LUKA 1 - Thukhun Thak NT (BSI)

Thumapui

¹ I lak ua ataktak a sil na om, mi tampite`n phuankhiat na ding ngaihtuah a gelh ana tup uh:

² Atu`ng a pan a mit a mute leh thu nagelhte`n a hunghilh bang un,

³ Theophila aw, abul a kipan sil bangkim kiteltak a theihkimna neiin ka enchian a, kijom jel a na kiang a gelh hoih kasa hi.

⁴ Masang a nang hung kihilh thute adik na hi chih na theihna ding in.

Baptispa Johan pian ding genkholhna

⁵ Judea gam a Herod kumpi a apan laiin, amin Zakariah kichi siampi nasem khat a om a, tualeh azi Aaron tanute khat ahi a, amin Elizabeth ahi.

⁶ Amau nupa Pasian mitmuh in midik ahi ua, Toupa thupiakte leh dante dembei in a juikim uhi.

⁷ Hinanleh Elizabeth achi`n jiakin ta anei kei ua, amauh a upa tuak mahmahta uhi.

⁸ Tualeh hichi ahung hi a, aman a huntan dungjui a Pasian mai a siampi nna sem a aom laiin.

⁹ Siampu tawndan dungjuiin Pasian tempul sung a alut chiang a gim namtui hal ama tan ahi a,

¹⁰ tualeh gim namtui kihal sung in mipite`n apualam ah thumna ana nei uhi.

¹¹ Tuachi`n Pasian vantungmi khat gimnamtui kihalna maitam jiatlam ah dingin a kiangah ahung kilak a.

¹² Zakariah in amuh takin adihguih a, ahung lauta hi.

¹³ Hinanleh Pasian vantungmi in a kiang ah, “Zakariah, lauken! Na thumna jak ahita hi, nazi Elizabeth in tapa ahung neisak ding a, amin Johan naphuak ding ahi.

¹⁴ Tuachi`n nang nuam in na kipak ding a, mi tampite amah pianni-in akipak ding uhi!

¹⁵ Pasian ngaih in amah milian ahi ding a, uain ahihkeileh khamtheih dang mawng mawng adawn kei ding, anu gilsung a kipan Khasiangthou in adim ding hi.

¹⁶ Tuachi`n Israeltate tampi Toupa a Pasian uh lam ah a kilehkik sak ding hi.

¹⁷ Tualeh pate lungtang tate lam a ngasak ding leh, thu mang loute midiktat pilna lam ngasak ding leh, Toupa ding a mi honkhat mansa a omsak ding a na bawlkholh dingin Elijah lungsim leh silbawl theihna tawh Toupa mai ah apai ding hi,” achi hi.

¹⁸ Tuatakin Zakariah in Pasian vantungmi kiangah, “Hihmi bangchi`n ka theithei dia? Keilah upata ing a, ka zi zong a upata mahmah hi.” achi a.

¹⁹ Tuachi`n Pasian vantungmi in a dawnga a kiangah, “Kei Gabriel, Pasian maia ding pen ka hi; tualeh na kiang a hihthu gen ding leh hihthu kipak huaite hilh ding a sawl ka hi.

²⁰ Hinanleh ngaiin, ahun bang a hung tung ding hihthu ka gente na gintatlouh jiakin, hih silte ataktak a ahung tun masiah hamtheilou in na om ding a, bangmah na genthei kei ding,” achi hi.

²¹ Tualeh mipite`n Zakariah angak ua, Pasian tempul sung a asawt om seng jiakin lamdang asa uhi.

²² Hinanleh a hungpawt in akiang uah thu a genthei takei a; tuatak in tempul sung ah kilakna amu hi chih atheita ua; ajiak akiang uah akhut in theihsakna abawl a, tuachi`n hamtheilou in a omjingta hi.

²³ Tualeh hichi ahung hi a, a nasep ni achin takin inn ah apaita hi.

²⁴ Tuachi`n ni tomkhat zoh in azi Elizabeth ahung gaita a, kha nga sung a kibu a, agen a.

