JAKOB 1 - Thukhun Thak NT (BSI)

Chibai bukna

¹ Jakob, Pasian leh Jesu Krist sila in, nam sawmlehnih kithehjakte: Chibai abuk hi.

Ginna leh Pilna

² Ka unaute aw, engbawlna na tuahchiang un, kipakna ngen in ngai un,

³ na ginna uh etkhiatna in kuhkalna asiam chih thei in.

⁴ Hinanleh bangmah tasamlou a chibit leh bukim tak a na omtheihna ding un kuhkalna in semkhia hen.

⁵ Na lak ua kuapeuhin pilna a taksapleh, mijousiah kiang a tailou leh itlou a piatu Pasian kiangah, ngen hen, tuachi`n a kiang ah piak ahi ding hi.

⁶ Hinanleh ginglahlou keiin, ngen hen. Ajiak ginglahmi pen tuipi kinawk huih mutleng kawikawi bang ahi.

⁷ Ajiak, huachibang mi in, Toupa a pat bangmah muh kinem kei hen.

⁸ Lungsim thuahneimi pen alampi jousiah akipkei hi.

Jawnna leh Hauhna

⁹ Hindan ngiam sanggampa pen pahtawia aom jiakin kipak hen,

¹⁰ hinanleh mihausa pen hihngiam a aom jiakin kipak hen, ajiak lou a pak bang a mang ding ahi hi.

¹¹ Ajiak pen ni in asatna tawh ahung suah chiangin ahaivul a, hua pakpen akia a, ahoihnate amangta hi. Tuachimah bangin mihausa zong, apaina ah amang ding hi.

Ze-etna leh khemna

¹² Khemna thuakjoumi ahampha hi. Ajiak pen etkhiat a aomzoh chiangin Toupa`n amah itte kiang a piak achiam hinna lallukhu amu ding hi.

¹³ Mi kuamah in, khem a aom chiangin, “Pasian khem ka hi kichikei hen.” Ajiak Pasian pen gitlouh a khemgual ahikei a, aman zong kuamah a khemngaikei hi.

¹⁴ Hinanleh michih amauh utna a puimang leh hip a aom chiangin, khem in aom ahijaw hi.

¹⁵ Tuachi`n, utna in nou apai chiangin, khialhna ahung piangkhia a, tua khialhna, ahung pichin chiangin, sihna ahung piangkhia hi.

¹⁶ Ka unau ittakte aw, khem in omkei un!

¹⁷ Silpiak hoih leh, silpiak bukim jousiah tunglam a kipan ahi a, vakte Pa kiang a kipan a hungpaisuk ahi, amah ah lamdanna leh kiheina lim aom kei hi.

¹⁸ A silsiamte lak a gahmasa khat i hihtheihna ding un, ama deihna bang a thutak lak ah ahung lakkhiat ihi uhi.

Thu ja leh sem

¹⁹ Tuajiakin ka unau ittakte aw! Michih a ngaihkhiat lam ah kin henla, thugen lam ah manlang kei henla, thangpaih lam ah ze-ol hen.

²⁰ Ajiak mihing thangpaihna in Pasian diktatna asiamkhia kei hi.

²¹ Tuajiakin silnin jousiah gitlouhna dimlet jousiah koihkhia unla, tualeh na hinna uh hundamthei phuhlutsa thu pen nunnemtak in pom un.

²² Hinanleh noumah leh noumah kikhem a thu ngaikhia guak hilou in, thu juitute hijaw un.

²³ Ajiak pen mi kuapeuh thu ngaikhia guak ahih a ajuitu ahihkei leh, amah pen mi limlang a apianpih mai ki en tawh kibang ahi.

²⁴ Ajiakpen aki en a, apaikhia a, bangchi bang mi ahih aki manghilhpai hi.

²⁵ Hinanleh kuapeuh zalenna dan bukim en a, tualeh hih juijing a, manghilhhat ngaikhiatu hilou a, hinanleh thu nasemtu hijaw, hua mi pen a nasep ah gualjawl in a om ding hi.

²⁶ Na lak ua mi kuapeuh sahkhuami ka hi chia kingaihsun a, tualeh alei venghoihlou a, hinanleh ama lungtang kikhemjaw tuh, hih mipa biakna pen apanna bei ahi.

²⁷ Pasian leh Pa mitmuh a biakna siangthou leh ninbanglou ahihleh hih ahi: tagahte leh meithaite buailai a vaveh leh, leitung buahna banglou a mahni kikep jing ahi.