1 कोरिन्थी 3 - राना थारु नयाँ नियममण्डलीमे बिभाजन 1 हे मेरे बिश्वासी ददाभइया, जब मए तुमर सँग रहओं तओ मए तुमके गहिरी शिक्षा नाए बताए पाओ जैसे मोके आत्मिक आदमीनके सँग करन रहए। मोके अइसे बात करन पणो, जैसेकी तुम ख्रीष्टियन जीबनमे बच्चा रहओ। 2 बो समय मए तुमके परमेश्वरको सन्देशसे सिर्फ सजिले बातनके बारेमे सिखाओ, जैसेकी एक आदमी छोटे बच्चनके पिनके ताहीं दुध देतहए। मए परमेश्वरको बचनकी गहिरी सच्चाईनके नाए सिखाओ, जो एक खँदिलो खानु कता हए। काहेकी तुम जाके ताहीं तयार नाए रहओ। 3 काहेकी तुम जा संसारके आदमीन कता रहात हओ। जहेमारे, कि जब तुम सबसे जरत हओ और लडाइ करत हओ, तओ का जा जहे बातके साबित नाए करत हए, कि तुम जा संसारसे सम्बन्धित हओ? और का तुम जा संसारके आदमीन कता नाए जीइ रहेहओ? 4 जहेमारे, तुम मैसे कोइ एक कहात हए, “मए पावलको हओं,” और दुस्रो कहात हए, “मए अपोल्लोसको हओं,” तओ का तुम संसारके आदमीन कता नाए जीइ रहेहओ? परमेश्वरके सेवकनको भूमिका 5 अपोल्लोस कौन हए? पावल कौन हए? बे सेवक इकल्ले हएं, जोसे तुम ख्रीष्टमे भरोसा करे। हम मैसे सब आदमी बहे काम करे जो परमेश्वर हमके करनके ताहीं दइ। 6 तुमके परमेश्वरको सन्देश बतान बरो मए पहिलो आदमी रहओं, जहेमारे मए बो आदमी कता हओं जौन खेतमे बीज बोइ। बोको पिच्छु, अपोल्लोस तुमके तुमर बिश्वासके मजबुत होनके मदत करी, ठिक उइसीयए कोइ दुस्रो आदमी बे पेणनके पानी देतहए जो बढन लगे हएं। पर परमेश्वर तुमके नयाँ जीबन दइ हए और तुमके आत्मिक रुपसे बढनमे मदत कर रहो हए, जैसे परमेश्वर पेणके बढात हए। 7 जहेमारे जो बोतहए और जो छिँचत हए, बोको कोइ महत्त्व नाए हए। सिर्फ परमेश्वर महोत्वपूर्ण हए, काहेकी बहे हए, जो पेणके बढात हए। 8 जो पेण लगात हए बोको मोल और जो छिँचत हए बोको मोल बिरकुल एकए कता हए, और जे दुनौ जो करी हएं, बोको अनुसार इन्के परमेश्वरके घेनसे इनाम मिलैगो। 9 काहेकी हम परमेश्वरको सेवामे मदत करन बारे आदमी हएं; और तुम कोरिन्थीके बिश्वासी एक खेत कता हओ, जो परमेश्वरको हए। और मए तुमर तुलना एक घरसे कर सकत हओं, जोके परमेश्वर बनाए रहो हए। 10 परमेश्वर मोके जो काम अपनो बरदानसे करनके दइ हए, बोके मए बुद्धिमानसे करो; मए तुमर सहरमे अच्छो समाचार परचार करो और तुमसे पहिले आदमीनके येशूमे बिश्वास करनमे मदत करो। बोके पिच्छु, अन्य ख्रीष्टियन मजदुर बो काम करतए रहे, जो मए सुरु करो रहओं। पर हम मैसे सब मजदुरन्के ध्यानसे बिचार करन चाहो, कि हमके परमेश्वरको काम कैसे करनके हए। 