²⁵ “Mi lak a ka minsiat sel dingin, Toupa`n ahung muh in ka tung ah hichi bangin abawlta hi!” achi hi.

Jesu pian ding genkholhna

²⁶ Tualeh Elizabeth gai a khagukna ah Pasian in a vantungmi Gabriel Galili gam a khuapi khat amin Nazareth kichi ah,

²⁷ Nungak siangthou khat, David suan a mi, amin Joseph kichipa zi ding a kikhamsa kiangah asawl a, tua nungak siangthou min ahihleh Mari ahi.

²⁸ Tualeh vantungmi a kiangah alut a, “Chibai nang nakpitak a deihsaknu, Toupa na kiangah aom hi! Numei lak a hamphanu nahi!” achi hi.

²⁹ Hinanleh amahnu`n amah amuh takin a thugente a lunghimohta mahmah a, bangchi dan a chibai hungbuk adiam aw? chi`n aki ngaihtuah hi.

³⁰ Tuachi`n Pasian vantungmi in amahnu kiangah, “Mari, Lauken; Pasian a pan deihsakna natang hi.

³¹ Ngaiin, nagai ding a, tapa na nei ding a, amin Jesu naphuak ding ahi.

³² Amah milian ahung hi ding a, tunungpen Tapa a kichi ding; tualeh Toupa Pasian in a kiangah apa David laltouna apia ding hi.

³³ Tualeh Jakob suante tung ah kumtawn in vai ahawm ding a, agam in beini anei nawn kei ding hi!” achi hi.

³⁴ Tuachi`n Mari-in vantungmi kiangah, “Kei nungak siangthou hi-ing a, hih bangchi`n a hithei diai? Pasal lah neilou ing a?” achi hi.

³⁵ Tuachi`n vantungmi-in adawng a akiang ah, “Khasiangthou natung ah ahung tung ding a, Tungnungpen silbawltheihna-in ahung liahkhuh ding; tuajiakin nang a pat hung piang ding zong siangthou Pasian Tapa chih ahi ding hi.

³⁶ Tualeh ngaiin, na sanggamnu Elizabeth in zong a upat nung in tapa khat apaita hi, achi`ng achihnu uh, a khagukna ahita hi.

³⁷ Ajiak ahihleh Pasian dingin a hitheilou bangmah aom kei hi,” achi hi.

³⁸ Tuachi`n Mari-in, “En-in, kei, Toupa silanu ka hi, nagen bangbang in ka tungah hung tung hen,” achi a. Tuachi`n vantungmi-in apaisanta hi.

Mari in Elizabeth avehna

³⁹ Huanite in Mari athou a; singtang ah Judea gam khuapi khat ah apaipah vingveng hi.

⁴⁰ Tuachi`n Zakariah inn ah alut a Elizabeth chibai abuk hi.

⁴¹ Tualeh hichi ahi a, Elizabeth in Mari chibaibuk ajak takin, asung a naungek a kitawm a, tuachi`n Elizabeth pen Khasiangthou in ahung dimta a;

⁴² Tuachi`n aw ngaihtak in ahung kikoukhia a; “Nang numei tengteng lak ah hamphanu nahi, nagil a gah zong ahampha hi!

⁴³ Ka Toupa nu ka kiang a nungpai bangchi dan ahia?

⁴⁴ Ngaiin, nung chibaibuk husa gin kabil a alut takin, ka naubu sung a om naungek nuam in akitawm hi.

⁴⁵ Tuachiah agingtanu zong ahampha hi; Toupa`n akiang a athugen tangtung ding ahih jiakin!” achi hi.

Mari phatna la

⁴⁶ Tuachi`n Mari-in: “Ka hinna in Toupa apahtawi a,

⁴⁷ Tualeh kakha zong a hundampa Pasian tung ah a kipak hi,

⁴⁸ Ajiak aman asilanu nam ngiam dan alimsak a! Ngaiin tu a kipan in khangthak jousiahin hampha a hungchi ding uhi.

⁴⁹ Amah mihat in ka tung ah sil thupitak ahung bawlta a; tualeh amin zong siangthou ahi.

⁵⁰ Tualeh amah laudan siamte tungah ahehpihna akhang akhang in a omtou pek ding hi.

