HEBRAIMITE 1 - Thukhun Thak NT (BSI)

Pasian in a Tapa tungtawn in thu agen

¹ Pasian, nidanglai a pulehpate kiang a lam tuamtuam leh hun tuamtuam a Jawlneite zang a thu nagenpa in,

² hih ni nunungte ah a Tapa in i kiang ah thu a genta hi, amahpen sil jousiah luahtu dingin aguat a, leitungte zong amah tungtawn in asiam hi.

³ Amahpen a thupina vak leh a mihing hihna lim phuangkhia leh, sil jousiah a silbawltheihna thu a tungding dingin, a mahmah in i khialhnate a silsiang zoh in tunglam ah jiatlam ah atouta hi,

⁴ vantungmite sang a min ngaihjaw a muhbang ngeiin amauh sang a hoihjaw gouluahtu ding a siam ana hita him ahi.

Tapa vantungmite sangin lianjaw

⁵ Ajiak vantungmite lak ah Pasian in kuakiang ah ahia hihthute genkhakna a naneih ngai, “Nang ka Tapa nahi a; tu-nin kung neikhiata hi.” chihleh, “Amah dingin Pa ka hiding a, amahpen kei ding in Tapa ahi ding”

⁶ Hinanleh, Ta masapen leitung a ahung puilut kik laiin, “Pasian vantungmite jousiahin amah bia uhen,” achi hi.

⁷ Tualeh vantungmite tungtang thu ah hichiin achi hi, “ Aman vantungmite pen huih in asiam a, tualeh ana semtute meikuang in asiam hi,” chi in.

⁸ Hinanleh Tapa tungtang thu ah hihthu agen hi, “Aw Pasian, na Laltouna, tangtawn tangtawn dongin a om ding hi, diktatna Lalchiang zong nagam Lalchiang ahi.

⁹ Nang diktatna na it a tatkhialhna na hua hi. tuajiakin Pasian, na Pasian in nangpen na lawmte sang a tungtuang jaw in kipakna thau ahung nuhta hi.”

¹⁰ Tualeh nang, “Toupa, atu`ng in leitung kingakna na phumkhinta, tualeh vantungte zong na khutsuak ahi.

¹¹ Amauhte ahung mang ding a, hinanleh nang na omgige hi; amauh pen aun un puansilh bangin ahung lui ding a.

¹² puan bangin na jial ding a, a khekta ding uhi. Hinanleh nang a ngaimah na hi a, na kumte`n zong beini a neingai kei ding,” chi in.

¹³ Hinanleh vantungmite lak a kuapen kiangah ahia hihthu genkhakna ana neihngai, “Na melmate na kengkoihna a ka bawl masiah ka jiatlam ah tou in,” chih.

¹⁴ Amauhte jousiah hundamna gouluah dingte nna sepsak ding a sawlkhiat nasepna khate hilou uh a hiam?