11 कोइ फिर तुमके बचाए जानको कोइ नयाँ तरिका नाए सिखाबए। बचाए जानको सिर्फ एकए तरिका हए। और बो तरिका मए तुमके पहिलीयए बताए डारो हओं; परमेश्वर हमके येशू ख्रीष्टके द्वारा बचात हए। 12 अगर ख्रीष्टियन मजदुर सही शिक्षा देत हएं जो परमेश्वर उनके दइ हए, तओ बे उइसो घर बनान बारे कता हएं जो सोनो, चाँदी और बहुमूल्य पत्थरन कता अच्छो गुण भओ समानसे जग डारके घरके बनात हएं। पर अगर बे झुठे शिक्षा सिखात हएं, तओ बे उइसो घर बनान बारे कता हएं जो कट्ठा, जंगल और पैरा जैसे घटिया गुण भओ समान इस्तमाल करके बनात हएं। 13 जब ख्रीष्ट फिरसे आबैगो तओ आगी हर आदमीको करोभओ कामके दिखाबैगो। आगी जहे दिखाबैगो, कि बो आदमीको कामको कोइ मोल हए या नाए हए। 14 अगर कोइ आदमीके द्वारा बनाओ गओ घर जा जगमे स्थिर रहात हए तओ बोके जाको इनाम मिलैगो। 15 लेकिन अगर ख्रीष्ट जा कहात हए, कि एक निश्चित मजदुर जो काम करीहए बो अच्छो नाए हए तओ ख्रीष्ट बो मजदुरके प्रतिफल नाए देबैगो। तहुँफिर, मजदुर बो कभी फिर नाश नाए होन बारो जीबनके नाए खोबैगो जो परमेश्वर बोके दइ हए। 16 निश्चित रुपसे तुम जानत हओ, कि तुम अपनए परमेश्वरके मन्दिर हओ, और परमेश्वरको पबित्र आत्मा तुममे बास करत हए। 17 जो कोइ परमेश्वरके आदमीनके बीच मेलमिलापके नष्ट करत हए, परमेश्वर फिर बोके दण्ड देबैगो; काहेकी परमेश्वरको मन्दिर पबित्र हए, और बो मन्दिर तुम हओ। संसारकी ज्ञानसे बचओ 18 अगर तुम मैसे कोइ फिर जा सोँचत हए, कि बो आदमी जा संसारके आदमीनको बिचारके अनुसार समझदार हए, तओ तुमके जा संसारके आदमी उनको बिचारमे अपनएके मुरख बनानके होबैगो, ताकी तुम सचमे परमेश्वरके बिचारमे ज्ञानवान हुइ पाबओ। 19 काहेकी बो बात जो जा संसारके आदमी समझत हएं, कि ज्ञानवान हएं। पर जा ज्ञान परमेश्वरके अग्गु मुरखता हए, जा उइसीयए हए जैसे पबित्र-शास्त्र कहात हए, “कुछ आदमी सोँचत हएं, कि बे ज्ञानवान हएं, पर परमेश्वर उनको अपनो चतुर योजनन्के इस्तमाल उनके हरानके ताहीं करत हए।” 20 पबित्र-शास्त्र जा फिर कहात हए, “ज्ञानीनको बिचार काम नाए लगैगो, कहिके प्रभु जानत हए।” 21 जहेमारे एक खास आदमी अगुवाके आज्ञापालन करनके बारेमे घमण्ड करन बन्द करओ, काहेकी परमेश्वर तुमके सब कुछ तुमरी भलाइके ताहीं दइ हए। 22 अर्थात् जा कि, मए पावल, अपोल्लोस, केफास, जा संसारके चीज, चहुँ तुम जिन्दा रहाओ या मर जाओ, बर्तमान, भबिष्य परमेश्वर तुमके सब कुछ तुमरी भलाइके ताहीं दइ हए, 23 और तुम ख्रीष्टके अधिकारके अधीनमे हओ, और ख्रीष्ट परमेश्वरके अधिकारके अधीनमे हए। |
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.
Beyond Translation