JOHAN 1 - Thukhun Thak NT (BSI)

Thu sa hung suakna

¹ Atu`ng in thu a om, Thu hih Pasian kiangah a om, Thu hih Pasian ahi.

² Amah atu`ng in Pasian kiangah a om.

³ Sil jousiah ama siam ahi a, silsiam tengteng ama siamlouh bangmah aom kei.

⁴ Amah ah hinna aom a, tua hinna ahihleh mihingte vakna ahi.

⁵ Vak mial lak ah ahung vak a, mial in amah atheikei hi.

Baptispa Johan vak theihpihtu hihna

⁶ Pasian a kipan a sawl mi khat aom a, amin Johan ahi,

⁷ amah theihpihtu dingin a hungpai a, tua vak theihpih dingin, mi jousiahin amah jiak a agintat theihna ding un.

⁸ Amah tua vak ahi kei a, hinanleh vak theihpihtu ding a sawl ahijaw hi.

⁹ Tuapen vak diktak michih tanvak ding a leitung ah a hungpai lellel hi.

¹⁰ Amah leitungah aom a, leitung ama siam ahi; tualeh leitungin amah atheikei hi.

¹¹ Amah amite kiangah a hungpai a, amah amite`n ana kipahpih kei uhi.

¹² Hinanleh amah kipahpih jousiahte kiangah Pasian tate hihtheihna ding sil bawltheihna apia hi; amah agingtate kiang ah.

¹³ Tuate ahihleh sisan a piang ahikei a, taksa deihdan a piang zong ahi kei a, tualeh mihing deihdan a piang zong ahikei a, hinanleh Pasian a piang ahijaw uhi.

¹⁴ Tualeh Thu hih sa ahung suak a, eite lak ah ateng hi, hehpihna leh thutak a dim in; a thupina Pa Tapa tang neihsun thupina bangbang, eite`n imuta hi.

¹⁵ Johan in amah theihpihna apia a, akikou a, “Ka nung a hungpaipa in ahung makhelhta hi, ‘ka maia ommawng ahihjiak in, chia athu ka genpa amah ahi.’ ”

¹⁶ Ama bukimna itangchiat uh, hehpihna tung a hehpihna sawnsawn tawh.

¹⁷ Ajiak danthu Mosi tungtawn a piak ahi a; hinanleh hehpihna leh thutak Jesu Krist a pat hungpai ahi.

¹⁸ Kuaman bangchiklai in zong Pasian amu ngaikei; Tapa tang neihsun, Pasian angsung a ompa, amah in atanchin aphuangta hi.

Johan leh athupuak

¹⁹ Tualeh hih pen Judate`n Jerusalem a kipan siampute leh Levite kiang a, “Nang kua na hia?” chia dong ding a asawllai ua Johan thu theihsakna ahi hi.

²⁰ Amah panglou in a kiphuang a: “Krist ka hi kei,” achi hi.

²¹ Tualeh amau`n, “Ahihleh nang kua na hia?” Elijah na maw chi`n adong ua. Aman, “Ka hikei,” achi a, “Jawlnei namaw leh?” achi ua, Aman, “Hilou,” chi`n adawng a.

²² “Tuachi`n amau`n a kiangah, kua na hia, a hungsawlte ka dawntheihna ding un hunghilh in, nang leh nang kua ka hi kichi na hia,” achi ua.

²³ Aman Jawlnei Isaiah gen bang a: “Toupa lampi tangsak un, chia gamdai a kikou aw, ‘keimah ka hi!’ ” achi hi.

²⁴ A misawlte uh Pharisaite lak a mi ahi ua,

²⁵ tualeh amah adong ua, a kiangah, Krist lah hilou, “Elijah lah hilou, hua Jawlnei lah hilou nahihleh bangding a na baptis ahia?” achi ua.

²⁶ Johan in amauh adawng a, “Ken tui in ka baptis a, hinanleh na theihlouh khat nalak uah ading hi.

²⁷ A khedap khau sutding in zong ka chingkei, ka nung a hungpaia hung makhelhpa, amah ahi,” achi hi.

²⁸ Hih silte Jordan gal a, Bethabara, Johan in a baptisna mun a kibawl ahi.

