EPHESATE 1 - Thukhun Thak NT (BSI)

Chibai bukna

¹ Paul, Pasian deihdan a Jesu Krist sawltak, Ephesa khua a om misiangthoute leh Jesu Krist a mi gin-omte kiangah:

² Pasian i Pa uleh Toupa Jesu kiang a kipan hehpihna leh khamuanna na kiang uah om hen.

Krist a khalam gualjawlna

³ Van munte a Krist a khalam gualjawlna a hung gualjawlpa i Toupa Jesu Krist Pa leh Pasian phat in om hen!

⁴ Ama mai a siangthou leh dembei a i omtheihna ding a, leitung kisiam masang a, itna a Krist a ahung natel dungjui in.

⁵ Ama kipakna leh deihlam bang in, Jesu Krist jiak a amah a ding a ta a bawl dingin ahung na guatkholhta hi.

⁶ Ahehpihna thupidan pahtawi dingin, hua hehpihna a a it mahmahpa ah ahung bawlta hi!

⁷ Amah ah a sisan jiakin tatkhiatna inei a, ahehpihna hauhdan dungjui a i khialhnate ngaihdamna,

⁸ Hua hehpihna ah aman, pilna jousiah leh lam-etna jousiahin ahung vukta hi!

⁹ Aman a kipakna bang a amah a bawl atup a lunggel thugu`k i kiang a hungtheisak in.

¹⁰ Hunbi khenna ahung tunkim chiang a amah ngeiin van a sil omte leh, leitung a sil omte a un a Krist a akhopkhawm chiang in.

¹¹ Ama deihdan thuhilhna bangjel a sil jousiah bawlpa tup bang a guatkholhsa in, amah ah gouluah ding a siam i hi uhi.

¹² Ei Krist na gingta masate, a thupina pahtawina i hihtheihna ding in!

¹³ Amah ah nou zong thutak thu na hundamna thu uh na ngaihkhiat ua, na gintat nung un, amah a chiamsa Khasiangthou a chiamteh in na om uhi.

¹⁴ Khasiangthou pen Pasian thupidan pahtawina ding a, gou leisa tatkhiatna hun masang a ding a i gouluah ding uh khamna ahi!

Paul thumna

¹⁵ Tuajiakin Toupa Jesu a na ginna uh leh misiangthoute tung a na itna uh ka najak in,

¹⁶ Ka thumna ah na minte uh lou in, noujiak a kipahthu gen ka tawp kei hi

¹⁷ i Toupa uh Jesu Krist Pasian, thupina Pa in amah theihna lam thu ah pilna leh kilakna kha nou a hungpiak theihna ding in.

¹⁸ Na lungsim mitte uh hihvak a ahung om a, asapna kinepna bang, misiangthoute a agoutan ding thupina hauhdan bang,

¹⁹ Tualeh asil bawltheihna hatna nasep dungjui a ei a gingtate lam a asil bawltheihna a thupidan nung theihtheihna ding un.

²⁰ Misi lak a kipan a kaihthoh lai, tualeh van munte a ajiatlam a atou lai,

²¹ Lalnate, sil bawl theihnate, thuneihnate leh, hih leitung guak hilou a, leitung hung tung ding ah zong min kiphuah jousiah tunglam pek a atousak lai a Krist a abawl pen.

²² Tualeh aman sil jousiah akeng nuaiah a koihta a, amahpen sil jousiah tung a lutang hiding in, saptuam kiang ah apia hi.

²³ Tuapen a pumpi ahi, a bukimna, bangkim jousiah dimsakpa ahi.