1 कोरिन्थी 4 - राना थारु नयाँ नियम

ख्रीष्टके चुनेभए चेला

¹ आदमीके, हमके ख्रीष्टको सेवक और परमेश्वरको लुको भओ सत्यके प्रकट करन बारो जिम्मेबारी सौँपो गओहए कहिके मानन पणत हए।

² एक आदमी जोके अपनो मालिक द्वारा काम करनके ताहीं दओगओ हए, बोके सचमे बिश्वासयोग्य होनचाहो, ताकी बो आदमी बहे कामके करए जो करनके बोके आज्ञा दओगओ हए।

³ जहाँ तक मेरी बात हए, मए जा बातको चिन्ता नाए करत हओं, कि तुम या औ कोइ आदमी का कहात हएं। हियाँतककी मए फिर नाए कहात हओं, कि मए बिश्वासयोग्य हओं या नाए।

⁴ काहेकी मिर बिबेक मोके कछु बातमे दोषी नाए ठाहिरात हए, पर जासे मए निर्दोष नाए ठहिरत हओं, काहेकी मिर न्याय करन बारो परमेश्वर हए।

⁵ जहेमारे जब तक प्रभु नाए लौटए तबतक कोइको न्याय मत् करओ। परमेश्वर स्पष्टसे बे सब बिचारनके बताबैगो जो आदमीनको भितर हए, जौनके बारेमे कोइ नाए जानत हए। परमेश्वर उदेश्यन्के प्रकट करैगो जो उनको दिलमे हए।

ख्रीष्टके ताहीं मुरख होनो

⁶ हे मेरे बिश्वासी ददाभइयओ, मए अपोल्लोसके और अपनएके एक उदाहरण रुपमे इस्तमाल करो हओं। जा बतानके ताहीं, कि मए का कर रहो हओं। तुमके हमसे सिखन चाहो, कि पबित्र-शास्त्रमे जो लिखो हए, बोसे अग्गु मतजाओ। अब तुम घमण्डसे हम मैसे एक-दुस्रेके बिरोधमे नाए रहाइगे।

⁷ काहेकी जो कुछ फिर तुमर ठिन हए बो तुमके परमेश्वरके द्वारा दओ गओ हए, तुमर ठिन घमण्ड करनको कोइ अधिकार नाए हए।

⁸ अइसो लगत हए, कि तुम सोँचत हओ कि तुमर ठिन बो सब चीज हए जोको आत्मिक रुपसे तुमके जरुरत हए। तुम सोँचत हओ, कि तुमर ठिन पहिलीएसे बे सब बरदान हएं जो पबित्र आत्मा आदमीनके देतहए। तुम सोँचत हओ, कि तुम हमरे बिना राजा कता राज्य करन सुरु करदए हओ। मए खुसी हुइतो अगर तुम सचमे राजा कता राज्य करन सुरु करडारे हुइते, ताकी हम फिर तुमर सँग राज्य करपैते।

⁹ काहेकी मोके अइसो लागत हए, हम चुनेभए चेलनके परमेश्वर सबसे निचो ठाउँमे धरी हए। परमेश्वरए हमके बाके स्वर्गदूत और जा संसारके आदमी और आदमीनके अग्गु ज्यान सजाय पान बारे आदमीनके हानी तमासा बनाए।

¹⁰ आदमी हमके मुरख सम्झत हएं काहेकी हम ख्रीष्टके बारेमे परचार करत हएं, पर गल्तीसे तुम सोँचत हओ, कि तुम बहुत बुद्धिमान बिश्वासी हओ! बहुत सारे आदमी सोँचत हएं, कि हमरे ठिन कोइ अधिकार नाए हए। पर तुम घमण्डसे कहात हओ, कि तुमर ठिन परमेश्वरको शक्ति हए। आदमी हमर सम्मान नाए करत हएं पर बे तुमर सम्मान करत हएं।

¹¹ हम आजको दिनतक भुँखे प्यासे और फटे-पुराने लत्ता पैँधे हएं, और पिटाइ खात हएं और हमरे ठिन घर फिर नाए हए।

¹² और अपनो हातसे काम करके हम मेहेनत करत हएं। अपमानित होन समयमे हम बिनके आशिष देत हएं। और जब हम सताए जात हएं हम सहात हएं।

¹³ बे बेज्जत करत हएं, हम उनसे बिनम्रतासे बात करत हएं हियाँतक, कि अभौफिर आदमी हमर आदर नाए करत हए; बे कहात हएं, कि हमर संसारमे कोइ मोल नैयाँ।

ख्रीष्टको अनुसरण करियओ कहिके पावलको सल्लाहा

¹⁴ मए तुमके लज्जित करनके ताहीं जा बात नाए लिखत हओं, पर मिर उदेश्य तुमके अनुशासित करनो हए। काहेकी तुम मेरे बच्चा कता हओ, जौनके मए सचमे प्रेम करत हओं और चेतावनी देत हओं।

¹⁵ काहेकी चहुँ तुमर ठिन ख्रीष्टियन जीबनमे तुमके डगर दिखान बारे हजारौँ महाट्टर होएं, पर सिर्फ महिं तुमर दौवाके बरोबर हओं, काहेकी महिं बो सुरुको आदमी हओं जो तुमर ठिन अच्छो समाचार लैके आओ, जोके परिमाण स्वरुप तुम ख्रीष्ट येशूमे बिश्वास करन लागे।

¹⁶ जहेमारे मए तुमसे बिन्ती करत हओं, कि मिर अनुसरण करन बारे होबओ।

¹⁷ जहेमारे मए तिमोथीके तुमर ठिन पठाओ हओं जो प्रभुमे मिर प्रिय और बिश्वासयोग्य लौंणा हए, और मए हर ठिहा हर एक मण्डलीमे शिक्षा देए अनुसार, तुम येशू ख्रीष्टमे कैसो ब्यबहार करत हओ कहिके बो तुमके याद दिलाबैगो।

¹⁸ तुमर बीचमे कुछ आदमी सोँचत हएं, कि मए तुमसे मिलन्के नाए आमंगो, और जहेमारे बे घमण्डी हुइगए हएं।

¹⁹ पर प्रभु चाहैगो तओ मए तुमर ठिन जल्दीए आमंगो, और सिर्फ जाके ताहीं इकल्लो नाए कि, बे घमण्डी आदमी कैसे बात कर रहे हएं, बल्कि उनको शक्तिके फिर जाननके ताहीं आमंगो।

²⁰ काहेकी परमेश्वरको राज्यमे बहुत बात कर्नो इकल्लो नाए हए, बल्कि परमेश्वरको शक्तिसे जिइनो हए।

²¹ तुम का चाँहत हओ, कि जब मए आओ तओ का करंगो? अगर तुम अभौफिर अपने खराब तरीकनके नाए रोकैगे तओ मए कडा रुपसे तुमके डाँटंगो। पर अगर तुम अपने खराब तरीकनके पालन करन बन्द करदेबैगे, तओ मए तुमसे नम्रता और प्रेमसे ब्यबहार करंगो।