Pasian belam nou

²⁹ Ajingni-in Johan in Jesu a kiang lam a hungpaiin amu a, “En un Pasian belamnou, leitung khialhna puamang dingpa!

³⁰ Hihpa ahi, mi khat ahung makhelhpa, ‘Ka nung ah a hungpai hi, kama-a omsa mawng ahihjiak in,’ chia ka nagenpa.

³¹ Amah ka theikha kei, hinanleh Israelte kiang a amah suklang a aom theihna dingin tui a baptis in kungpai ahi,” achi hi.

³² Tualeh Johan in athu atheihpih a, “Khasiangthou vakhu bang a van a kipan a hung kumsuk atung a hungtuang den kamu hi.

³³ Ken amah ka theikei, hinanleh tui a baptis ding a hungsawlpa amah mah in ka kiangah, ‘Kuahiam tung a Kha hung kumsuk a, atung a tuangden namuh penpen, amah ahi Khasiangthou a baptis dingpa,’ ahung chi hi.

³⁴ Tua kamu a, tualeh hihpa Pasian Tapa ahi chih ka thei hi,” achi hi.

Jesu leh Johan nungjuite

³⁵ Ajingni in Johan ading a a nungjuite nih tawh,

³⁶ tualeh Jesu vak kawikawi a om amu ua, “En un, Pasian belamnou!” achi hi.

³⁷ Tua nungjui nihte`n athugen aja ua, Jesu ajuita uhi.

³⁸ Tuachi`n, Jesu akihei a, ahung juih uh amuh in akiang uah, “Bang ahia na zon uh?” achi a. Amau`n a kiang ah, “Rabbi khoiah ahia naten?” achi ua. (huahi “Siapa” chihna ahi.)

³⁹ Aman akiang uah, “Hungpai unla, en-un,” achi a. Tuachi`n a hungpai ua, atenna a en ua, amu ua, tualeh a kiangah tuani in a om uhi, sunnung dak lina vel ahihjiak in.

⁴⁰ Johan thugen ja, Jesu jui tegel lak a khat ahihleh Simon Peter sanggampa Andru ahi a.

⁴¹ Aman a masapen in ama sanggampa Simon amu a, akiang ah, “Messiah ka muta uh,” achi a, (huapen “Krist” chihna ahi.)

⁴² Tuachi`n amah Jesu kiangah azohpih a, Jesu`n amah a en a, nang Jona tapa Simon nahi a; “Kifa ahung kichi ta ding hi,” achi a. (huapen “suang” chihna ahi).

Jesu`n Philip leh Nathaniel asapna

⁴³ Ajingni-in Jesu`n Galili gam ah pai asawm a, Philip amu a, akiang ah, “Hung juiin!” achi hi.

⁴⁴ Philip zong Andru leh Peter tenna khuapi Bethsaida a teng ahi hi.

⁴⁵ Philip in Nathanael amu a, akiang ah, “Mosi in dan laibua a tungtang anagelh leh Jawlneite`n anagelh uh Nazareth Jesu Joseph tapa ka muta uhi,” achi hi.

⁴⁶ Tuatakin Nathanael in akiang ah, “Nazareth a kipan in silhoih apawt khiathei ngaia maw?” achi a. Philip in akiang ah, “Hung en in,” achi a.

⁴⁷ Jesu`n Nathanael akiang juan a pai amu a, akiang ah, “En un, gitlouhna neilou Israelmi chitak hiah a om!” achi hi.

⁴⁸ Nathanael in a kiangah, “Bang nung chitheih ahia?” achi a. Jesu`n adawng a akiang ah, “Philip in nang ahung sap ma in, theipi kung nuaia na om laiin kungmu hi,” achi hi.

⁴⁹ Nathanael in adawng a akiang ah, “Rabbi, Nang Pasian Tapa na hi! Israelte kumpipa nahi!” achi hi.

⁵⁰ Jesu`n adawng a akiang ah, “Theipi kung nuai ah kungmu na kiang a kungchih jiak a gingta nave maw? Hih silte sang a thupijaw namu ding hi!” achi hi.

⁵¹ Tualeh Jesu`n akiang ah, “Adiktak in kung hilh ahi: tunung chiangin van kihong a, Pasian vantungmite mihing Tapa tung a kah leh kum na muta ding uhi,” achi hi.