाहित राहात हए तओ मेरे बिचारमे बो और जद्धा धन्य हए और मोके लागतहए कि परमेश्वरको आत्मा मिर मार्गदर्शन कर रहो हए।