⁵¹ Aban in a thahatdan a ensak a, mi kiliansakte a lungsim suangtuah nate uh athehjak sak hi.

⁵² Mihatte a laltouna ua kipan a kaikhia a, mi ngiamte a tawisangta hi.

⁵³ Gilkialte silhoih in ataisak a, hinanleh mi hausate khutguak in a sawlmangta hi.

⁵⁴ Azahngaihna theihjingna in, a sila Israel a panpih ta a;

⁵⁵ Tangtawn a ding a ipu leh pate, Abraham tualeh asuan leh khakte kiang a agen bangbang in!” achi hi.

⁵⁶ Mari Elizabeth kiangah kha thum vel atam a, tuachi`n a inn ah apaikikta hi.

Baptispa Johan pianna

⁵⁷ Tualeh Elizabeth nausuah hun a hungtungta a, tuachi`n tapa ahung neita hi.

⁵⁸ A innvengte leh a sanggamte`n Toupa`n hehpihna thupitak atung ah a langsakta chih anaja ua, a kipahpih mahmah uhi.

⁵⁹ Tualeh hichi ahung hi a, a nigiatni in naungek teptan dingin a hung zohpih ua, amin dingin apa min la in Zakariah aphuak sawm uhi.

⁶⁰ Hinanleh anu in, “Hilou e! amah Johan kichi ding ahi,” achi hi.

⁶¹ Hinanleh amau`n a kiangah, “Nabeh naphung lak ah hihbang min nei kuamah om nailou pi!” achi ua.

⁶² Tuachi`n amau`n apa kiangah chiamtehna bawl in, amin dingin bang phuak lei nadeih a? achi ua.

⁶³ Aman laigelhna pek a ngen a, “Amin Johan ahi,” chi`n agelh a, tuatakin aun un lamdang asa chiat uhi!

⁶⁴ Tuachi`n akam ahung kihong pai a, alei ahung kiphel a, ahung ham a, Pasian aphatta hi.

⁶⁵ Tuachi`n akiang ua tengte jousiah ahung lauta ua, tualeh hihthu Judea gam singtang jousiah ah a thangsuakta hi.

⁶⁶ A jakha jousiahin a lungtang uah agel chiat ua, “Hih naungek bang chibang ahung hitazen diam aw?” Chi-in, Toupa khut in amah a ompih hi.

Zakariah genkholhna

⁶⁷ Apa Zakariah Khasiangthou in ahung dimta a, a genkholh a:

⁶⁸ “Toupa Israel Pasian phat in om hen! Ajiak aman amite hungveh a a hungtanta hi.”

⁶⁹ A sila David suante lak ah, hundamna kii ahung siamsakta hi.

⁷⁰ Leitung pianchil a pat Jawlnei siangthoute kam a anagen mahbang in;

⁷¹ I melmate lak a kipan in leh ahung huate jousiah khut a kipan hundam a i om ding thu.

⁷² I pu leh pate kiang a zahngaihna achiam bawl dingin leh a thukhun siangthou theigige dingin.

⁷³ Ipu uh Abraham kiang a a kichiamna,

⁷⁴ I melmate lak a pan ahung hutkhiat a, lauloua a nna iseptheihna ding;

⁷⁵ I damsung teng a amitmuh a siangthou leh diktat tak a om ding in.

⁷⁶ Tualeh “Naungek, nang, tungnung pen Jawlnei ahung kichi ding hi. Ajiak a lampite bawl dingin Toupa maiah napai ding hi,

⁷⁷ A khialhnate uh ngaihdamna ding a amite kiang a hundamna theihna pia ding in.

⁷⁸ I Pasian uh hehpihna nemnou jal in, tunglam a kipan nisuak in ahung khohta hi

⁷⁹ miallak a leh sihna lim nuai a toute tanvak ding leh khamuanna lampi a i kengte kal suansak dingin,” achi hi.

⁸⁰ Tuachi`n naungek a hung khanglian a; a khalam ahung hat hiai hiai a, Israelte kiang a ahung kilak masiah gamdai ah a omjing hi.