PHILEMON 1 - Thukhun Thak NT (BSI)

Chibaibukna

¹ Paul, Jesu Krist a koltang leh, i sanggampa uh Timothi in, Ka lawm ittak uh leh ka naseppih uh Philemon kiang ah,

² tualeh ittak i sanggamnu uh Apphia leh ka galkappih uh Arkippa kiang ah, tualeh na inn a saptuam kikhawmte kiang ah:

³ I Pa uh Pasian leh i Toupa uh Jesu Krist a kipan hehpihna leh khamuanna na kiang uah om hen.

Philemon Itna leh Ginna

⁴ Ka thumnate ah na min lougige in, ka Pasian kiang ah kipahthu ka gen hi.

⁵ Toupa Jesu lam leh misiangthoute jousiah lam a itna leh ginna na neihdan ja in.

⁶ Na ginna kikoppihna pen Jesu Krist a nangmah a om silhoih jousiah a theihkimna lam a ahung phattuam theihna ding in.

⁷ Ajiak sanggampa aw, na itna ah muanna leh hehnepna thupitak ka nei uhi, nang jiakin misiangthoute lungtang ahalhthakta hi.

Onesima a ding Paul ngetna

⁸ Tuajiakin akilawm hun bawl ding a nang thu hungpiak hih Krist ah ki ngap mahmah nanleng zong,

⁹ itna jiakin keimah, Paul, putek leh tu a zong Jesu Krist a koltang in kung ngenjaw ahi.

¹⁰ Ka koltanna a ka neihkhiat ka tapa, Onesima, a dingin kung ngen hi.

¹¹ Amah pen tu-masang in nang a dingin a phatuam kei a, hinanleh tun nang leh kei dingin “a phatuamta” hi.

¹² Amah kung sawlkikta a, tuajiakin, keima lungtang ahi a, kipaktak in napom in.

¹³ Amah pen ka tangthupha kolbulhna a nangmah tang a nna hung sepsak dingin ka kiang a omdensak ka ut mahmah a;

¹⁴ hinanleh nang ki panpihsak teitei ka utkei a, na utthu a hih ahihtheih jawkna dingin na thulouin bangmah ka bawlnuam kei hi.

¹⁵ Ajiak hun tomkhat sung nang a hungkhen pen tangtawn a amah na neihjawk na ding zong ahi maithei hi.

¹⁶ Hinanleh tuinjaw sila bang a hilouin sila sang a hoih, unau deihtak bangin kei dingin deihtuam ahi a, nang ding semin houh taksa leh Toupa ah a bangchihih jawsem tadiai!

¹⁷ Tuajiakin na kithuahpih bang a nung ngaihtuahleh, keimah ngei bangin napom in.

¹⁸ Na tung a bawlkhial aneih a, bat bangmah aneihleh zong, keima bat in nakoih in.

¹⁹ Keimah, Paul in, hihpen ka khut ngeia kagelh ahi: keiman ka ditsak ding hi. (Hinanleh keikiang ah bat na neia nang mahmah zong na kiba chia ka genna ahi kei hi.)

²⁰ Ahi, unaupa, nang a kipan-a kipakna Toupa hung neisak in! Krist ah ka lungtang hung hihhalhsak in.

²¹ Na thumanna a kimuang in leh, ka gen sang a thupijaw a na bawl ding gingta in, na kiang ah kung gelh ahi.

²² Bangteng hileh kei ding in zong tunna ding inn khat hung na ngaihtuahsak in, na thumnate uh jiakin na kiang ua piak a ka om ding ka kigingta hi.

Chibaibuk tawpna

²³ Krist Jesu a ka koltangpih Epaphra in chibai ahung buk hi,

²⁴ tualeh Marka, Aristarkha, Dema, tualeh Luka, ka naseppihten zong.

²⁵ I Toupa uh Jesu Krist hehpihna nakha uh kiangah om hen. Amen.